އެހެން ގައުމުތަކުގެ މީހުން ހޭލުންތެރި ކުރުވުމަށް އެމްބަސީތަކާ ގުޅިގެން ދަނީ މަސައްކަތް ކުރަމުން: މައީދު
28 އެޕްރީލު 2020 | އަންގާރަ 18:03ބިދޭސީންނަށް ޚާއްސަކޮށް ވައިބަރ ގްރޫޕެއް ހިންގޭ
ރާއްޖޭގައި ގަވާއިދާ ހިލާފަށް އުޅޭ ބިދޭސީން ގިނަ
ކޮވިޑް-19ގެ މިހާލަތުގައި ރާއްޖޭގައި ދިރިއުޅޭ އެހެން ގައުމުތަކުގެ މީހުން ހޭލުންތެރިކޮށް، އެހީވުމަށް އެގައުމުތަކުގެ އެމްބަސީތަކާ ގުޅިގެން މަސައްކަތްތައް ކުރަމުންދާ ކަމަށް ދިވެހި ރެޑްކްރެސެންޓުން ބުނެފިއެވެ.
ކޮވިޑް-19އާ ގުޅިގެން ކުރެވޭ މަސައްކަތްތަކުގެ މައުލޫމާތު ދިނުމަށް އަންގާރަ ދުވަހުގެ މެންދުރުފަހު ބޭއްވި ނޫސްވެރިންގެ ބައްދަލުވުމުގައި ރެޑް ކްރެސެންޓުގެ ޕްރޮގްރާމް އެންޑް ސަރވިސަސް މެނޭޖަރު މައީދު ޒާހިރު ވިދާޅުވީ އެހެން ގައުމުތަކުގެ މީހުންނަށް އަދި ބިދޭސީންނަށް ރެޑްކްރެސެންޓްގެ ހޮޓްލައިން މެދުވެރިކޮށް ވެސް ބޭނުންވާ މައުލޫމާތު އަދި އެހީތެރިކަން ފޯރުކޮށްދެމުންދާ ކަމަށެވެ.
ކޮވިޑް-19ގެ މިހާލަތުގައި ބިދޭސީންގެ ބަހުރުވައިން ވާހަކަ ދެއްކޭ މީހުންނަށް ޚާއްސަކޮށް ޓްރޭނިން ޕްރޮގްރާމްތައް ކުރިއަށް ގެންދާ ކަމަށް މައީދު ވިދާޅުވިއެވެ.
އެމްބަސީތަކާ ގުޅިގެން ގިނަ މަސައްކަތްތައް ކުރެވޭކަން ފާހަގަކުރައްވައި މައީދު ވިދާޅުވީ އެކި އެމްބަސީތަކުގައި ތިއްބެވި ވޮލެންޓިއަރ ބޭފުޅުންނާއެކު ތަމްރީންތައް ކުރިއަށް ގެންދަމުންދާ ކަމަށެވެ. މިހާރު ވެސް އެބޭފުޅުންނާއެކު މަސައްކަތްތައް ކުރެވެމުންދާކަން މައީދު ފާހަގަކުރެއްވިއެވެ.
މީގެ އިތުރުން މައީދު ވިދާޅުވީ މިހާރު ވެސް މައުލޫމާތު އެޑްތަކާއި، ޕޯސްޓަރުތައް ހަދަމުންދަނީ މަލްޓިލެންގުއޭޖްކޮށް ކަމަށެވެ. އަދި ވިދާޅުވީ ދިވެހި ރެޑްކްރެސްޓުން މަލްޓި ލެންގުއޭޖްކޮށް ވައިބާ ގްރޫޕެއް ވެސް ހިންގަމުންދާ ކަމަށެވެ. އެއީ ބިދޭސީންނަށް ޚާއްސަ ކޮށްގެން ހިންގޭ ވައިބަރ ގުރޫޕެއް ކަމަށާއި، މިގުރޫޕްގެ ވެސް މައިގަނޑު މަގުސަދަކީ ބިދޭސީން ހޭލުންތެރިކުރުވައި އެހީތެރިވުން ކަމަށެވެ.
