ހުއްދައެއް ނެތި އިމާރާތްކުރާ ނަމަ އެއްމިލިޔަން ރުފިޔާ އަށްވުރެ ބޮޑު ނޫން އަދަދަކުން ޖޫރިމަނާ ކުރެވޭ ގޮތަށް "އިމަރާތް ކުރުމުގެ ބިލް" ސަރުކާރުން ރައްޔިތުންގެ މަޖިލީހަށް ހުށަހަޅައިފިއެވެ.

ސަރުކާރުގެ ފަރާތުން ތިނަދޫ އުތުރު ދާއިރާގެ މެންބަރު ސަޢުދުﷲ ޙިލްމީ ހުށަހެޅުއްވި އިމާރާތް ކުރުމުގެ ބިލްގައި ބުނެފައިވާ ފޮތުން ޢިމާރާތްކުރުމުގެ އެއްވެސް ހުއްދައެއް ނެތި އެއްވެސް ޢިމާރާތެއް ނުކުރެވޭނެއެވެ. އެފަދަ ކަމެއް ކޮށްފިނަމަ، ކަމުގެ ކުޑަ ބޮޑުމިނަށް ބަލައި އެފަރާތެއް 50،000 ރުފިޔާޢައި 1،000،000 މިލިއަން ރުފިޔާއާ ދެމެދު އަދަދަކުން ޖޫރިމަނާކުރެވޭނެކަމަށް ބިލުގައިވެއެވެ.

ހަމަ އެހެންމެ ހުއްދަ ހޯދުމަކާ ނުލާކުރާ މަސައްކަތެއް ހުއްޓާލުމަށް އެންގުމުން ވެސް އެ މަސައްކަތް ހުއްޓާނުލައި ކުރިޔަށް ގެންދާ ކޮންމެ ދުވަހަކަށް ޖޫރިމަނާކުރި ޢަދަދުގެ ތިނެއް އިންސައްތަ ޖޫރިމަނާކުރެވޭނެ ކަމަށް ބިލްގައި ކަނޑައަޅާފައިވެއެވެ.

މީގެ އިތުރުން ޢިމާރާތުގެ ކުރެހުން ފާސްކުރުމާއި ޢިމާރަތްކުރުމުގެ ހުއްދަ ބާތިލްކުރުމުގެ އުޞޫލްތަކެއް ކަނޑައަޅާފައިވެއެވެ.  ނުރައްކަލެއް ދިމާވެދާނެ ފަދަ ބިމެއްގައި ޢިމާރާތްކުރުމުގެ ޙުއްދަ ނުދިނުމާއި، އިމާރާތްކުރުމުގެ މަސައްކަތުގެ ފެންވަރު ބަލާ ފަރާތްތައް ޢައްޔަންކުރުމަށް ވެސް މިބިލްގައި ކަނޑައަޅުއްވާފައިވެއެވެ. އަދި ޢިމާރާތުގެ ސެކިއުރިޓީ ބެލެހެއްޓުންވެސް މި ބިލްގައި ލާޒިމްކޮށްފައިވެއެވެ.

ބިލްގައި ބުނެފައިވާ ގޮތުގައި އިމާރާތެއްގެ ނުވަތަ ތަނެއްގެ ވަރުފަރާތުން ނުވަތަ އެތަނެއް ބޭނުން ކުރާ ފަރާތުން އެ ތަނަކަށް ދޫކޮށްފައިވާ ހުއްދައެއާ ހިލާފަށް އެ ތަނެއް ނުވަތަ އެ ތަނުގެ ބައެއް ނެގުމަކީ ނުވަތަ ބަދަލު ކުރުމަކީ ނުވަތަ ބަންދު ކުރުމަކީ ނުވަތަ ހުރަހެއް ކުރިމަތިވާފަދަ ކަމެއް ކުރުމަކީ މަނާ ކަމަށެވެ. އެގޮތުން އެފަދަ ކަމެއް ކޮށްފި މީހަކު ކަމުގެ ކުޑަ ބޮޑުމިނަށް ބަލައި 5،000 ރ އާއި 1،000،000 ރ އާއި ދެމެދު އަދަދަކުން ޖޫރިމަނާ ކުރެވޭނެ ކަމަށް ބިލްގައި ބުނެފައިވެއެވެ.

