ބޭނުންވާ ވަރަށް އޮކްސިޖަން ހުންނާނީ ގެނެސްފައި: ސަރުކާރު
24 އެޕްރީލު 2020 | ހުކުރު 23:06ރާއްޖޭގެ ހަތަރު ހޮސްޕިޓަލެއްގައި އޮކްސިޖަން އުފައްދާ
އެންއީއޯސީގެ ތަރުޖަމާނު މަބްރޫކް އަޒީޒް
ކޮވިޑް-19 ބަލި ޖެހޭ މީހުންނަށް ފޯރުކޮށްދޭ ވަރަށް އޮކްސިޖަންގެ ކެޕޭސިޓީ ރާއްޖޭގައި އެބަހުރި ކަމަށް ސަރުކާރުން ހާމަކޮށްފިއެވެ.
ހުކުރު ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރުގައި، ރާއްޖޭގައި ހުރި އޮކްސިޖަން ކެޕޭސިޓީއާ ބެހޭ ގޮތުން ނޫސްވެރިއަކު ސުވާލު ކުރުމުން އެންއީއޯސީގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، އޮކްސިޖަންގެ ކެޕޭސިޓީ އިތުރު ކުުރުމުގެ ގޮތުން ރާއްޖެއަށް ބޭނުންވާ އިތުރު އޮކްސިޖަން ގެނެސްފައިވާ ކަމަށެވެ.
މަބްރޫކް ވިދާޅުވީ، ސިއްހީ ދާއިރާއަށް ބޭނުންވާ ތަކެތި ގެނައުމަށް ނެޝަނަލް ރިކުއަރމެންޓް ލިސްޓެއް ހެދިފައިވާ ކަމަށެވެ. އެގޮތުން ވެންޓިލޭޓަރު ފަދަ ތަކެތި ގެންނަނީ، އަންދާޒާ ކުރެވޭ ވަރަށް ބަލާފައި ކަމަށެވެ.
ދުނިޔޭގެ ގައުމުތަކުގައި ކޮވިޑް-19 ފެތުރެމުންދާއިރު، އެކަށީގެންވާ ވަރަށް އޮކްސިޖަން ސަޕްލައި ހުރިތޯ ނުބެލި ދޫކޮށްލެވިފައި ބައެއް ހޮސްޕިޓަލްތަކަސް އެބަހުއްޓެވެ.
ކޮވިޑް-19 އަކީ ނޭވާލާ ނިޒާމުގެ ބައްޔަކަށްވާއިރު، އެހެން ބަލިތައް ޖެހޭ މީހުންނަށް ވުރެ މި ބަލިޖެހޭ މީހުންނަށް އޮކްސިޖަން ފޯރުކޮށްދޭން ޖެހޭ މިންވަރު އިތުރެވެ. އެގޮތުން ކޮވިޑް-19 ގެ ބަލި މީހުންގެ ތެރެެއިން ގިނަ މީހުންނަށް މިނިޓެއްގެ ތެރޭގައި 15 ލީޓަރާއި 30 ލީޓަރުގެ އޮކްސިޖަން ފޯރުކޮށްދޭން ޖެހެއެވެ. ރާއްޖޭގެ ސިއްހީ މަރުކަޒުތަކާއި ހޮސްޕިޓަލުގައި ބޭނުންކުރަނީ އޮކްސިޖަން ސިލިންޑަރެެވެ. ކޮވިޑް-19 އަށް ފަރުވާދޭ ހަތަރު ހޮސްޕިޓަލް ކަމަށްވާ، އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)، ދަރުމަވަންތަ، އޭޑީކޭގެ އިތުރުން ޓްރީޓޮޕް ހޮސްޕިޓަލުގައި ދެމުންދާ އޮކްސިޖަން އަކީ، އޮކްސްިޖަން އުފައްދާ މެޝިން ބޭނުންކޮށްގެން އުފައްދާ އޮކްސިޖަންއެވެ.
