ހުޅުމާލެ މެޑިކަލް ފެސިލިޓީގައި މަސައްކަތް ކުރާ 2 މީހަކު ކޮވިޑް-19 އަށް ޕޮޒިޓިވްވުމާއެކު، މަސައްކަތްތައް މަޑުޖެހިފައި
27 އެޕްރީލު 2020 | ހޯމަ 12:18މަސައްކަތްތަކަށް މިހާރު މަޑުޖެހުމެއް އައިސްފައިވާކަމަށާއި ނަމަވެސް އިތުރު މީހުން ނިކުމެގެން މަސައްކަތް ކުރާނެ ކަމަށް އަލީ ވަހީދު ވިދާޅުވި
ހުޅުމާލޭގައި ހަދަމުންދާ މެޑިކަލް ފެސިލިޓީ | އެމްއެންޑީއެފް
ކޮވިޑް-19 އަށް ފަރުވާދިނުމަށް ހުޅުމާލޭގައި ގާއިމުކުރަމުންދާ މެޑިކަލް ފެސިލިޓީގައި މަސައްކަތް ކުރާ 2 މީހަކު ކޮވިޑް-19 އަށް ޕޮޒިޓިވްވުމާއި ގުޅިގެން އެތާންގެ މަސައްކަތްތަކަށް މަޑުޖެހުމެއް އައިސްފައިވާ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.
ހުޅުމާލޭގައި އަޅަމުންދިޔަ މެޑިކަލް ފެސިލިޓީ މިމަހުގެ ނިޔަލަށް ނިމޭނެކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވަނީ ވިދާޅުވެފަ އެވެ. އެގޮތުން އެތާންގައި މިހާރު ކުރަމުންދަނީ ފިނިޝިންގ ގެ މަސައްކަތާއި އެތަނުގެ ތެރެއަށް ވަށްދަންޖެހޭ އިކިޔުޕްމެންޓްސްތައް ވެއްދުމުގެ މަސައްކަތްކަމަށް މަބްރޫކް ވަނީ މީގެކުރިން ބޭއްވި ނޫސްވެރިންގެ ބައްދަލުވުމުގައި ވިދާޅުވެފަ އެވެ.
ހޯމަ ދުވަހު ކުރިޔަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓޫރިޒަމް މިނިސްޓަރ ވިދާޅުވީ އެތަނުގެ މަސައްކަތްތަކަށް މިހާރު މަޑުޖެހުމެއް އައިސްފައިވާކަމަށާއި ނަމަވެސް އިތުރު މީހުން ނިކުމެގެން މަސައްކަތް ކުރާނެ ކަމަށެވެ. މިމަސައްކަތަށް ހުރިހާ ފަރާތްތަކުންވެސް ނިކުމެ ތިބީ މިފަދަ ކަމެއް ކުރިމަތިވެދާނެ ކަމަށް ބަލައިގެން ކަމަށާއި އެހެން ކަމުން ޕޮޒިޓިވްވުމާއެކު އެކޭސްތަކާއި ގުޅުންހުރި މީހުން ކަރަންޓީނަށް ދާނެކަމަށެވެ. މިކަމަށް މަސައްކަތްކުރާ ޓީމު އޮތީ އެކަމަށް ތައްޔާރަށް ކަމަށް އަލީ ވަހީދު ވިދާޅުވި އެވެ.
ހުޅުމާލޭގައި ގާއިމުކުރާ މެޑިކަލް ފެސިލިޓީ ގާއިމްކުރުމުގެ މަސައްކަތުގައި އެމްއެންޑީއެފްގެ އިތުރުން، އެޗްޑީސީ، ފެނަކަ، އަމިއްލަ ކުންފުނިތަކާއި އެޖެންސީތަކުގެ ގިނަ ބަޔަކު ބައިވެރިވި އެވެ. އަދި ކޮންސްޓްރަކްޝަން މަސައްކަތުގައި އުޅޭ މީހުންގެ އިތުރުން އަމިއްލަ ފަރުދުން ވެސް މަސައްކަތުގައި ބައިވެރިވެ އެވެ.
މި މަސައްކަތްތައް ކުރިއަށްދާ ގޮތުގެ ތަފްސީލް ހާމަކުރައްވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވަނީ މިއީ 290 އެނދުގެ މެޑިކަލް ފެސިލިޓީއެއް ކަމަށް ވިދާޅުވެފައެވެ. ހުޅުމާލެ މެޑިކަލް ފެސިލިޓީ ގާއިމްކުރަނީ 05 ބްލޮކަށް ބަހާލައިގެންނެވެ. އެތަނުގައި 19 ރޫމް ހުރެއެވެ.
