ޗައިނާގެ ދެ ކުންފުންޏަކުން ރާއްޖޭގައި ދެ ކަރަންޓީނު ފެސިލިޓީއެއް ޤާއިމުކުރުމުގެ މަސައްކަތްކުރަމުންދާއިރު، އެތަނުގެ މަސައްކަތުގައި ހަރަކާތްތެރިވަނީ އެކުންފުނީގައި މަސައްކަތްކުރަން ރާއްޖޭގައި ތިބި މުވައްޒަފުންކަމަށް ފޮރިން މިނިސްޓްރީން ބުނެފިއެވެ.
ޗައިނާ މީހުން ރާއްޖެއަށް އަންނަކަމަށް ބައެއް މީޑިއާތަކުގައި ރިޕޯޓްކޮށްފައިވާތީ އެކަން ދޮގުކޮށް ފޮރިން މިނިސްޓްރީން ބުނީ ސަރުކާރުގެ އެދުމުގެ މަތިން ރާއްޖޭގައި މަސައްކަތްކުރާ ޗައިނާގެ ބައެއް ކުންފުނިތަކުން ކަރަންޓީން އަދި އައިސޮލޭޝަން ފެސިލިޓީތައް ޤާއިިމުކުރުމުގައި އެހީތެރިކަން ފޯރުކޮށްދެމުން އަންނަ ކަމަށެވެ.
މިމަސައްކަތުގައި ޗައިނާ ކުންފުނިތަކުން ފޯރުކޮށްދެނީ މަސައްކަތް ކުރާ މުވައްޒަފުންނާއި، މަސައްކަތްކުރުމަށް ބޭނުންވާ ފަންނީ އާލާތްތައްކަމަށްް މިނިސްޓްރީ އޮފް ފޮރިން އެފެއަރޒުން ބުނެއެވެ.
އަދި ޗައިނާ ކުންފުނިތަކުން މިކަމުގައި އެހީތެރިކަން ފޯރުކޮށްދޭ މުވައްޒަފުންނަކީ މިހާރު ވެސް ރާއްޖޭގައި ތިބި އެކުންފުނިތަކުގެ މުއައްޒަފުން ކަމަށާއި، ދިވެހި ސަރުކާރުން އިތުރު ޚަރަދެއް ނުކުރާނެކަމަށް ފޮރިން މިނިސްޓްރީން ބުނެއެވެ.
ކަރަންޓީން އަދި އައިސޮލޭޝަން ފެސިލިޓީތަކަކީ ކޮވިޑް-19އާ ދެކޮޅަށް ސަރުކާރުން ކުރަމުންދާ މަސައްކަތްތަކުގެ ތެރެއިން ކުރިއަށްދާ މަޝްރޫޢުތަކެއްކަމަށެވެ.
މީގެ އިތުރުން ޗައިނާގެ ކުންފުނިތަކުން ފޯރުކޮށްދެމުންދާ އެހީތެރިކަން ފާހަގަކުރައްވައި، ފޮރިން މިނިސްޓަރު ޢަބްދުﷲ ޝާހިދުވަނީ ޝުކުރު އަދާކުރައްވާފައެވެ.
ރާއްޖޭގައި ޙަރަކާތްތެރިވާ ޗައިނާ ކުންފުންޏަކުން ފަރުކޮޅުފުށީގައި ޤާއިމުކޮށްފައިވާ ފެސިލީޓީގައި ފާހާނާބަރިއެއްވެސް ހިލޭ ޢިމާރާތްކޮށްދީފައެވެ.
