ގަލްފުގައި އުފެދިފައިވާ ޑިޕްލޮމެޓިކް މައިގަނޑު މައްސަލައިގައި ގަތަރުގެ އަމީރާ ސައުދީގެ ވަލީއަހުދު ފޯނުން ގުޅުއްވާ މަޝްވަރާކުރެއްވި ކަމަށް ބުނާ ރިޕޯޓްތައް އާއްމުވުމާއެކު ގަތަރާއެކު ބޭއްވުމަށް ސައުދީން ރާވާފައިވާ މަޝްވަރާތައް ހުއްޓާލައިފިއެވެ.

ގަތަރުގެ އަމީރު ޝެއިޚް ތަމީމް ބިން ހަމަދް އަލް ޘާނީ ސައުދީގެ ވަލީއަހުދު މުހައްމަދު ބިން ސަަލްމާންއަށް ހުކުރު ދުވަހު ފޯނުން ގުޅުއްވާ ދެއްކެވި ވާހަކަ ތަކަކީ މީގެ ތިން މަސް ކުރިން ފެށުނު ގަތަރުގެ މައްސަލަައިގައި  ދޯހާ އާ ރިޔާޒްއާ ދެމެދު ރަސްމީ މުއާމަލާތެއް މިގޮތަށް ކުރެވުނު ފުރަތަމަ ފަހަރެވެ.

ދެ ގައުމުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި ދެ ގައުމުގެ ލީޑަރުންވެސް ވަނީ ޚިލާފް ނައްތާލައި މައްސަލަ ނިމުމަކަށް ގެންނަން ބޭނުންވެފައިކަމަށް ހާމަކުރައްވާފައެވެ.

މި ފޯން ކޯލަށް އިސްނަގާފައިވާ ގައުމަކާ ބެހޭގޮތުން ކޮންމެވެސް ވަރެއްގެ ޚިލާފުތަކެއްވަނީ އުފެދިފައެވެ. ޤަތަރު ނޫސް އޭޖެންސީގެ ރިޕޯޓްގައި މި ކޯލަށް އިސްނެގީ ދޯހާއިންކަން  ބުނެފައެއް ނުވެއެވެ.

އެ ގައުމުގެ ރިޕޯޓްގައި ބުނެފައިވަނީ ދެ ގައުމުން ފޯނުން ކުރިޔަށް ގެންދިޔަ މަޝްވަރާތައް އިންތިޒާމު ކޮށްދެއްވީ އެމެރިކާގެ ރައީސް ޑޮނަލްޑް ޓްރަމްޕް ކަމަށެވެ.

ގަތަރު ނިއުސް އޭޖެންސީ(ކިއުއެންއޭ)އިން ރިޕޯޓްކޮށްފައިވާ ގޮތުގައި ޝެއިޚް ތަމީމް ބިން ސަލްމާން ވަނީ ގަލްފް ކޯޕަރޭޝަން ކައުންސިލް(ޖީސީސީ)ގެ ބަދަހި ކަމާއި ހަމަޖެހުމަށްޓަކައި މަޝްވަރާގެ ތެރެއިން މައްސަލަ  ހައްލުކުރައްްވަން ބޭނުންފުޅުވާކަން ހާމަކުރައްވާފައެވެ.

ގަތަރުގެ ނޫސް އެޖެންސީން ބުނެފައިވާ ގޮތުގައި ސައުދީގެ ވަލީއަހުދު ހުށަހެޅުއްވި ގޮތަށް މައްސަލަ ހައްލުކުރުމަށްޓަކައި، ދެ ގައުމުގެ އިސްތިގުލާލަށް އަސަރު ނުކުރާނެ ގޮތަށް ދެ މަންދޫބަކު ހަމަޖެއްސުމަށް އަމީރު ވަނީ އެއްބަސްވެ ވަޑައިގެންފައެވެ.

ޖޫން މަހުގެ 5 ވަނަ ދުވަހު ސައުދީ އަރަބިއްޔާއާއި ޔުނައިޓެޑް އަރަބް އެމިރޭޓްސްއާ، މިސްރާއި،ބަހްރެއިންއިން ވަނީ ގަތަރާއެކު އޮންނަ ޑިޕްލޮމެޓިކް ގުޅުމާއި ދަތުރުފަތުގެ ގުޅުން ކަނޑާލައި އެ ގައުމަށް ދަތިކުރުމުގެ ފިޔަވަޅު އަޅާފައެވެ.

އެ ގައުމުތަކުންވަނީ ގަތަރުން ޓެރެރިޒމަށް ފަންޑުކުރާ ކަމަށް ތުހުމަތުކޮށްފައެވެ. ގަތަރުންވަނީ އެ ފިޔަވަޅުތައް ދޮގުކޮށްފައެވެ.

ގަތަރާމެދު ފިޔަވަޅު އެޅި ގައުމުތަކުން ޖޫން މަހުގެ 22 ވަނަ ދުވަހުވަނީ 13 ނުކުތާއެއްގެ މައްޗަށް ހިމެނޭ ޑިމާންޑްތަކެއް ގަތަރަށް ހުށަހަޅާފައެވެ. އޭގެ ތެރޭގައި އަލްޖަޒީރާ ބަންދުކުރުމާއި އީރާނާ ގުޅުން ކަނޑާލުންވެސް ހިމެނޭއިރު ގަތަރުންވަނީ އެ ޑިމާންޑްތަކަށް ދެކޮޅުހަދާފައެވެ.