ކާގޯ ފްލައިޓްތަކުން މުދާ ގެންނަން ބޭނުންވާ ފަރާތްތަކުން ނަންނޯޓްކުރުމަށް ފުވައްމުލައް ސިޓީ ކައުންސިލުން އެދެފި
26 އެޕްރީލު 2020 | އާދީއްތަ 21:11މުދާ ގެނެވޭނީ ނަން ނޯޓުކުރާ ތަރުތީބުން
މޯލްޑިވިއަން ފްލައިޓް ޑޮމެސްޓިކް ޓާރމިނަލްއެއްގައި ޖައްސަނީ
ފުވައްމުލަކާއި މާލެއާއި ދެމެދު ދަތުރުކުރުމަށް ހަމަޖެހިފައިވާ ކާގޯ ފްލައިޓްތަކުން މުދާ ގެންނަން ނުވަތަ ފޮނުވުމަށް ބޭނުންވާ ފަރާތްތަކުން ނަންނޯޓްކުރުމަށް ފުވައްމުލައް ސިޓީ ކައުންސިލުން އެދެފި އެވެ.
މިކަމާއި ގުޅިގެން ކައުންސިލުން ނެރެފައިވާ އިއުލާނެއްގައި ބުނެފައިވަނީ، މޯލްޑިވިއަން އިން ފުވައްމުލަކު ސިޓީއަށް ހަފްތާއަކު އެއްފަހަރު ކާގޯ ފްލައިޓެއް ދަތުރުކުރުމަށް ހަމަޖެހިފައިވާކަމަށާއި މި ފްލައިޓްތަކުން ކާގޯގެ ޚިދުމަތް ދިނުމަށް ހަމަޖެހިފައިވަނީ ނަން ނޯޓުކުރާ ތަރުތީބުންކަމަށެވެ.
ނަމަވެސް، މުދާ ގެނައުމަށް ނުވަތަ ފޮނުވުމަށް ބޭނުންވާ ފަރާތްތަކުގެ ތެރެއިން ފުރާނަ ސަލާމަތްކުރުމަށް ބޭނުންވާ ސާމާނާއި، އަސާސީ ތަކެތި ފޮނުވުމަށްއެދޭ ފަރާތްތަކަށް އިސްކަންދެވޭނެކަމަށް ކައުންސިލުން ވަނީ ބުނެފަ އެވެ.
އެގޮތުން، މިފްލައިޓްތަކުން މުދާ ގެނައުމަށް ނުވަތަ ފޮނުވުމަށް ބޭނުންވާ ފަރާތްތަކުން ކޮންމެ ދުވަހެއްގެ ހެނދުނު 10:00 އިން ހަވީރު 05:30އަށް އަދި ރޭގަނޑު 07:00 އިން 12:00 އަށް 6865001 އަށް ގުޅުއްވައިނަންނޯޓް ކުރެއްވުމަށް ކައުންސިލުން ވަނީ އިލްތިމާސްކޮށްފަ އެވެ.
