ވަރުވާ އުސޫލުން ދަނޑުވެރިކަމަށް ދޫކޮށްފައިވާ ރަށްތަކުގައި ދަނޑުވެރިކަން ކުރަމުންނުދާނަމަ، އެ ރަށްތަކުގެ އެއްބަސްވުން އުވާލުމަށް ލާމަރުކަޒީ ކޮމެޓީން ރައްޔިތުންގެ މަޖިލީހަށް ހުށަހަޅުއްވައިފި އެވެ.
ކޮވިޑް19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން ޢާއިލާތަކާއި ވިޔަފާރިކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ހިންމާފައިވާ ޕްރޮގްރާމް ތަންފީޒުކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭގޮތުން ރައްޔިތުންގެ މަޖިލީހަށް ހުށަހެޅި މައްސަލައާ ގުޅިގެން ލާމަރުކަޒީ ކޮމިޓީގެ ރިޕޯޓު ހުށަހަޅުއްވައިދެއްވީ ކޮމެޓީގެ މުގައްރިރު ހުޅުމާލޭ ދާއިރާގެ މެމްބަރު އަލީ ނިޔާޒް އެވެ.
ސަރުކާރުން ހިންގުމަށް ހިންމާފައިވާ ޕްރޮގްރާމް ތަންފީޒުކުރުމާއި ގުޅިގެން ކޮމެޓީން ހުށަހަޅާފައިވާ މައިގަނޑު ކަންކަން
- ރަށްރަށުގައި ދަނޑުވެރިކަން ކުރުމަށް އެރަށަކުން ލިބެންހުރިބިމުގެ ސަރަޙައްދުގެ ތަފާސްހިސާބެއް ކައުންސިލްތަކުން ހަދައި އެލް.ޖީ.އޭއާއި ހިއްސާކޮށް، ވަގުތީގޮތުން ދަނޑުވެރިކަންކުރުމަށް އެދޭ ފަރާތްތަކަށް ކައުންސިލްތައް މެދުވެރިކޮށް ބިން ދޫކުރުން
- ބިމުގެ ދަތިކަމުގެ ސަބަބުން އަމިއްލަ ރަށުގައި ދަނޑުވެރިކަންކުރެވެން ނެތް ފަރާތްތަކަށް، އެކަކަށްވުރެ ގިނަ މީހުންނަށް ދަނޑުވެރިކަން ކުރެވޭގޮތަށް ފަޅުރަށްތައް ކުރު މުއްދަތަކަށްދޫކުރުން
- ދަނޑުވެރިކަމަށް މިހާރު ދޫކޮށްފައިވާ ރަށްތަކުގެ ބޭނުންކުރަނީ ދަނޑުވެރިކަމަށްކަން ކަށަވަރުކުރުމުގެ ގޮތުން އެފަދަ ރަށްތަކުގެ ސާރވޭއެއް އަތޮޅު ކައުންސިލްތައް މެދުވެރިކޮށް ހަދައި، ދަނޑުވެރިކަމަށް ދޫކޮށްފައިވާ ރަށްތަކުގައި ދަނޑުވެރިކަންކުރަމުންނުދާ ނަމަ އެރަށްތަކުގެ އެއްބަސްވުން މިނިސްޓްރީއޮފް ފިޝަރީޒް، މެރިން ރިސޯސަސް އެންޑްއެގްރިކަލްޗަރއިން ބާތިލުކުރުން
- ދަނޑުވެރިކަމަށް ދޫކުރާ ބިންތަކާއި ރަށްތަކުގައި އެ މަސައްކަތް ކުރަނީ ދިވެހިންކަން ކައުންސިލްތައް މެދުވެރިކޮށް ޔަޤީންކުރުން
- މާރުކޭޓު ގޮޅިތައް ކުއްޔަށްދޫކޮށްފައިވާ ފަރާތްތަކުން ތިންވަނަފަރާތަކަށް ކުއްޔަށް ދީގެން ވިޔަފާރިކުރަމުންދާ ގޮޅިތައް އެފަދަ ފަރާތްތަކުން އަތުލުން
- މާރުކޭޓުގެ ގޮޅިތައް ތިންވަނަ ފަރާތަކަށް ކުއްޔަށް ދިނުމަށްމެދުވެރިވާ މައިގަނޑު އެއް ސަބަބަކީ ގޮޅިތަކުގެ ސައިޒުކުޑަވުމުގެ ސަބަބުން ދެ ގޮޅި އެއްކޮށްލައިގެން ވިޔަފާރިކުރުން ކަމުގައިވާތީ، އަލަށް އިއުލާންކޮށްގެން ގޮޅިތައްދޫކުރާއިރު އެ ގޮޅިތަކަކީ އެކަށީގެންވާ ސައިޒްތަކެއްގެ ގޮޅިތަކެއްކަން ކަށަވަރުކުރުން.
