މާެލެއިން ކޮވިޑް-19 ގެ ކޭސްތަކެއް ފެނުމާއި ގުޅިގެން ލޮކްޑައުންކޮށްފައިވާއިރު މި ވައިރަހުގެ ހަގީގީ ޕީކަކަށް ދާނީ ލޮކްޑައުން މުއްދަތަށް ފަހު ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ން ބުނެފިއެވެ.

ހޮނިހިރު ދުވަހުގެ ރޭ ދަރުބާރުގޭގައި އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ ލޮކްޑައުންކޮށްފައިވާ މުއްދަތުގައި "ޓްރޫ" ޕީކަކަށް ދިއުމުގެ ފުރުސަތު ވަރަށް ކުޑަވާނެ ކަމަށެވެ. އަދި ޕީކަކަށް ދެވެނީ ސަލާމަތީގޮތުން ނަގަންޖެހޭ ފިޔަވަޅުތައް އެޅުމަށްފަހު ލޮކްޑައުން ނިމުމުން ކަމަށެވެ.

ޑރ. ވިދާޅުވީ މިހާރު އަޅާފައިވާ ފިޔަވަޅުތަކުގެ ސަބަބުންވެސް ގުދު ފަތުކުރެވިދާނެ ކަމަށެވެ. އެހެންނަމަވެސް ލޮކްޑައުން ހާލަތުގައި ޕީކަކަށް ދިއުމުގެ ފުރުސަތު ކުޑަވާނެ ކަމަށެވެ.

ރާއްޖޭގައި މުޖުތަމައުގެ ތެރޭގައި ބަލި ފެތުރިއްޖެނަމަ ޖުމުލަކޮށް މާލެ ސަރަޙައްދުން 46،627 އަށްވުރެ ގިނަ މީހުންނަށް ބަލި ޖެހޭނެ ކަމަށް އެޗްޕީއޭއިން ރާއްޖޭގެ ޙާލަތާ ގުޅޭގޮތުން ތައްޔާރުކޮށްފައިވާ ރިޕޯޓުގައި ލަފާކޮށްފައިވެ އެވެ.

އަތޮޅުތަކުން 51،874 މީހުން ބައްޔަށް ޕޮޒިޓިވްވާނެކަމަށް ބެލެވޭއިރު، ޖުމްލަ 98،501 މީހުންނަށް ކޮވިޑް-19 ޖެހެނޭކަމަށް ބެލެވެ އެވެ. އެގޮތުން އެއްވެސް ފިޔަވަޅެއް ނާޅައިފި ނަމަ ގާތްގަނޑަކަށް ދުވާލެއްގެ މައްޗަށް އިތުރަށް އެތައް ބަޔަކު ވައިރަސް އަށް ޕޮޒިޓިވްވާނެ ކަމަށްވެސް ރިޕޯޓުގައިވެ އެވެ.