ކޮވިޑް-19 އާ ގުޅިގެން ގޭތެރެގައި ގިނަ ބަޔަކު ތިބެން ޖެހުމާއި ގުޅިގެން ފުރަތަމަ ފަހަރަށް ލައުޑް ސްޕީކަރް ބޭނުންކޮށްގެން އެމެރިކާގެ މިނެސޮޓާ ގައި ބަންގި ގޮވަން ފަށައިފިއެވެ.

ދުނިޔޭގެ ގިނަ ގައުމުތަކުގައި ރޯދަ މަހުގެ ފުރަތަމަ ދުވަހަކީ ހުކުރު ދުވަހެވެ. އެކަމަކު އެމެރިކާގައި މުލަ ރޯދަ ހިފާފައިވަނީ ބުރާސްފަތި ދުވަހުއެވެ. އެހެން ކަމުން ބުރާސްފަތި ދުވަހުން ފެށިގެން މޭ މަހުގެ 23 އާ ހަމަޔަށް ފަސް ނަމާދުގެ ބަންގި އަޑު ހަރުކޮށް ލައުޑް ސްޕީކަރު ބޭނުންކޮށްގެން ގޮވަން ވަނީ ފަށާފައެވެ.

އެ ސިޓީގެ މޭޔަރު ޖެކޯބް ފްރޭ ވަނީ ލައުޑް ސްޕީކަރު ބޭނުންކޮށްގެން ބަންގި ގޮވުމުގެ ހުއްދަ ދީފައެވެ. ބަންގި ގޮވާނީ ދާރް އަލް ހިޖްރަ މިސްކިތުންނެވެ. އެކަން އިންތިޒާމް ކޮށްފައިވަނީ އެމެރިކާގެ އެންމެ ބޮޑު މުސްލިމުންގެ ޖަމިއްޔާ ކަމަށްވާ ކައުންސިލް އޮން އެމެރިކަން އިސްލާމިކް ރިލޭޝަންސް (ސީއޭއައިއާރް) އިންނެވެ.

އެ މިސްކިތުގެ އިމާމް ޝަރީފް މުހައްމަދު ބުނީ، ލައުޑް ސްޕީކަރު ބޭނުން ކޮށްގެން ބަންގި ގޮވަން ނިންމީ އެހެން އަހަރުތަކާއި ހިލާފަށް މި އަހަރުގެ މުޅި ރޯދަމަސް އެއްކޮށް މުސްލިމުން ގޭގައި މަޑުކުރަން ޖެހުނަސް، އެމީހުންތިބީ އެކަނި ނޫންކަން ހަނދާންކޮށް ދިނުމުގެ ގޮތުން ކަމަށެވެ.

ސީއޭއައިއާރް މިނެސޯޓާގެ މެމްބަރު ޖައިލާނީ ހުސައިން ގަބޫލްކުރާ ގޮތުން ބަންގީގެ ސަބަބުން އެ ސަރަހައްދުގައި އުޅޭ މީހުންގެ އެއްބަވައިންތަކަން ޕްރޮމޯޓް ކުރެވިގެން ދާނެއެވެ.

ކޮވިޑް-19 ފެތުރެމުންދާތީވެ ދުނިޔޭގެ ގިނަ ގައުމުތަކުގެ މުސްލިމުން މި ފަހަރު ކުރިމަތިލާން ޖެހިފައިވާ ރޯދަ މަހަކީ މީއިން ޒަމާނަކު ބައްދަލުނުވާ ފަދަ ރޯދަ މަހަކާއި އެވެ. ބަލި ކޮންޓްރޯލް ކުުރުމުގެ ގޮތުން އިސްލާމީ ގިނަ ގައުމުތަކެއްގައި މިސްކިތުގެ ޖަމާއަތުގައި ނަމާދު ކުރުން ވަނީ މެދުކަނޑާލާފައެވެ.