ރާއްޖޭގައި މިވަގުތުވެސް 50ށް ވުރެ ގިނަ ޤައުމުތަކަށް ނިސްބަތްވާ ފަތުރުވެރިން އެބަތިބިކަމަށް ޓޫރިޒަމް މިނިސްޓަރ އަލީ ވަޙީދު ވިދާޅުވެއްޖެއެވެ.

ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ، މިހާރުވެސް ދުނިޔޭގެ 50ށް ވުރެ ގިނަ ޤައުމުތަކަށް ނިސްބަތްވާ ފަތުރުވެރިން ރާއްޖޭގައި އެބަތިބި ކަމަށާއި، ފޮރިން މިނިސްޓްރީއާއި ޓޫރިސްޓް ފުލުހުންނާއި ގުޅިގެން އެ ފަރާތްތަކުގެ ކަންކަން ގާތުން ބަލަމުންދާ ކަމަށެވެ.

އެގޮތުން ރާއްޖޭގެ 10 ރިސޯޓެއްގައި ފަތުރުވެރިން ތިބިކަން ފާހަގަކުރައްވައި މިނިސްޓަރ ވިދާޅުވީ، އޭގެ ތެރޭގައި ހިމެނޭ 187 ފަތުރުވެރިންބ ކަމާބެހޭ ފަރާތްތަކާއި ގުޅިގެން މިހާރު ޑްރީމް އައިލެންޑްގައި ބައިތިއްބާފައިވާ ކަމަށެވެ.

މިނިސްޓަރ ވިދާޅުވީ، އެ ހުރިހާ ފަތުރުވެރިންގެވެސް އާންމު ޙާލަތު ރަނގަޅު ކަމަށެވެ.

އޭގެ އިތުރުން، މިނިސްޓްރީން މިހާރުވެސް އެކި ދާއިރާތަކުން މަސައްކަތްތައް ކުރަމުންދާކަން ފާހަގަކުރައްވައި މިނިސްޓަރ އިތުރަށް ވިދާޅުވީ، ހަމައެކަނި ފަތުރުވެރިކަމުގެ ސިނާއަތުންވެސް 16ށް ވުރެ ގިނަ ފެސިލިޓީތައް ކޮވިޑް-19 ގެ ބަލިމަޑުކަމާއި ގުޅިގެން ކަރަންޓީން ފެސިލިޓީތަކުގެ ގޮތުގައި ޚާއްސަކޮށްފައިވާ ކަމަށެވެ.

ކޮވިޑް-19 ގެ ކޮމިއުނިޓީ ސްޕްރެޑެއް ރާއްޖެއިންވެސް ފެނިފައިވާއިރު، މިހާތަނަށް 214 މީހަކު ރާއްޖެއިން ކޮވިޑް-19އަށް ޕޮޒިޓިވްވެފައިވެއެވެ. އެއާއެކު، ކޮންޓެކްޓް ޓްރޭސިންގ ގެ މަސައްކަތް ކުރެވި، އިތުރު ކަރަންޓީން ފެސިލިޓީތައް ޤާއިމު ކުރުމުގެ މަސައްކަތް ސަރުކާރުން ދަނީ ކުރަމުންނެވެ.