މަސްދުވަސް ފަހުން އިޓަލީގައި އެންމެ މަދުން ކޮވިޑް-19 ޖެހިގެން އަދި މަރުވެގެން ރިޕޯޓްކުރީ ހޮނިހިރު ދުވަހު
ހޮނިހިރު ދުވަހު މަރުވެފައިވަނީ 415 މީހުން
އިޓަލީގެ މަގެއްގެ މަތީގައި މީހަކު މާސްކު އަޅައިގެން ހިނގާފައި ދަނީ
ދުނިޔޭގައި މިވަގުތު ހަލުވިކަމާއެކު ފެތުރެމުންދާ ކޮވިޑް-19 ތިން ވަނަ އަށް އެންމެ ހަލުވި މިނުގައި ފެތުރެމުންދާ އަދި ދެ ވަނަ އަށް އެންމެ ގިނަ މީހުން މަރުވަމުން އަންނަ އިޓަލީގައި އެއަދަދުތައް ހޮނިހިރު ދުވަހު މަސް ދުވަހަށްފަހު ދަށަށްގޮސްފި އެވެ.
އިޓަލީގެ ސިވިލް ޕްރޮޓެކްޝަން އެޖެންސީން ބުނެފައިވަނީ މަރޗް މަހުގެ 17 ވަނަ ދުވަހުން ފެށިގެން މިއަދާ ހަމައަށް އައިއިރު ހޮނިހިރު ދުވަހުގެ އަދަދުތައް ވަނީ ދަށަށްގޮސްފައި ކަމަށެވެ. އެގޮތުން ހޮނިހިރު ދުވަހު މަރުވެފައިވަނީ 415 މީހުންނެވެ. ހުކުރު ދުވަހު ކޮވިޑް-19 ޖެހިގެން މަރުވެފައިވަނީ 420 މީހުންނެވެ.
މީގެއިތުރުން އަލަށް ވައިރަސް ޖެހުނު މީހުންގެ އަދަދު ފާއިތުވި ފަސް ދުވަހު ދަށަށްދާން ފަށާފައިވާއިރު ހޮނިހިރު ދުވަހު އެ އަދަދުތައް ވަނީ ދެހާހުން ދަށަށްގޮސްފަ އެވެ. ހުކުރު ދުވަހު އަލަށް ވައިރަސް ޖެހިގެން ރިޕޯޓްކޮށްފައިވަނީ 3021 މީހުންނެވެ. ހޮނިހިރު ދުވަހު އަލަށް ވައިރަސް ޖެހިފައިވަނީ 2357 މީހުންނަށެވެ.
ފެބްރުއަރީ މަހުގެ 21 ވަނަ ދުވަހު އިޓަލީން ފުރަތަމަ ފަހަރަށް ވައިރަސް ޖެހިފައިވާ މީހަކު ފެނިފައިވާއިރު މިހާތަނަށް އައިއިރު 26,384 މީހުން ވަނީ މިވައިރަސް ޖެހިގެން މަރުވެފަ އެވެ. އިޓަލީއަކީ އެމެރިކާ ނެގުމަށްފަހު އެންމެ ގިނަ އަދަދެއްގެ ބަޔަކު މަރުވަމުންދާ ގައުމެވެ. އިޓަލީގައި ވައިރަސް ޖެހިފައިވާ މީހުންގެ އަދަދަކީ 195,351 އެވެ.
މިވަގުތު ވައިރަސް ޖެހިގެން އިޓަލީގައި ރިޕޯޓް ކުރަމުންދާ އަދަދުތައްވެސް ވަނީ ދަށަށްދާން ފަށާފަ އެވެ. އެކްޓިވް ކޭސްތައް ހުކުރު ދުވަހު ހުރީ 106،527 ގަ އެވެ. އެއަދަދު ހޮނިހިރު ދުވަހު ވަނީ 105،847 ށް ދަށަށްގޮސްފަ އެވެ. މިއީ މިއަދަދުތައް ޖެހިޖެހިގެން ދަށަށްދާ ހަވަނަ ދުވަހެވެ.
ހޮނިހިރު ދުވަހު އިޓަލީގެ އައިސީޔޫ ތަކުގައި ފަރުވާދެމުން ގޮސްފައިވަނީ 2102 މީހުންނަށެވެ. ހުކުރު ދުވަހު އައިސީޔޫ ތަކުގައި ފަރުވާ ދެމުން ގޮސްފައިވަނީ 2173 މީހުންނަށެވެ. އަދި ބަލިން ރަނގަޅުވާ މީހުންގެ އަދަދުތައްވެސް ވަނީ ހޮނިހިރު ދުވަހު މައްޗަށް ގޮސްފަ އެވެ. އެގޮތުން ހުކުރު ދުވަހު ރަނގަޅުވި މީހުންގެ އަދަދު ހުރީ 60،498 ގަ އެވެ. އެއަދަދު ހޮނިހިރު ދުވަހު ވަނީ 63،120 މީހުންނަށް އިތުރުވެފަ އެވެ.
އިޓަލީގެ ސިވިލް ޕްރޮޓެކްޝަން އެޖެންސީން ބުނާގޮތުގައި 1.1187 މިލިއަން މީހުން އިޓަލީގައި ވަނީ މިހާތަނަށް އައިއިރު ވައިރަސް އަށް ޓެސްޓްކޮށްފަ އެވެ. އިޓަލީގެ އާބާދީއަކީ 60 މިލިއަނެވެ.