މީގެއިތުރުން ސަރުކާރުން ކުރުމަށް ހަމަޖައްސަވާފައިވާ ބައެއް މަސައްކަތްތަކާ ގުޅޭގޮތުން އިތުރު ކަންކަން ކޮމެޓީގެ މެމްބަރުން ފާހަގަކުރައްވާފައި ވެއެވެ.
މެމްބަރުން ފާހަގަކުރައްވާފައިވާ ކަންކަމަށް ބަލާލާއިރު ރަށްރަށުގައި މަސްވެރިކަމުގެ މަސައްކަތްތައް ކުރުމަށް ދޫކުރެވިފައިވާ ބިންތަކުގެ ސާރވޭއެއް ހަދައި ވަކި ޕްލޭނެއްގެދަށުން މަސްވެރިކަމުގެ ބޭނުމަށް ކައުންސިލްތައް މެދުވެރިކޮށް ބިން ދޫކުރުމަށް ވެސް ހުށަހަޅާފައި ވެއެވެ. އަދި އެކިއެކި އިޤްތިސާދީ މަސައްކަތްތައް ކުރުމަށް ދޫކޮށްފައިވާ ބިންތައް އެ ބިންތައް ދޫކޮށްފައިވާ ބޭނުމަށް ބޭނުންކުރަމުންނުދާނަމަ އެފަދަ ފަރާތްތަކާއެކު ހަދާފައިވާ އެއްބަސްވުން ބާތިލުކުރުމަށް މެމްބަރުން ފާހަގަކުރައްވާފައި ވެއެވެ.
މީގެއިތުރުން ކޮވިޑް-19ގެ ސަބަބުން ދިމާވެފައިވާ ޙާލަތުގައި އިޖްތިމާއީ ގައިދުރުކަމަށް އިސްކަންދީގެން ކައުންސިލްގެ ބައްދަލުވުންތައް ބާއްވައި، ކައުންސިލްގެ އެހެނިހެން މަސައްކަތްތައް ކުރެވޭނެ އިންތިޒާމް ކައުންސިލްތަކުގައި ހަމަޖެހިފައިވާކަން އެލް.ޖީއޭ.އިން ކަށަވަރުކުރުމަށް ވެސް ރިޕޯޓުގައި ވެއެވެ.
މި ޙާލަތުގައި އެތައް ރައްޔިތުންނަކަށް ނަފްސާނީގޮތުން އަސަރުކޮށްފައިވާއިރު، އެފަދަ ފަރާތްތަކުގެ ތެރެއިން ކައުންސެލިން ބޭނުންވާ ފަރާތްތަކަށް ރަށުގައި ތިބެގެން އެ ޚިދުމަތް ހޯދޭނެ އިންތިޒާމްހަމަޖެހިފައިވާކަން އަތޮޅު ހޮސްޕިޓަލްތަކާ ގުޅިގެން ކައުންސިލްތަކުން ކަށަވަރުކުރުމުގެ އިތުރުން ކޮންމެ ރަށެއްގެ ރަށު ކައުންސިލަކުންވެސް އެ ރަށެއްގައި މަސައްކަތްކުރަމުންދާ ބިދޭސީންގެ ދަފްތަރެއް އެ ބިދޭސީއަކު މަސައްކަތް ކުރަމުންދާ ދާއިރާ ސާފުވާނެގޮތަށް އެކުލަވާލައި އެލް.ޖީ.އޭ އަށް ފޮނުވުމަށް ވެސް ރިޕޯޓުގައި ވެއެވެ.
