ފަގީރުންނަށް ކަދުރު ބެހުމުގެ މަސައްކަތް ފަށައިފި
27 އެޕްރީލު 2020 | ހޯމަ 20:38ކަދުރު ދޫކުރުމުގެ މަސައްކަތް ވަނީ ފަށާފައި
ކަދުރު ބެހުމުގެ މަސައްކަތުގައި ދަރުމަވެރިން ހަރަކާތްތެރިވަނީ
މާލޭގައި ތިބި ފަގީރުންނަށް ކަދުރު ބެހުމުގެ މަސައްކަތް އިސްލާމިކް މިނިސްޓްރީން ފަށައިފިއެވެ.
ކޮންމެ އަހަރެކޭ އެއްގޮތަށް މިއަހަރުގެ ރަމަޟާން މަހުގައިވެސް ކަދުރު ބެހުމުގެ މަސައްކަތް ފަށައި އެކަމާއި ގުޅިގެން މިނިސްޓްރީން ކޮށްފައިވާ ޓުވީޓެއްގައި ބުނެފައިވަނީ، އިސްލާމިކް މިނިސްޓްރީގެ ފަރާތުން މާލޭގައި ތިބި ފަގީރުންނަށް ކަދުރު ބެހުމުގެ މަސައްކަތް ޔޫތު މިނިސްޓްރީއާއި ގުޅިގެން ހޯމަ ދުވަހުގެ ރެއިން ފެށިގެން ކުރިއަށް ގެންދިއުމަށް ހަމަޖެހިފައިވާ ކަމަށެވެ. ޓުވީޓުގައި ވަނީ ޔޫތު މިނިސްޓްރީގެ ދަރުމަވެރިންނަށާއި އެ މިނިސްޓްރީން ދެއްވާ އެއްބާރުލުމަށް ޝުކުރު އަދާކޮށްފައެވެ.
މީގެކުރިން އިސްލާމިކް މިނިސްޓްރީން ވަނީ މިއަހަރުވެސް ރަމަޟާން މަހަށް ސައުދީން 50 ޓަނުގެ ކަދުރު ހަދިޔާކޮށްފައިވާ ކަމަށް ބުނެފައެވެ.
ރާއްޖޭގެ ފަގީރުންގެ ދަފްތަރުގައި 16،209 މީހުން ރަޖިސްޓްރީވެފައިވެ އެވެ.
މާލޭގައި ފަގީރުންގެ ގޮތުގައި ރަޖިސްޓްރީވެފައި ވަނީ 3،300 މީހުންނެވެ.
