ޔުއެފާއިން ހޮވާ ޔޫރަޕުގައި ކުޅޭ އެންމެ މޮޅު ކުޅުންތެރިޔާގެ އެވޯޑު ކްރިސްޓިއާނޯ ރޮނާލްޑޯ ހޯދައިފިއެވެ.

މިއީ ރެއާލް މެޑްރިޑުގެ ފޯވާޑް މި އެވޯޑު ހޯދި ތިންވަނަ ފަހަރެވެ. މިދިޔަ އަހަރު ވެސް މި އެވޯޑު ހާސިލްކުރީ ރޮނާލްޑޯ އެވެ.

މި އެވޯޑު ރޮނާލްޑޯގެ އިތުރުން ވާދަކުރީ ބާސެލޯނާގެ ތަރި ލިއޮނެލް މެސީ އާއި ޔުވެންޓަސްގެ ކެޕްޓަން ޖިއަންލުއިޖީ ބުފަން އެވެ. ރޮނާލްޑޯ ވަނީ މުޅި ޖުމްލަ 482 ޕޮއިންޓް ހޯދާފައެވެ. އޭނާގެ ފަހަތުން ދެވަނައަށް ދިޔަ މެސީއަށް ލިބުނީ 141 ޕޮއިންޓެވެ. އަދި 109 ޕޮއިންޓާ އެކު ތިންވަނައަށް ހޮވުނީ ބުފަންއެވެ.

ރޮނާލްޑޯ ވަނީ މިދިޔަ ސީޒަނުގައި ސްޕެނިޝް ލަލީގާގައި 25 ލަނޑު ކާމިޔާބު ކޮށްފައެވެ. އަދި ޗެމްޕިއަންސް ލީގުގައި ރެއާލްއިން ކުޅުނު 13 މެޗުގައި އޭނާވަނީ 12 ލަނޑު ކާމިޔާބު ކޮށްދީފައެވެ. ރޮނާލްޑޯ ވަނީ މިދިޔަ ސީޒަނުގައި ޔޫރަޕުގައި ކުޅުނު އެންމެ މޮޅު ފޯވާޑުގެ އެވޯޑު ވެސް ހޯދާފައެވެ.

އެވޯޑު ހަފްލާއަށް ފަހު ވާހަކަ ދައްކަމުން ރޮނާލްޑޯ ބުނެފައި ވަނީ އަނެއްކާ ވެސް ޔުއެފާގެ އެންމެ މޮޅު ކުޅުންތެރިޔާ ލިބުމުން ވަރަށް އުފާވާ ކަމަށެވެ. އަދި އޭނާ ވަނީ ރެއާލްގެ ކުޅުންތެރިންނާއި އޭނާގެ ސަޕޯޓަރުންނަށް ޝުކުރު އަދާކޮށްފައެވެ.

މިދިޔަ ސީޒަނުގައި ޔުއެފާގެ އެންމެ މޮޅު ޑިފެންޑަރަކަށް ހޮވިފައި ވަނީ ރެއާލްގެ ކެޕްޓަން ސާޖިއޯ ރާމޯސްއެވެ. އަދި ޔުއެފާގެ އެންމެ މޮޅު މިޑްފީލްޑަރަކަށް ހޮވިފައިވަނީ ރެއާލްއަށް ޗެމްޕިއަންސް ލީގު ހޮދައިދިނުމުގައި އިސް ދައުރެއް އަދާކުރި ކްރޮއޭޝިއާގެ މިޑްފީލްޑަރު ލޫކާ މޮޑްރިޗްއެވެ. ޔުއެފާގެ އެންމެ މޮޅު ގޯލްކީޕަރުގެ މަގާމު ލިބިފައިވަނީ ޔުވެންޓަސްގެ ކެޕްޓަން ބުފަންއަށެވެ.

ރޮނާލްޑޯވަނީ ރެއާލްއަށް ކުޅުނު 396 މެޗުގައި 407 ލަނޑު އެޓީމަށް ކާމިޔާބު ކޮށްދީފައެވެ. މީގެ ތެރެއިން އޭނާވަނީ ޗެމްޕިއަންސް ލީގުގައި ކުޅުނު 88 މެޗުގައި 90 ލަނޑު ކާމިޔާބުކޮށްފައެވެ. ރޮނާލްޑޯއަކީ ޔުއެފާ ޗެމްޕިއަންސް ލީގުގައި އެންމެ ގިނަ ލަނޑު ޖެހި ކުޅުންތެރިޔާއެވެ. މީގެ އިތުރުން އޭނާވަނީ ޕޯޗުގަލްއާއި އެކު ޔޫރޯ ކާމިޔާބުކޮށް، ޕޯޗުގަލްއަށް ކުޅުނު 143 މެޗުގައި 75 ލަނޑު އެ ޓީމަށް ކާމިޔާބު ކޮށްދީފައެވެ.