ސަރުކާރުގެ މުވައްޒަފުންނަށް މިމަހުގެ މުސާރަ ވެސް ދިނުމަށް ހަމަޖެހިފައި ވަނީ މިދިޔަ މެއި މަހުގެ 11 އިން ޖޫން 10 އަށް ކަމަށް ފިނޭންސް މިނިސްޓްރީން ހާމަކޮށްފި އެވެ.
ފިނޭންސް މިނިސްޓްރީން ބުނީ، މި ބަދަލު ގެނައުމަށް ނިންމާފައި ވަނީ، ފިތުރު އީދާ ދިމާކޮށް އަންނަ ބަންދުގެ ކުރިން ސަރުކާރު މުވައްޒަފުންނަށް މުސާރަ ދިނުމަށް ކަމަށެވެ. އެހެން ނަމަވެސް މުސާރަ ދިނުމުގައި އަމަލުކުރާ އާންމު އުސޫލަށް އެއްވެސް ބަދަލެއް އައިސްފާ ނުވާ ކަމަށް އެމިނިސްޓްރީން ބުނެ އެވެ. އާންމު އުސޫލުން މުސާރަ ދެނީ ކޮންމެ މަހެއްގެ 16 އިން 15 އަށެވެ.
މި މަހުގެ މުސާރަ ދިނުމުގައި އައިސްފައިވާ ބަދަލުތައް ސަރުކާރުގެ މުއައްސަސާތަކަށް ފިނޭންސް މިނިސްޓްރީން ވަނީ އަންގާފަ އެވެ.
މިމަހުގެ މުސާރަ ދިނުން އަވަސް ކުރުމުގެ ގޮތުން މުސާރަ ދިނުމުގައި އާއްމުކޮށް އަމަލުކުރާ އުސޫލު ނޫން އެހެން އުސޫލަކަށް އަމަލުކުރުމަށް ފިނޭންސް މިނިސްޓްރީން ނިންމާފަވާ އިރު، މިދިޔަ މަހުވެސް މުސާރަ ދިނީ 11 އިން 10 އަށެވެ. މިދިޔަ މަހު ރޯދަ އެލަވަންސާ އެކު މުސާރަ ދިނުމުގެ ބޭނުމުގައި، ސަރުކާރުން މުސާރަ ޝީޓް ތައްޔާރުކޮށްފައި ވަނީ، އޭޕްރީލް 16 އިން މެއި 10 އަށެވެ. މިކަމުގެ ސަަބަބުން، މިދިޔަ މަހު މުސާރަ ދީފައި ވަނީ، 25 ދުވަހަށެވެ. އެހެން ނަމަވެސް އެ ފަހަރު ރަމަޟާން މަހުގެ އެލަވަންސްއާ އެކު މުސާރަ ލިބުމުން މުސާރައިގައި ހުރި ތަފާތުތައް ގިނަ ބަޔަކަށް ފާހަގަ ކުރެވިފައެއް ނުވެ އެވެ.
މެއި މަހު މުސާރަ ދީފައި ވަނީ 25 ދުވަހަށް ކަމަށް ވުމުން އާންމު އުސޫލުން ނަމަ މި މަހު މުސާރަ ދޭ އިރު 35 ދުވަހަށް މުސާރަ ދޭންޖެހޭނެއެވެ. ނަމަވެސް މިދިޔަ މަހު ގެއްލުނު ފަސް ދުވަސް މި މަހުގެ މުސާރައިގައި ވެސް ނުހިމެނޭނެއެވެ.
