ކުރީގެ ރައީސް ޔާމީން ގެއަށް ބަދަލު ކޮށްދިނުމަށް ގޮވާލައިފި
25 އެޕްރީލު 2020 | ހޮނިހިރު 12:20ސިޔާސީ ގޮތުން ޖަލަށް ލެވުނު ބޭބޭފުޅުންނަށް މިފަދަ ލުއިތައް މީގެ ކުރިން ދީފައިވޭ
ކުރީގެ ރައީސް ޔާމީން ގެންދަވަނީ މަނީ ލޯންޑަރިންގެ ކުށް ސާބިތުވެ ފަސް އަހަރުގެ ޖަލު ހުކުމް ތަންފީޒު ކުރައްވަމުން
ރައީސް އަބްދުﷲ ޔާމީން އަބްދުލްގައްޔޫމްގެ ސިއްހީ ހާލުކޮޅު ހުރި ގޮތުން އެމަނިކުފާނު ގެއަށް ބަދަލުކޮށްދިނުން އަވަސްކޮށްދިނުމަށް އެދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އަށް ގޮވާލައިފިއެވެ.
ޕީޕީއެމް/ޕީއެންސީން މިކަމަށް ގޮވާލާ، ހޮނިހިރު ދުވަހު ނެރުނު ނޫސްބަޔާނުގައި ބުނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ދަށުން 5 އަހަރުގެ ރިޔާސީ ދައުރެއް މިހާތަނަށް ފުރިހަމަ ކޮށްފައިވާ އަދި މިހާރު އިދިކޮޅުގައި ހުންނެވި ސިޔާސީ ހަމައެކަނި ލީޑަރު ރައީސް ޔާމީން ނުޙައްޤުން ޖަލުގައި ބަންދުކޮށްފައި ހުންނަތާ 5 މަސް ދުވަހަށް ވުރެ ގިނަވެފައިވާ ކަމަށެވެ. އަދި އެމަނިކުފާނުގެ ފަރާތްޕުޅުން ހައިކޯޓުގައި އިސްތިޢުނާފު ކުރެވިފައިވާ މައްސަލަ ކުރިއަށް ނުގެންދެވޭތާ ވެސް މަސްތަކެއް ފާއިތުވެގެން ގޮސްފައިވާ ކަމަށް ބަޔާނުގައިވެއެވެ.
މީގެ ކުރިން ޝަރީޢަތަށް ސާބިތުވެ ޖަލަށް ޙުކުމް ކުރެވިފައިވާ ސިޔާސީ ބޭބޭފުޅުން ރަމަޟާން މަހުގެ ދުވަސްތައް އެފަރާތްތަކުގެ ޢާއިލާއާއެކު ހޭދަކުރުމުގެ ފުރުޞަތު ކުރީގެ ސަރުކާރުން ފަހިކޮށްދީފައިވާކަން ފާހަގަކޮށް ބަޔާނުގައި ބުނީ ޤައުމަށް ދިމާވާ ތަފާތު ކާރިޘާ ތަކުގައި ވެސް ޖަލު ބަންދުގައި ތިބި ސިޔާސީ ލީޑަރުންނަށް މަޢާފު ދިނުން ފަދަ ލުއިތައް ދީފައިވާ ކަމަށެވެ.
ނަމަވެސް ރާއްޖޭގައި ފެތުރެމުންދާ ކޮވިޑް-19ގެ ބިރުވެރިކަން އިންތިހާއަށް ބޮޑުވެގެން ދާއިރުވެސް، ރައީސް ޔާމީން ގެއަށް ބަދަލު ކުރުމުގެ ވިސްނުމެއް ސަރުކާރުން ނުގެންގުޅޭ ކަމަށް ބަޔާނުގައިވެއެވެ. ނަމަވެސް ސަރުކާރަށް އެއްބާރުލުން ދިނުމަށް ޕީޕީއެމް/ޕީއެންސީ ކޯލިޝަނުން ތައްޔާރަށް އޮތް ކަމަށާއި، އެއްބައިވަންތަކަމަށް އިސްކަން ދިނުމަށް ވެސް ގޮވާލާފައިވެއެވެ.
ރައީސް ޔާމީނުގެ ޞިއްޙީ ހާލުކޮޅަށް ރިޢާޔަތްކޮށް، ރަމަޟާން މަސް ފެށުމުގެ ކުރިން އެމަނިކުފާނު ގެއަށް ބަދަލުކޮށް ދިނުމަށް ވެސް އެދިފައިވާކަން ބަޔާނުގައި ފާހަގަކޮށްފައިވެއެވެ. އަދި ރަމަޟާން މަސް ފެށި ފުރަތަމަ ދުވަސް ނިމި ދެވަނަ ދުވަހަކަށް ފެށިގެން ދިޔައިރު ވެސް އެމަނިކުފާނު ގެއަށް ބަދަލުކޮށް ނުދިނުމުން ދޭހަވަނީ، މިސަރުކާރުން އިހުސާންތެރިކަމާއި، އެއްބައިވަންތަކަމަށް ފުރުޞަތު ދޭން ބޭނުންނުވާކަން ކަމަށެވެ.
އެޗްއާރްސީއެމުން މިމއްސަލަ ބަލާ ރައީސް ޔާމީން ގެއަށް ބައްދަލުކުރުން އަވަސްކޮށް ދިނުމަށް މަސައްކަތް ކުރުމަށާއި އަދި އިސްތިއުނާފްގެ މައްސަލަ އަވަސް ކުރުމުގެ މަސައްކަތް ކޮށްދިނުމަށް ވެސް ބަޔާނުގައި އެދިފައިވެއެވެ.
ރައީސް ޢަބްދުﷲ ޔާމީން ޢަބްދުލްޤައްޔޫމްގެ ޞިއްޙީ ޙާހާލުކޮޅު ހުރި ގޮތުން ގެއަށް ބަދަލުކުރުމަށް ގޮވާލާފައިވާއިރު، މިބަޔާނުގައި ރައީސް ޔާމީނުގެ ޞިއްހީ ޙާލަތު ބަޔާންކޮށްދީފައި ނުވެއެވެ.
