އައިޖީއެމްއެޗްގެ ޚިދުމަތް ހޯދުމަށް ދަތިތަކެއް ކުރިމަތިވި ނަމަވެސް އެއްބާރުލުން ދިނުމަށް ގޮވާލައްވައިފި
25 އެޕްރީލު 2020 | ހޮނިހިރު 09:32ހޮސްޕިޓަލްގެ ޚިދުމަތްތަކަށް ވަނީ ބަދަލު ގެނެވިފައި
އެންއީއޯސީގައި ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ.މުރާދު ވާހަކަދައްވަނީ
ކޮވިޑް-19 ފެތުރެމުންދާ މިހާލަތުގައި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ޚިދުމަތް ހޯދުމަށް ދަތިތަކެއް ކުރިމަތިވި ނަމަވެސް އެއްބާރުލުން ދިނުމަށް ޑރ.މުސާ މުރާދު ގޮވާލައްވައިފިއެވެ.
ނޭޝަނަލް އިމަރޖެންސީ އޮޕަރޭޝަންސް ސެންޓަރު (އެންއީއޯސީ)ގައި ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ.މުރާދު ވިދާޅުވީ ކޮވިޑް-19އާ ގުޅިގެން އައިޖީއެމްއެޗް ދެމުންދާ ޚިދުމަތްތަކާއި އޮޕަރޭޝަންތަކަށް ބޮޑެތި ބަދަލުތަކެއް އައިސްފައިވާ ކަމަށެވެ.
ޑރ.މުރާދު ވިދާޅުވީ އައިޖީއެމްއެޗް އެތެރޭގައި ހަމަޖެހިފައި ހުރި އުސޫލުތަކަށް ބަލާއިރު އާންމުކޮށް ކުރަމުންއައި ރޫޓީންގެ މަސައްކަތްތައް މަދުކޮށްލެވިފައިވާ ކަމަށެވެ. ނަމަވެސް އެމަރޖެންސީ ޚިދުމަތް 24 ގަޑިއިރު ދެމުން ގެންދާ ކަމަށެވެ.
ކޮންމެހެންދާން ޖެހިގެން މެނުވީ ހޮސްޕިޓަލް ނުދިއުމަށް އިލްތިމާސްކުރައްވާ ޑރ.މުރާދު ވިދާޅުވީ އިމަރޖެންސީއެއް ދިމާވެއްޖެނަމަ ނުވަތަ ބޮޑު ކަމެއް ދިމާވެއްޖެނަމަ ލަސްނުކޮށް ހޮސްޕިޓަލްގެ އިމަރޖެންސީއަށް ޚިދުމަތް ހޯދުމަށް ބަލި މީހުން އައުމަކީ އެންމެ ރަނގަޅު ގޮތް ކަމަށެވެ.
ޑރ.މުރާދު ވިދާޅުވީ އިމަރޖެންސީއަށް އަންނަ ބަލި މީހުން ސްކްރީން ކުރެވޭ ގޮތެއް ކަނޑައަޅާފައިވާ ކަމަށެވެ. އެގޮތުން ބަލި މީހާ ފުރަތަމަ ގެންދާނީ ފްލޫ ޑެސްކްއަށް ކަމަށާއި، އެޑެސްކުން އެމީހަކަށް ފަރުވާ ކުރިއަށް ގެންދާނެ ގޮތް ހަމަޖައްސާނެ ކަމަށް ރ. މުރާދު ވިދާޅުވިއެވެ. އަދި ކޮވިޑް-19އަށް ޝައްކުކުރެވޭނަމަ ފަރުވާ ދިނުމަށް ގެންދާނީ ވަކި ރޫޓަކުންކަން ޑރ. މުރާދު ފާހަގަކުރެއްވިއެވެ.
އޯޕީޑީގެ ޚިދުމަތްތައް އޮންލައިންކޮށް ދެމުން ގެންދާކަން ފާހަގަކުރައްވައި ޑރ.މުރާދު ވިދާޅުވީ ގާތްގަނޑަކަށް ބޮޑެތި ހުރިހާ ޑިޕާޓްމެންޓަކުން އޮންލައިން އޯޕީޑީ ކްލިނިކްތައް ހިންގަމުންދާ ކަމަށެވެ. ހެނދުނު 9:00ން މެންދުރު 1:00ށް ކަނޑައެޅިފައި ހުންނަ ދުވަސްތަކުގައި އޯޕީޑީގެ ޚިދުމަތް އޮންލައިންކޮށް ދެމުންދާ ކަމަށް ޑރ. މުރާދު ވިދާޅުވިއެވެ. އަދި ވިދާޅުވީ މިޚިދުމަތް ބޭނުންވާ މީހުން އައިޖީއެމްއެޗް ގުޅައި ނަން ނޯޓު ކުރުމުން އެއިންތިޒާމްތައް ހަމަޖެހިގެންދާނެ ކަމަށެވެ.
ކޮވިޑް-19ގެ ބަލި މީހުންނަށް ފަރުވާ ދިނުމުގެ މަސައްކަތްތަކުގެ އައިޖީއެމްއެޗްގެ ގިނަ މުވައްޒަފުން ހަރަކާތްތެރިވާކަން ފާހަގަކުރައްވައި ޑރ. މުރާދު ވިދާޅުވީ މާލެ ހިޔާ ކައިރީގައި ހިންގާ ފުލޫ ކްލިނިކްއާ، ވިލިމާލެގައި ހިންގާ އޮންލައިން ފުލޫ ކްލިނިކްގެ އިތުރުން ކަރަންޓީން ފެސިލިޓީތަކުގައާ، ދަރުމަންވަންތަ ހޮސްޕިޓަލްގައި ވެސް 24 ގަޑިއިރު މުވައްޒަފުން މަސައްކަތް ކުރަމުންދާ ކަމަށެވެ.
މިފަދަ ގޮތަކަށް މަސައްކަތްތައް ކުރަމުންދާއިރު، ކޮންމެވެސް ވަރަކަށް އާންމުންނަށް ހޮސްޕިޓަލުން ޚިދުމަތް ހޯދުމަށް ދަތިތަކެއް ކުރިމަތިވި ނަމަވެސް ދޭ އިރުޝާދުތަކާ އެއްގޮތަށް އަމަލުކުރުމަށް ޑރ. މުރާދު އިލްތިމާސްކުރެއްވިއެވެ. އަދި ވިދާޅުވީ މިމަސައްކަތުގައި އާންމު ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށެވެ.
