ސައުދީގައި ހައްދުޖެހުން ހުއްޓާލައިފި
25 އެޕްރީލު 2020 | ހޮނިހިރު 19:27ސައުދީގައި ހައްދުން ޖެހުން ހުއްޓާލަން ނިންމުމުން ގިނަ ބަޔަކު ވަނީ ތައުރީފުކޮށްފައި
ސައުދީ ދިދަ
ސައުދީ އަރަބިއާ ގައި ހައްދު ޖެހުން ހުއްޓާލައިފި ކަމަށް އެ ގައުމުގެ މީޑިއާތަކުން ރިޕޯޓްކޮށްފި އެވެ.
މީޑިއާތަކުން ރިޕޯޓްތައް ބުނާ ގޮތުން ސައުދީގެ ސުޕްރީމް ކޯޓުުން ހައްދު ޖެހުމުގެ ބަދަލުގައި އަދަބެއްގެ ގޮތުގައި ކަނޑައަޅާފައިވަނީ ޖޫރިމަނާ ކުރުން ނުވަތަ އުމުރަށް ޖަލަށްލުމަށެވެ.
ހައްދު ޖެހުމަކީ ތަފާތު އެކިއެކު ކުށްތަކާއި ގުޅިގެން ސައުދީގައި ދެވޭ އަދަބެކެވެ. ހާއްސަކޮށް ކައިވެނިން ބޭރުގައި ޖިންސީ ގުޅުން ހިންގާ ފަރާތްތަކަށް އަދަބުދޭން ހައްދު ޖަހަ އެވެ. ކުށްކުރާ މީހުންނަށް ދެވޭ އަދަބުގެ ކުޑަ ބޮޑުމިނަކީ، ހުކުމް އިއްވަން ހުންނަ ގާޒީއެއްގެ އަތް މަތީގައި އޮންނަ ކަމެކެވެ.
އިންސާނީ ހައްގުތަކަށް މަސައްކަތްކުރާ ފަރާތްތަކުން ވަނީ ސައުދީގެ މި ނިންމުމަށް މަރުހަބާ ކިޔާފަ އެވެ. އަދި މި ނިންމުމަށް މަރުހަބާ ކިއުމާއެކު، އެހެން ކަންކަމުގައި ވެސް ލުއި ދިނުމަށް އެ ފަރާތްތަކުން ވަނީ ގޮވާލާފަ އެވެ. ހާއްސަކޮށް ހިޔާލު ފާޅުކުރުމުގެ މިނިވަންކަމަށް އޮތް ހުރަސްތައް ނައްތާލުމަށް ވަނީ ގޮވާލާފަ އެވެ.
