ކޮވިޑް-19 އާއެކު އެހެން ރޯގާތައްވެސް އަންނާނެކަމަށް ބަލައި ފިޔަވަޅުތައް އެޅުމަށް އިލްތިމާސްކޮށްފި

މިދުވަސްވަރަކީ ވިއްސާރަ މޫސުމަށްވެފައި މަދިރިން ސަލާމަތް ވުމަށް ޚާއްސަ ސަމާލުކަމެއް ހުރިހާ ފަރާތްތަކަކުން ވެސް ދޭންޖެހޭނެ ކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ވިދާޅުވެއްޖެ އެވެ.

ކޮވިޑް-19 އާ ގުޅިގެން އެންމެ ފަހުގެ މައުލޫމާތުތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މައިމޫނާ ވިދާޅުވީ ވިއްސާރަ މޫސުމާ ދިމާކޮށް އަބަދުވެސް އިރުޝާދު ދެމުން އަންނަނީ ޑެންގީ ފަދަ ބަލިތައް އަންނާތީ އެކަމަށް ޚާއްސަ ސަމާލުކަމެއް ހުރިހާ އެންމެންވެސް ދިނުމަށްކަމަށެވެ. އިންފެލެއަންޒާ އަށްވެސް މިހާރު އަލާމާތްތައް ފެނުމާއެކީގައި ޓެސްޓްތައް ކުރެވެމުންދާކަމަށް މައިމޫނާ ވިދާޅުވި އެވެ. އަދި ޑެންގޫއަށް މިދުވަސްވަރު ޚާއްސަ ސަމާލުކަމެއް ދޭންޖެހޭ ހާލަތަށް އައިސްފައިވާ ކަމަށް މައިމޫނާ ވިދާޅުވި އެވެ.

މިދުވަސްވަރު ކޮވިޑް-19 އާއެކު އިންފްލެއަންޒާ ޑެންގީ އަދި އެހެނިހެން ބަލިތައް އުޅޭއިރު ބަލިތައް ދެނެގެންނާނީ ކިހިނެއްތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން ޓެކްނިކަލް އެޑްވައިޒަރީ ގްރޫޕް(ޓެގް)ގެ އިސްޑޮކްޓަރ، ޑޮކްޓަރ އަލީލަތީފް ވިދާޅުވީ ޑެންގީގައި އާންމުކޮށް ގަދަ ހުމެއް އައިސްފައި ބޮލުގައި ރިއްސާފައި ހުޅުހުޅުގައި ރިއްސާނެ ކަމަށެވެ.

ކޮވިޑް-19 ގެ އިތުރުން މިދުވަސްވަރު އާންމުކޮށް ފެތުރޭ ބަލީގެ އަލާމާތެއް ފެންނަނަމަ ހޮސްޕިޓަލަށް ނުވަތަ ކްލިނިކަކަށް ދައްކާ އެކަންކަމަށް ސަމާލުވުމަށް ސިއްހީ އޮފިޝަލުން އަންނަނީ އެދިލައްވަމުންނެވެ.