ކޮވިޑް19 އަށް ޕޮޒިޓިވް މީހެއްގެ ބަލި ފަސޭހަވެއްޖެ!
މިކަން ހާމަކުރެއްވީ ހުކުރު ދުވަހު އޮތް ނޫސްވެރިންގެ ބައްދަލުވުމުގައި މަބްރޫކް އަޒީޒް
އައިޖީއެމްއެޗްގެ ލެބޯޓްރީގައި ކޮވިޑް19 އަށް ޓެސްޓުކުރަނީ
އިތުރު މީހަކު ކޮވިޑް-19 އިން ރަނގަޅުވެފައިވާ ކަމަށް މަބްރޫކް އަޒީޒް ވިދާޅުވެއްޖެ އެވެ.
ހުކުރު ދުވަހުގެ ރޭ ދަރުބާރުގޭގައި ގާއިމްކޮށްފައިވާ ނޭޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ 30 މާރޗް 2020ގައި އިނގިރޭސިވިލާތުން ރާއްޖެއައި ދިވެއްސެއް (ކޭސް18) ބަލިން ފަސޭހަވެފައިވާކަމަށާއި އޭނާގެ ޓެސްޓްތައް ޑަބަލް ނެގެޓިވްކަމަށެވެ.
މަބްރޫކް ވިދާޅުވީ ދުނިޔޭގެ އެކި ކަންކޮޅުތަކުގައިވެސް ބަލިން ފަސޭހަވިކަމުގައިވިޔަސް، އަނެއްކާވެސް ކޮވިޑް-19 އަށް ޕޮޒިޓިވް ވާކަމަށް ރިޕޯޓުކުރާކަމަށާއި އެކަމާއި ގުޅިގެން ޑޮކްޓަރުންގެ ޓީމުން ވަނީ ޑަބަލް ނެގެޓިވްވިކަމުގައިވިޔަސް އިތުރު ޓެސްޓެއް ހެދުމަށްކަމަށެވެ. މަބްރޫކް ވިދާޅުވީ ރޯގާގެ އަލާމާތް ބޮޑަށް ހުރި މީހަކު ކަމުގައި ފާހަގަވާނަމަ، އެމީހަކު ދޫކުރުމަށް ހަމަޖެހިފައިވަނީ އިތުރަށް ތަހުލީލުކުރުމަށް ފަހުގައިކަމަށެވެ.
މަބްރޫކް ވަނީ ނޫސްވެރިންގެ ބައްދަލުވުމުގައި، ބަލިން ފަސޭހަވެފައި އައިސޮލޭޝަން ފެސިލިޓީން ދޫކޮށް ނުލާތިބި ދެ ފަރާތެއް މިހާރު ދޫކޮށްފައިވާކަމަށް ބުނެފައެވެ. އެ ދެމީހުންނަކީ ކުރިން އެޗްޕީއޭގެ ފަރާތުން ބަލިން ފަސޭހަވެފައިވާކަމަށް އިއުލާންކޮށްފައިވާ ދެމީހުންނެވެ. އެއީ ކޭސް 17 އަދި 19އެވެ.