އިމާރާތް ކުރުމުގެ ބިލްގައި ބުނެފައިވާ ގޮތުގައި އިމާރާތް ކުރުމުގެ އެއްވެސް މަސައްކަތެއް ކޮށްފައިވަނީ އިމާރާތް ކުރުމުގެ ގާނޫނާއި އެ ގާނޫނުގެ ދަށުން ހަދާފައިވާ ގަވާއިދުތަކާ ހިލާފަށް ކަމަށް އިމާރާތް ކުރުމުގެ ހުއްދަ ދޫކުރާ އިދާރާ އަށް ފެނިއްޖެ ހިނދެއްގައި އެ އިދާރާއަކުން މިނިސްޓްރީ އަށް އެ މައްސަލަ ހުށަހެޅުމަށް ފަހު މިނިސްޓްރީގެ ލަފާގެ މަތިން އަދި އިމާރާތް ކުރުމާބެހޭ އިދާރީ ގަވާއިދާ އެއްގޮތްވާ ގޮތުގެ މަތިން ގަވާއިދާ ހިލާފްވި ފަރާތްތަކާ މެދު ފިޔަވަޅު އެޅޭނެ ކަމަށް ބިލްގައި ބުނެފައިވެއެވެ. އެގޮތުން އެ ހިލާފްވާ ފަރާތެއް ކަމުގެ ކުޑަ ބޮޑު މިނަށް ބަލައި 15،000ރ އާއި 50،000 ރ އާއި ދެމެދު އަދަދަކުން ޖޫރިމަނާ ކުރެވޭނެ ކަމަށް ބިލްގައި ބުނެފައިވެއެވެ.

ސަރުކާރުގެ ފަރާތުން ހުށައެޅުއްވި މި ބިލްގައި، ހަތް މެމްބަރުންގެ މައްޗަށް އެކުލެވޭ މޯލްޑިވްސް ބިލްޑިންގ އެންޑް ކޮންސްޓްރަކްޝަން ބޯޑެއް އެކުލަވާލެއްވުމަށް ވަނީ ކަނޑައަޅުއްވާފައެވެ. އެއީ ހައުސިންގ މިނިސްޓަރ ކަނޑައަޅުއްވާ ދެ މެމްބަރުންނާއި، ޢިމާރާތްކުރުމުގެ ފަންނީ ލަފާދޭ ފަރާތްތައް ތަމްސީލްކުރާ ދެ މެމްބަރުންނާއި، ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތައް ތަމްސީލްކުރާ ފަރާތަކާއި، އަދި އެލްޖީއޭއިން ކަނޑައަޅާ މެމްބަރެކެވެ.

މި ޤާނޫނު ފާސްވާތާ ހަ މަސް ދުވަހުގެ ތެރޭގައި މި ބޯޑް ހައުސިންގ މިނިސްޓްރީން އުފައްދަވަންޖެހެއެވެ. އަދި މެމްބަރުންނަށް ގިނަ މަސްއޫލިއްޔަތުތަކެއް މި ބިލްގައި ޙަވާލުކުރައްވާފައިވެއެވެ.

ޢިމާރާތްކުރުމުގެ ބިލް ސަރުކާރުން ރައްޔިތުންގެ މަޖިލީހަށް ހުށައެޅުއްވީ، ޢިމާރާތްކުރުމުގެ މަސައްކަތަކީ، ރައްކާތެރި އުފެއްދުންތެރި އަދި ތިމާވެއްޓާ ރައްޓެހި މަސައްކަތަކަށް ހެއްދެވުމުގެ ބޭނުމުގައި ކަމަށް އެ ބިލްގައި ބުނެފައިވެއެވެ. އަދި ޢިމާރާތްކުރުމުގެ މަސައްކަތުގައި ޙަރަކާތްރެރިވާ ފަރާތްތަކަކީ ޤާބިލު، ފަންނުވެރި ބަޔަކަށް ހައްދަވައި ޢިމާރާތްކުރުމުގެ ސިނާޢަތު ތަރައްޤީކުރެއްވުންކަމަށް ބިލުގެ މަޤްޞަދުގައިވެއެވެ.