މޭ މަހުގެ ތިނަކުން ފެށިގެން ދަމަނަވެށިން ވެކްސިން ޖެހޭނެ އިންތިޒާމް ހަމަޖައްސައިފި
ވެކްސިން ދޭން ހަމަޖެހިފައިވަނީ އެޕޮއިންޓްމެންޓުގެ އުސޫލުން
ކުއްޖަކަށް ވެކްސިން ޖަހަނީ
ކޮވިޑް-19 އާއި ގުޅިގެން ވެކްސިން ދިނުން ވަގުތީ ގޮތުން ހުއްޓާލާފައިވިޔަސް، މޭ މަހުގެ ތިން ވަނަ ދުވަހުން ފެށިގެން ވެކްސިން ދޭނެ އިންތިޒާމު ދަމަނަވެށިން ހަމަޖައްސައިފި އެވެ.
ދަމަނަވަށިގެން ނެރެފައިވާ ބަޔާނެއްގައި ބުނީ، 18 އަހަރުން ދަށުގެ ކުދިންނަށް ކޮންމެހެން ދޭންޖެހޭ ވެކްސިންތަކުގެ ތެރެއިން ގައުމީ ވެކްސިން ޝެޑިއުލްގައި ހިމެނޭ ވެކްސިންތައް ދިނުމަށް މޭ މަހުގެ ތިންވަނަ ދުވަހުން ފެށިގެން އޮފީސް ހުޅުވުމަށް ވަނީ ނިންމާފަ އެވެ. އެގޮތުން ވެކްސިންޖެހުމުގެ ހިދުމަތް ދިނުމަށް ހަމަޖެހިފައިވަނީ އެޕޮއިންޓްމަންޓް އުސޫލުން ކަމަށް ދަމަނަވެށިން ބުންޏެވެ.
އެޕޮއިންޓްމަންޓް ދޫކުރަން ހަމަޖެހިފައިވަނީ ހުކުރު އަދި ހޮނިހިރު ފިޔަވާ ކޮންމެ ދުވަހަކު ހެނދުނު ދިހަޔަކުން މެންދުރު އެކަކަށް ކަމަށެވެ.
އެޕޮއިންޓްމަންޓް ދޫކުރާއިރު، ކުއްޖާގެ ނަމާއި، އުފަން ތާރީހު، އެންމެ ފަހުން ވެކްސިން ޖެހި ތާރިހު، ޖެހި ވެކްސިންގެ ނަން ކުއްޖާގެ އެޑްރެސް އަދި ކުއްޖާ މިވަގުތު ދިރިއުޅޭ ގެއަކީ މޮނީޓަރިންގެ ހާލަތުގައި ހުރި ގެއެއްތޯ ނުވަތަ ނޫންތޯ ބުނެދޭން ޖެހޭ ކަމަށް ދަމަނަވެށިން ނެރުނު ބަޔާނުގައި ބުންޏެވެ.
ހަމައެކަނި ފަނިބޭސް އަދި ވިޓަމިން ދޭން ޖެހޭ އުމުރުން ހަ އަހަރުން ދަށުގެ ކުދިންނަށް ބޭސް އަދި ވިޓަމިން އޭ ދޫކުރުމަށް ހަމަޖެހިފައިވަނީ ބަންދު ނޫން ކޮންމެ ދުވަހަކު ހެނދުނު ދިހައަކުން މެންދުރު އެކަކަަށް ދަމަނަ ވެށިންނެވެ.
ފަނިބޭސް އަދި ވިޓަމިން ދޫކުރުމަށް ހަމަޖެހިފައިވަނީ ކުއްޖާގެ ވެކްސިން ފޮތް ހިފައިގެން ހަމައެކަނި ބެލެނިވެރިޔާ ދިޔުމުން ކަމަށް ދަމަނަވެށިން ބުންޏެވެ.
