މަޖިލިސް ޗުއްޓީ ކެންސަލް ކުރުމަށްފަހު، ޖަލްސާތައް ބާއްވާގޮތަށް ނިންމަނީ
29 އެޕްރީލު 2020 | ބުދަ 06:58މަޖިލީހުގެ ފުރަތަމަ ދައުރުރަކީ ފެބްރުއަރީ މަހުގެ ފުރަތަމަ ދުވަހުން ފެށިގެން އޭޕްރީލް މަހުގެ ނިޔަލަށް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު ނިންމުމަށްފަހު ލިބޭ ޗުއްޓީ ކެންސަލް ކުރުމަށްފަހު، ޖަލްސާތައް ކުރިއަށް ގެންދިއުމަށް މަޖިލީހުގެ ރިޔާސަތު، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މަޖިލީހުގެ ބުދަ ދުވަހުގެ ޖަލްސާއަށް ހުށަހަޅުއްވަފިއެވެ.
ރައްޔިތުންގެ މަޖިލީހުގެ ފުރަތަމަ ދައުރަކީ ފެބްރުއަރީ މަހުގެ ފުރަތަމަ ދުވަހުން ފެށިން އޭޕްރީލް މަހުގެ ނިޔަލަށެވެ. އެހެންކަމުން މި އޭޕްރީލް ނިމުމާއެކު މަޖިލީހުގެ ޤަވާއިދު ބުނާގޮތުން އެއް މަސް ދުވަހުގެ ޗުއްޓީއެއް މެންބަރުންނަށް ލިބެއެވެ.
މަޖިލީހުގެ ރައީސް ނަޝީދު ވިދާޅުވީ، މިއަހަރުގެ ފުރަތަމަ ދައުރު ނިމުމާއެކު ލިބޭ ޗުއްޓީ ނުނަގައި، މަޖިލީހުގެ ޖަލްސާތައް ބޭއްވޭ ގޮތަށް މަޖިލީހުގެ މެންބަރުން ތިއްބެވުމަކީ ކޮވިޑް-19ގެ މިޙާލަތުގައި ޤައުމު އޮތްއިރު، މުހިންމު ކަމެއް ކަމަށެވެ.
އެގޮތުން ރަޢީސް ނަޝީދު، ހުށަހެޅުއްވީ މަޖިލީހުގެ މިއަހަރުގެ ފުރަތަމަ ދައުރު އަންނަ މެއި މަހުގެ 31 ވަނަ ދުވަހުގެ ނިޔަލަށް ކުރިއަށްދާ ގޮތަށެވެ.
އެހެންކަމުން މަޖިލީހުގެ މިއަހަރުގެ ފުރަތަމަ ދައުރު މެއި މަހުގެ 31 ވަނަ ދުވަހަށް އިތުރު ކުރެއްވުމުން މަޖިލީހުގެ މިއަހަރުގެ ދެވަނަ ދައުރު ޖުލައި މަހުން ފެށިގެން ކުރިއަށްދާނެ އެވެ. އެހެންކަމުން މަޖިލީހުގެ މެންބަރުންނަށް މިއަހަރު ފުރަތަމަ ދައުރުނިމި، ދެވަނަ ދައުރު ފެށޭއިރު ލިބޭ ޗުއްޓީއެއް ނުލިބޭނެއެވެ.
ރައީސް، ނަޝީދު ވިދާޅުވީ، ކޮވިޑް-19ގެ މިޙާލަތުގައި މަޖިލިސް ހިންގުމަކީ ސަރުކާރު ހިންގުމަށް ފަސޭހަވެ، އަދި ސަރުކާރާ ދައުލަތުގެ އިދާރާތައް ޒިންމާދާރު ކުރުމަށް ވެސް މުހިންމު ކަމެއްކަމަށެވެ. އަދި ރައްޔިތުންނަށް ވެސް އެންމެ ފައިދާހުރި ގޮތަކަށްވާނީ މިޙާލަތުގައި މަޖިލިސް ކުރިއަށް ދިއުންކަމަށް ރައީސް ނަޝީދު ވިދާޅުވި އެވެ.
މަޖިލީހުގެ މިއަހަރުގެ ފުރަތަމަ ދައުރު މެއި މަހުގެ 31 ގެ ނިޔަލަށް ދިގު ދައްމާލަން ވޯޓަށް އެހުން ބުދަ ދުވަހުގެ ޖަލްސާގައި އޮންނާނެ ކަމަށްވެސް ރައީސް ނަޝީދު ވަނީ އިޢުލާނު ކުރައްވާފައެވެ.
