ބަލި ޖެހުނު ކުދިންގެ އަދަދު ފަހަކަށް، އެއްބަނޑު އެއްބަފާ ދެ ކުއްޖަކުވެސް ހިމެނޭ
24 އެޕްރީލު 2020 | ހުކުރު 18:45ސްރީލަންކާގެ ކުއްޖަކުވެސް ހިމެނޭ
ޑޮކްޓަރުންތަކެއް ބަލި މީހަކަށް ފަރުވާ ދިނުމުގައި ހަރަކާތްތެރިވަނީ
ރާއްޖެއިން ކޮވިޑް-19 އަށް ޕޮޒިޓިވްވި ކުޑަކުދިންގެ އަދަދު ފަހަކަށް އަރައިފިއެވެ.
ރާއްޖެއިން އެންމެ ފުރަތަމަ ޕޮޒިޓިވްވި ކުޑަ ދެ ކުދިންނަކީ މާލެއިން ކޮވިޑް-19 އަށް ޕޮޒިޓިވްވި އުމުރުން 35 އަހަރުގެ މީހާގެ ދެ އަހަރުގެ ކުއްޖާއެވެ. ދެވަަނަ ކުއްޖަކަށް ކޮވިޑް-19 އަށް ޕޮޒިޓިވްވެފައިވަނީ 8 އަހަރުގެ ކުއްޖެކެވެ. އެ ކުއްޖާގެ ކޭސް ނަންބަރަކީ 33 އެވެ. އެ ކުއްޖާ އަކީ ކޭސް 28 އަދި ކޭސް 31 ގެ ދަރިފުޅުވެ.
ހުކުރު ދުވަހުގެރޭ ނެޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި މާލެއިން ހުކުރު ދުވަހު ޕޮޒިޓިވްވި ކޭސްތަކުގެ މައުލޫމާތު ދެއްވަމުން ޓެކްނިކަލް އެޑްވައިޒަރީ ގްރޫޕްގައި ހިމެނިވަޑައިގަންނަވާ ޑރ. އިބްރާހިމް އަފްޒަލް ވިދާޅުވީ، ކޭސް 28 އަދި ކޭސް 31 ގެ 12 އަހަރުގެ ދަރިފުޅުވެސް ކޮވިޑް-19 އަށް ޕޮޒިޓިވްވެފައިވާ ކަމަށެވެ. އެއާއި އެކު ދެމަފިރިންގެ ދެ ދަރިއަކު މި ވަނީ މި ބައްޔަށް ޕޮޒިޓިވްވެފަ އެވެ.
މީގެ ކުރިން 15 އަހަރުގެ ކުއްޖަކުވެސް ވަނީ ކޮވިޑް-19 އަށް ޕޮޒިޓިވްވެފައެވެ. އެއީ ކޭސް 25 އެވެ. އެ ކުއްޖާގެ އުމުރަކީ 15 އަހަރު ކުއްޖެކެވެ.
ޑރ. އަފްޒަލް ވިދާޅުވީ، ހުކުރު ދުވަހު ޕޮޒިޓިވްވި ކޭސްތަކުގެ ތެރެއިން 112 ވަނަ ކޭސް އަކީވެސް ކުޑަ ކުއްޖެއް ކަމަށެވެ. އެއީ ސްރީލަންކާ އަށް ނިސްބަތްވާ އުމުރުން 4 އަހަރުގެ ކުއްޖެކެވެ.
