ކޮވިޑް-19: ދުވާލެއްގެ މައްޗަށް ހެދެނީ 350 ޓެސްޓު!
24 އެޕްރީލު 2020 | ހުކުރު 18:54ކޮވިޑް-19 އަށް ދެ ބާވަތެއްގެ ޓެސްޓެއް ހަދާ
ކޮވޮޑް-19 އަށް ޓެސްޓު ކުރުމުގެ މަރުހަލާގެ ތެރެއިން
ރާއްޖެއިން ކޮވިޑް-19 އަށް ދުވާލެއްގެ މައްޗަށް ހެދެނީ 350 ޓެސްޓުކަމަށް ސަރުކާރުން ހާމަކޮށްފިއެވެ.
ހުކުރު ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ތަރުޖަމާން މަބްރޫކް އަޒީޒް ވިދާޅުވީ ދެތަނަކުން މިހާރު ޓެސްޓު ހެއްދޭނެ ކަމަށެވެ.
އިންދިރާ ގާންދީ މެމޯރިއަލް ހޮސްޕިޓަލުން (އައިޖީއެމްއެޗް) ގައި ބޭނުންކުރަމުން އަންނަ މެޝިނުން 250 އާއި 350 އާއި ދެމެދުގެ އަދަދަކަށް ޓެސްޓު ހެއްދޭކަން ފާހަގަކުރައްވާ މަބްރޫކް ވިދާޅުވީ އޭގެއިތުރުން ފުލުހުންގެ ފޮރެންސިކް ސަރވިސްގައި ހުންނަ މެޝިނުން މިހާރު ސާމްޕަލްތައް ޓެސްޓްކުރަން ފަށާފައިވާކަމަށެވެ.
މަބްރޫކް ވިދާޅުވީ ފުރަތަމަ ފުލުހުންގެ ފޮރެންސިކްގްގައި ހުރި މެޝިނުން ހެއްދުމަށް ގަސްދުކޮށްފައިވަނީ ދުވާލެއްގެ މައްޗަށް 50 ޓެސްޓު ކަމަށެވެ. އެގޮތުން ހުކުރު ދުވަހުގެރޭ އެ މެޝިނުން ޓެސްޓުކުރުމުގެ މަސައްކަތް ފަށާއިރު އެމެޝިނުގައި ހެއްދޭ ޓެސްޓުގެ އަދަދު އިތުރު ކުރެވޭނީ ރަނގަޅަށް ސްޓްރީމްލައިންވުމުން ކަމަށް އޭނާ ވިދާޅުވި އެވެ.
މި މަސް ނިމުމުގެ ކުރިން އައިޖީއެމްއެޗްއަށް އިތުރު މެޝިނެއް ގެނައުމުގެ މަސައްކަތް ކުރަމުންދާކަން ފާހަގަކުރައްވާ މަބްރޫކް ވިދާޅުވީ ހުކުރު ދުވަހުން ފެށިގެން ދުވާލެއްގެ މައްޗަށް 350 ޓެސްޓު ހެއްދޭނެ ކަމަށެވެ.
ރާއްޖޭގައި ކޮވިޑް-19 އަށް އައިޖީއެމްއެޗްގައި ހުންނަ ނެޝަނަލް ރެފަރެންސް ލެބޯރަޓަރީގައި ޓެސްޓުކުރާއިރު ކޮވިޑް-19 އަށް ދެ ބާވަތެއްގެ ޓެސްޓެއް ކުރެވޭއެވެ. އެއީ ސްކްރީން ޓެސްޓުގެ އިތުރުން ޖެނެޓިކް ޓެސްޓެވެ. ސްކްރީނިންގ ޓެސްޓަކީ ވަރަށް އަވަހަށް ނަތީޖާ ލިބޭ ޓެސްޓެކެވެ. އެ ޓެސްޓުން ބަލަނީ ކޮވިޑް-19 ހުރިތޯ ނުވަތަ ނޫންތޯ އެވެ. ސްކްރީނިންގ ޓެސްޓަކީ އެންމެ އިތުބާރު އޮންނަ އެއް ޓެސްޓެވެ.
ދެވަނަ އަށް ކުރާ ޖެނެޓިކް ޓެސްޓު ކުރެވިގެންދަނީ ވައިރަސްގެ އާރްއެންއޭ ނުވަތަ ޑީއެންއޭ ހުރިތޯ ބަލާށެވެ. އާއްމު ގޮތެއްގައި މިޓެސްޓުގެ ނަތީޖާ ލިބެން ހަ ގަޑިއިރާއި އަށްގަޑިއިރާ ދެމެދުގެ ވަގުތެއް ނަގައެވެ.
