އަމާޒު ބޯޓުގެ 101 ޕްރައިމަރީ ކޮންޓެކްޓް ހޯދައިފި
ފަސް މީހެއްގެ ފަރާތުން ވަނީ އަލާމާތްތައް ފެނިފައި
އަމާޒް ބޯޓު
މި މަހުގެ 15 ވަނަ ދުވަހު މާލެއިން ފުރައިގެން އުތުރުގެ އަތޮޅުތަކަށް ދަތުރު ކުރި ''އަމާޒް'' ބޯޓުގެ ކެޕްޓަން ކޮވިޑް-19 އަށް ޕޮޒިޓިވްވުމާއި ގުޅިގެން ޕްރައިމަރީ ކޮންޓެކްޓުންގެ ގޮތުގައި 101 ފަރާތެއް ހޯދިފައިވާ ކަމަށް ޓެކްނިކަލް އެޑްވައިޒަރީ ގްރޫޕް (ޓެގް) އިން ބުނެފި އެވެ.
ހޯމަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޓެގް ގައި ހިމެނިވަޑައިގަންނަވާ ޑރ. އިބްރާހިމް އަފްޒަލް ވިދާޅުވީ، ޕްރައިމަރީ ކޮންޓެކްޓުންގެ ތެރޭގައި އެ ބޯޓުގެ އަށްފަޅުވެރިއަކުވެސް ހިމެނޭ ކަމަށެވެ. އަދި ސެކަންޑަރީ ކޮންޓެކްޓުންގެ ތެރެއިން އެކެއްގެ ފަރާތުން އަލާމާތްތައް ފެނިފައިވާ ކަމަށް ވިދާޅުވި އެވެ.
ޑރ. ވިދާޅުވީ، ޕްރައިމަރީ ކޮންޓެކްޓުންގެ ތެރެއިން ފަސް މީހެއްގެ ފަރާތުން އަލާމާތްތައް ފެނިފައިވާ ކަަމަށެވެ. އެޗްޕީއޭއިން ދަނީ މިހާރު އެ މީހުންގެ ސާމްޕަލް ނަގައި ޓެސްޓު ކުރުމުގެ މަސައްކަތް ކުރަމުންނެވެ.
އެ ބޯޓުން ދަތުރުކުރި ހުރިހާ ފަރާތްތަކެއްވެސް އެޗްޕީއޭ އަށް ރިޕޯޓް ކުރުމަށް ވަނީ އަންގާފައެވެ. އަމާޒް ބޯޓުގައި 98 މީހަކު ވަނީ ދަތުރުކޮށްފަ އެވެ.
