އިރާނުގައި ކޮވިޑް-19 ގެ ހާލަތު ރަނގަޅު ސަރަހައްދުތަކުގައި ހުރި މިސްކިތްތައް ހުޅުވާލަނީ
27 އެޕްރީލު 2020 | ހޯމަ 05:21ވައިރަސް ޖެހޭ މީހުންނާއި މަރުވާ މީހުން ފެންނަމުންދާ ގޮތުގެ މައްޗަށް ބަލާ ތިން ހިސާބަކަށް ބަހާލުމަށް ވަނީ ނިންމާފައި
އިރާން- ވިޔަފާރިކުރުމުގެ ފުރުސަތު ހުޅުވާލުމާއެކު މަގުތައް ފުރިފައި
އިރާނުގައި ގިނަ ދުވަސްތަކެއް ވަންދެން ކޮވިޑް-19 ށް ޕޮޒިޓިވް ވެފައިވާ މީހުން ނުފެންނަ ހިސާބުތަކުގައި ހުރި މިސްކިތްތައް ހުޅުވުމަށް ވިސްނަވަމުން ގެންދަވާ ކަމަށް އެގައުމުގެ ރައީސް ހަސަން ރޫހާނީ ވިދާޅުވެއްޖެ އެވެ.
މެދުއިރުމަތީގެ ގައުމުތަކުގެ ތެރެއިން އެންމެ ގިނަ އަދަދަކަށް ވައިރަސް ޖެހިގެން ރިޕޯޓްކުރަމުން އަންނަ އިރާނުގައި ވައިރަސް ޖެހޭ މީހުންނާއި މަރުވާ މީހުން ފެންނަމުންދާ ގޮތުގެ މައްޗަށް ބަލާ ތިން ހިސާބަކަށް ބަހާލުމަށް ވަނީ ނިންމާފަ އެވެ. އެގޮތުން ހުދު، ރީންދޫ އަދި ރަތްކުލަ އަށް މިސަރަހައްދުތައް ބަހާލާނެ އެވެ.
އެއަށްފަހު އެސަރަހައްދުތަކުގައި ހަރަކާތްތައް ހިންގަން ހުއްދަދޭނެ މިންވަރު ކަނޑައެޅޭނެ އެވެ. އެގޮތުން ގިނަ ދުވަސްތަކެއް ވަންދެން ވައިރަސް ޖެހޭ އަދި މަރުވާ މީހަކު ނުފެންނަ ހިސާބުތަކަކީ ހުދު ކުލަ އެވެ. އެފަދަ ހިސާބުތަކުގައި ހުރި މިސްކިތްތައް ހުޅުވާލާ ހުކުރު ނަމާދުކުރުމުގެ ފުރުސަތުދޭނެ ކަމަށް ރޫހާނީ ވިދާޅުވި އެވެ.
އަދި މިކުލަތައް ދީފައި ހުންނަ ސަރަހައްދުތަކުގެ ހާލަތަށް ބަލާ ކުލައަށް ބަދަލު އަންނާނެކަމަށާއި ނަމަވެސް މިކަން ތަންފީޒުކުރަން ފަށާނީ ކޮންއިރަކުން ކަމެއް ރޫހާނީ ހާމައެއް ނުކުރައްވަ އެވެ.
އިރާނުގެ ޑެޕިޔުޓީ ހެލްތު މިނިސްޓަރ އިރާޖް ހަރިރްޗީ އާދިއްތަ ދުވަހު އެގައުމުގެ ސްޓޭޓް ޓީވީ އަށް ދެއްވި އިންޓަރވިއުއެއްގައި ވިދާޅުވީ މިވަގުތުގެ ހާލަތަށް ބަލާއިރު 116 ސަރަހައްދެއް އެއީ ހުދު ކުލައިގެ ސަރަހައްދު ތަކުގެ ގޮތުގައި ބެލެވޭކަމަށެވެ. އަދި ރީންދޫ ކުލައިގެ 134 ސަރަހައްދެއް ފާހަގަވާކަމަށް އިރާޖް ވިދާޅުވި އެވެ.
ފާއިތުވި 24 ގަޑިއިރު ތެރޭގައި އިރާނުގައި މަރުވެފައިވަނީ 60 މީހުންނެވެ. މިހާތަނަށް އައިއިރު އިރާނުގައި 5710 މީހުން ވައިރަސް ޖެހިގެން މަރުވެފައިވާއިރު 90،481 މީހުންނަށް ވަނީ ވައިރަސް ޖެހިފަ އެވެ.
ގައުމުގެ އާންމު ސިއްހީ ނިޒާމު ރައްކާތެރި ކުރުމަށް އަޅާ ފިޔަވަޅުތަކުގެ ސަބަބުން ގައުމުގެ އިގްތިޞާދަށް ނޭދެވޭ އަސަރު ތަކެއްކޮށްފާނެތީ އެގައުމުން ވަނީ ފިޔަވަޅުތަކެއް އަޅާފަ އެވެ. އެގޮތުން އެހެން ގައުމުތަކުގައި ހޯލްސޭލް ވިޔަފާރިތަކަށް ގެންނަ ފަދަ ހުއްޓުމެއް ނުގެނެސް އެވިޔަފާރިތައް ކުރިޔަށް ގެންދިޔުމަށް އިރާނުގެ ސަރުކާރުން ވަނީ މަސައްކަތްކޮށްފަ އެވެ.
އެހެންނަމަވެސް އިރާނުގައިވެސް ވަނީ ސްކޫލްތަކާއި ޔުނިވަރސިޓީތަކާއި ދީނީ އަދި ޘަގާފީ ހަރަކާތްތަކާއި ކުޅިވަރު ކުޅުން މެދުކަނޑާލާފަ އެވެ.
އިރާނުގެ ފޮރިން މިނިސްޓަރ މުހައްމަދު ޖަވާދް ޒާރިފް ވަނީ ޔުނައިޓެޑް އަރަބް އެމިރޭޓްސް ގެ ފޮރިން މިނިސްޓަރ އަބްދުﷲ ބިން ޒައިދް އަލް ނަހްޔާން އާ އާދިއްތަ ދުވަހު ފޯނުން ގުޅުއްވާ ކޮވިޑް-19 އިން ރައްކާތެރިވުމަށް އެޅިދާނެ ފިޔަވަޅުތަކާއި ސަރަހައްދުގެ ކުރިއެރުމަށް ކުރެވޭނެ މަސައްކަތްތަކާއި ގުޅޭގޮތުން މަޝްވަރާކުރައްވާފަ އެވެ.
