ކޮވިޑް-19 ދެވަނަ ފަހަރަށް ނުޖެހޭނެކަމަށް ދެކިގެން ނުވާނެ: ޑަބްލިއުއެޗްއޯ

ކޮވިޑް-19 ގެ ބަލިމަޑުކަމަކީ އެއްފަހަރު ޖެހޭ ބައްޔެއްކަމަށް ދެކިގެން ނުވާނެ ކަމަށް ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)އިން ބުނެފިއެވެ.

ބައެއް ޤައުމުތަކުން ބަލި ޖެހިފައި ތިބޭ މީހުންނަށް "އިމިއުނިޓީ ޕާސްޕޯޓް" ގެ ނަމުގައި އަލުން އަނބުރާ ވަޒީފާއަށާއި މުޖުތަމަތު ތެރެއަށް ނުކުމެ އުޅުމުގެ ހުއްދަ ދެމުން ގެންދާތީ، ދުނިޔޭގެ ސިއްޙަތު ޖަމިއްޔާއިން ވަނީ އެކަމާ ކަންބޮޑުވުން ފާޅުކޮށްފައެވެ. އެގޮތުން އެ ޖަމިއްޔާއިން ހާމަކުރި ފަހުގެ ގައިޑްލައިނެއްގައި ބުނެފައިވާ ގޮތުން، ބަލި ޖެހިފައި ތިބޭ މީހުންނަކީ ދެވަނަ ފަހަރަށް ކޮވިޑް-19 ނުޖެހޭނެ ބައެއްކަން މިހާތަނަށް ކަށަވަރުވެފައެއް ނުވެއެވެ.

އެގޮތުން އިރުމަތީ އޭޝިއާގެ ބައެއް ޤައުމުތަކުގައިވެސް، ބަލި ޖެހިގެން ރަނގަޅުވާ މީހުންނަށް ދެވަނަ ފަހަރަށް ބަލި ޖެހިފައިވާކަން ހާމަވެފައިވާކަން އެ ޖަމިއްޔާއިން ފާހަގަކޮށްފައިވެއެވެ.

ދުނިޔޭގެ ސިއްޙަތު ޖަމިއްޔާއިން އެހެން ބުނެފައިވާއިރު، އިނގިރޭސިވިލާތާއި، ޖަރމަނީގެ އިތުރުން ޗިލީ ފަދަ ޤައުމުތަކުގެ ސިއްޙަތާބެހޭ ވަޒީރުން ވަނީ ކޮވިޑް-19 ބަލި ޖެހިގެން ރަނގަޅުވާ މީހުންނަށް އިމިއުނިޓީ ޕާސްޕޯޓް ދިނުމުގެ ވިސްނުން ގެންގުޅުއްވާކަމަށް ވިދާޅުވެފައެވެ. އަދި އިމިއުނިޓީ ލިބޭ ފަރާތްތައް ބޭރުތެރޭގައި އުޅުމާއި، ލޮކްޑައުންގެ ވަގުތުގައިވެސް ބޭރަށް ދިއުން ހުއްދަ ވުމުގެ އިތުރުން، އިޖުތިމާއީ ގައިދުރުކަން ފަދަ ކަންކަމުގައި ގެންގުޅޭ ހަރުކަށި އުސޫލުތަކުން އިސްތިސްނާވާނެއެވެ.

ނަމަވެސް ދުނިޔޭގެ ސިއްޙަތު ޖަމިއްޔާގެ އިތުރުން، ސިއްޙަތާބެހޭ ތަޖުރިބާކާރުންވެސް ދަނީ އެއީ އެންމެ ރަނގަޅު ފިޔަވަޅެއް ނޫންކަމުގައި ބުނަމުންނެވެ.

އެގޮތުން ބުދަ ދުވަހު ބޭއްވި ނޫސްކޮންފަރެންސެއްގައި ޑަބްލިއުއެޗްއޯ ގެ ޗީފް، ޓެޑްރޯސް އަދަނޯމް ގެބްރިއާސިސްވެސް ވަނީ މި ދަނޑިވަޅުގައި އެއްވެސް ޤައުމަކުން ފަރުވާކުޑަ ކޮށްގެން ނުވާނެ ކަމަށާއި، މި ވައިރަސްގެ ނުރައްކާ އަދި ގިނަ ދުވަސްތަކެއް ވަންދެން ދެމި އޮންނާނެ ކަމަށް ލަފާ ކުރެވޭ ކަމަށް ވިދާޅުވެފައެވެ.

ޓެޑްރޯސް ވިދާޅުވީ، ވައިރަސް ފެތުރުން ކޮންޓްރޯލް ކުރުމަށް ޤައުމުތަކުން އަޅަމުންދާ ރައްކާތެރިކަމުގެ ފިޔަވަޅުތަކުގެ ރަނގަޅު ނަތީޖާ ފެންނަމުންދާ ކަމަށާއި، ޚާއްސަކޮށް އިޖުތިމާއީ ގައިދުރުކަން (ސޯޝަލް ޑިސްޓެންސިންގ) އަދި ފުރަބަންދު (ލޮކްޑައުން) ފަދަ ފިޔަވަޅުތަކުގެ ރަނގަޅު އަސަރު ބައެއް ޤައުމުތަކުން ފެންނަމުންދާ ކަމަށެވެ. އަދި އެއާއެކުވެސް މި ވައިރަސްގެ ނުރައްކާ ނުހަނު ބޮޑުކަން ޓެޑްރޯސް ފާހަގަކުރެއްވިއެވެ.

މުޅި ދުނިޔެއިން ކޮވިޑް-19 ޖެހުނު މީހުންގެ އަދަދު 3 މިލިއަނަށް އަރަން ކައިރިވެފައިވާއިރު، މަރުވި މީހުންގެ އަދަދު ވަނީ 203،000ށް ވުރެ އިތުރުވެފައެވެ. ދުނިޔޭގެ 215 ސަރަޙައްދަކުން މި ވައިރަސް ފެނިފައިވާއިރު، އެމެރިކާއާއި ޔޫރަޕްގެ ބައެއް ޤައުމުތަކުގެ އިތުރުން، އިނގިރޭސިވިލާތުން ގިނަ އަދަދެއްގެ ބަޔަކު ވައިރަސްއަށް ޕޮޒިޓިވްވެފައިވެއެވެ.