މި ޙާލަތުގައި މާލެއިން ރަށަށް ދިއުމަކީ ކޮށްގެންވާނެ ކަމެއް ނޫން: މިނިސްޓަރ

ރާއްޖެއިން ކޮވިޑް-19 ގެ ކޮމިއުނިޓީ ސްޕްރެޑެއް ފެނިފައިވާ މި ޙާލަތުގައި މާލެއިން ބޭރަށް ދިއުމަކީ ކޮށްގެން ވާނެ ކަމެއް ނޫންކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.

ހޮނިހިރު ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެލްތް މިނިސްޓަރ އަމީން ވިދާޅުވީ، ކުރު މުއްދަތަކަށް މާލެއަށް ޒިޔާރަތްކޮށް އެކި ސަބަބުތަކާހުރެ ތާށިވެފައި ތިބި ވަރަށް ގިނަ ފަރާތްތައް އެބަތިބި ކަމަށާއި، ނަމަވެސް މިވަގުތު އެންމެ އިސް ވާޖިބަކީ ކަމާބެހޭ ފަރާތްތަކުގެ އިރުޝާދުތަކަށް ބޯލެނބުން ކަމަށެވެ.

އެގޮތުން މާލެއިންވެސް ކޮމިއުނިޓީ ސްޕްރެޑެއް ފެނިފައިވާއިރު، މިވަގުތު މާލޭގައި ތިބި ހުރިހާ ރައްޔިތުންނަކީ ވެސް ބަލި ޖެހުމުގެ ފުރުސަތު ނުވަތަ ނުރައްކާ ބޮޑު ބައެއްކަން ފާހަގަކުރައްވައި މިނިސްޓަރ ވިދާޅުވީ، މިވަގުތު މާލޭގައި ތިބި އެންމެންވެސް ތިބީ "ރިސްކް ބޮޑު" މީހުންގެ ލިސްޓުގައި ކަމަށެވެ. އެއާއެކު މިޙާލަތުގައި ރަށަށް ދާންޖެހޭނީ އެނޫން އެއްވެސް ގޮތެއް ނެތިގެންކަން މިނިސްޓަރ ފާހަގަކުރެއްވިއެވެ.

އޭގެ އިތުރުން، ރާއްޖޭގެ މިހާރުގެ ޙާލަތަށް ބަލައި، ލޮކްޑައުންގެ ޙާލަތު އާންމު ޙާލަތަކަށް ބަދަލުކުރެވެން މިވަގުތު ނެތްކަން މިނިސްޓަރ ފާހަގަކުރެއްވިއެވެ.

މިނިސްޓަރ އެހެން ވިދާޅުވެފައިވާއިރު، ރަށްރަށުންނާއި ރިސޯޓުތަކުން މާލެ އައި ވަރަށް ގިނަ ފަރާތްތައް މާލޭގައި ތާށިވެފައިވާކަމުގެ ޝަކުވާތައް ފަހަކަށް އައިސް ވަަނީ ފެންމަތިވެފައެވެ. އެގޮތުން ބައެއް ފަރާތްތައް ބޮޑެތި ޚަރަދުތައް ކޮށްގެން މާލޭގައި މަޑުކުރަން މަޖުބޫރުވެފައިވާއިރު، އެފަދަ ފަރާތްތަަކަށް ސަރުކާރުން ކާބޯތަކެއްޗާއި ވަގުތީ ހިޔާވަހިކަން ފޯރުކޮށްދޭނެ ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒްވެސް ވިދާޅުވެފައިވެއެވެ.

އެގޮތުން މަބްރޫކު ވިދާޅުވީ، އެފަދަ ފަރާތެއް ހުރިނަމަ 3328393ށް ގުޅައި އެ މައުލޫމާތު ހިއްސާ ކުރެވޭނެ ކަމަށެވެ.