އުތުރު ކޮރެއާ މައްސަލާގައި ހިމެނޭ ހުރިހާ ފަރާތްތައް ހަމަޖެހިގެން ތިބުމަށް ރަޝިޔާ އިން ގޮވާލައިފި
9 އޮކްޓޯބަރު 2017 | ހޯމަ 17:11އެމެރިކާ އާއި އުތުރު ކޮރެއާގެ ގުޅުން ވަނީ ވަރަށް ބޮޑަށް ގޯސްވެފައި
އުތުރު ކޮރެއާ އިން ދަނީ ތަކުރާރުކޮށް މިސައިލް ޓެސްޓްތައް ކުރަމުން
އުތުރު ކޮރެއާ މައްސަލާގައި ހިމެނޭ ހުރިހާ ފަރާތްތައް ހަމަަޖެހުމަށް ރަޝިއާ އިން ގޮވާލައިފިއެވެ.
ރަޝިއާ އިން ހޯމަ ދުވަހު މިހެން ގޮވާލާފައިވާއިރު ދާދިފަހުން އެެމެރިކާގެ ރައީސް ޑޮނަލްޑް ޓްރަމްޕް އުުތުރު ކޮރެއާ އާ ބެހޭ ގޮތުން ވިދާޅުވީ އުތުރު ކޮރެއާ އާއި ޑީލް ކުރުމުގައި "މަސައްކަތް ކުރާނީ އެންމެ ގޮތެއް ކަމަށެވެ." ރިޕޯޓުތައް ބުނާ ގޮތުން ރައީސް ޓްރަމްޕް އެ އިޝާރާތް ކުރައް ވަނީ އުތުރު ކޮރެއާއާ މެދު އަސްކަރީ ފިޔަވަޅު އެޅުމުގެ ވާހަކައެވެ.
ރަޝިއާ ސަރުކާރުގެ ތަރުޖަމާނު ހޯމަ ދުވަހު ނޫސްވެރިންނަށް ވިދާޅުވީ އުތުރު ކޮރެއާ މައްސަލާގައި ހިމެނޭ ހުރިހާ ފަރާތްތަކުން ވެސް ހަމަޖެހިގެން ކަންކަން ކުރުމަށް އަބަދުވެސް ރަޝިއާ އިން ގޮވާލާ ކަމަށާއި އަދި އުތުރު ކޮރެއާގެ މައްސަލާގައި ނުހިމެނޭ ފަރާތްތައް ވެސް ހަމަޖެހިގެން ތިބުމަށް ގޮވާލާ އަދި ކަންކަން ގޯސްވާނެ އެއްވެސް ކަމެއް ނުކުރުމަށް ހުރިހާ ފަރާތްތަކަށް ވެސް ގޮވާލާ ކަމަށެވެ.
ރައީސް ޓްރަމްޕް ވަނީ ތަކުރާރުކޮށް އުތުރު ކޮރެއާއާ މަޝްވަރާ ކުރުމަށް ޝައުގުވެރިކަން ނެތްކަން ފާޅުކުރައްވާފައެވެ.
ބައިނަލްއަގްވާމީ ދުނިޔެއިން ތަކުރާރުކޮށް އުުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. އުތުރު ކޮރެއާގެ އަމަލުތަކާ ހެދި ބައިނަލްއަގްވާމީ ދުނިޔެ އާއި އެގައުމާ މެދު ވަނީ ވަރަށް ބޮޑަށް ނުތަނަވަސްކަން އުފެދިފައެވެ.
