ޕީޕީއެމްގެ ފިކުރަކީ އެންމެ މީހެއްގެ ފިކުރެއް ނޫން:ރައީސް ޔާމީން
ޕާޓީގެ ފިކުރު އެންމެ މީހަކަށް މާނަ ނުކުރެވޭނެ
ޕީޕީއެމްގެ އޮފީސް ހުޅުވުމަށް ބޭއްވި ރަސްމީއްޔާތުގައި ރައީސް ޔާމީން ވާހަކަފުޅު ދައްކަވަނީ
ޕީޕީއެމްގެ ފިކުރަކީ އެންމެ މީހެއްގެ ފިކުރެއް ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ބޮޑުތަކުރުފާނު މަގުގައި ޕީޕީއެމްގެ އާ އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އެޕާޓީގެ ފިކުރަކީ އެންމެ މީހެއްގެ ފިކުރެއް ނޫން ކަމަށާއި އެ ފިކުރު އެންމެ މީހަކަށް މާނަ ނުކުރެވޭނެ ކަމަށެވެ. ޕީޕީއެމްގެ އަސާސީ ގަވައިދުގައި ލިޔެވިފައިވާ ފިކުރު މާނަ ކުރެވޭނީ އެޕާޓީގެ ކައުންސިލް މެމްބަރުންނަށާއި ރައްޔިތުންގެ މަޖިލީހުގެ މެމްބަރުންނަން ކަމަށް އެ މަނިކުފާނު ވިދާޅުވިއެވެ.
"އަޅުނގަނޑުމެންގެ ޕާޓީގެ ވިސްނުމަކީ ފިކުރެއް ކަމަށް އަޅުގަނޑުމެން ދަންނަވަމުން އެބަ ގެންދަވަން، އެފިކުރަކީ އެންމެ މީހެއްގެ ފިކުރެއްނޫން،" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ޕާޓީގެ އަސާސީ ގަވާއިދަކީ އެންމެ މީހެއްގެ ސިކުނޑިން ކޮށްފައިވާ މަސެއްކަތެއް ނޫން ކަމަށެވެ. އެހެންކަމުން އެޕާޓީގެ އަސާސީ ގަވާއިދުގެ މުސައްނިފަކީ ވަކި މީހެއް ކަމަށް ބުނެ އޭގެ މާނަ ތަރުޖަމާ ކުރެވޭނެ މީހެއް ނުހުންނާނެ ކަމަށް އެމަނިކުފާނު ވިދާޅުވިއެވެ.
"އެއްވެސް މީހަކަށް މީގެ މުސައްނިފަކީ ތިމަންނައޭ ކިޔާފައި އޭގެ ތަރުޖަމާ އެންމެ ރަނގަޅަށް ދެވޭނީ ވަކި މީހަކަށޭ ބުނުމުގެ ހައްގެއް ނޯންނާނެ،" ރައީސް ޔާމީން ވިދާޅުވިއެވެ.
ޕީޕީއެމްގެ ފިކުރަނީ އެންމެ މީހެއްގެ ފިކުރެއް ނޫން ކަމަށް ރައީސް ޔާމީން ވިދާޅުވީ އެޕާޓީގެ ރައީސް އަދި ކުރީގެ ރައީސް މައުމޫނަން އިޝާރަތްކުރައްވައެވެ. ޕީޕީއެމް ހިންގަނީ އެޕާޓީގެ އަސާސީ ގަވައިދާ ހިލާފަތް ކަމަށާއި އެޕާޓީ އަކީ ރައީސް މައުމޫންގެ ފިކުރު ކަމަށް ރައީސް މައުމޫންގެ ފެކްޝަނުން ދަނީ ބުނަމުނެވެ.
ރައީސް ޔާމީން ވިދާޅުވީ އެމަނިކުފާން ވެސް ޕީޕީއެމް އުފެއްދުމަށް ބުރަ މަސައްކަތަކެއް ކުރެއްވި ކަމަށެވެ. ޕީޕީއެމް އުފެއްދުމަށް ފަހު އާންމު މެމްބަރުން ހޯދުމަށް އަތޮޅުތެރޭގެ ގިނަ ރަށްތަކަށް އެމަނިކުފާން ދަތުރުފުޅު ކުރެއްވި ކަމަށް ވިދާޅުވިއެވެ.
"އަޅުގަނޑަކީ މި ޕާޓީ، ޕާޓީއަކަށް ހެދުމަށް ވަރަށް ގިނަ މަސައްކަތަކެއް އަމިއްލަ ގޮތުން ކޮށްފަ ހުރި މީހެއް، ހަމައެކަނި ފައިސާ ހޯދާދިން މީހެއް ވެސް ނޫން، އަމަލީ ގޮތުން ޕާޓީގެ މެމްބަރުން ހޯދަން އަޅުގަނޑަށް ދަތުރު ނުކުރެވޭ ދާއިރާއެއް ވެސް ނޯންނާނެ" ރައީސް ޔާމިން ވިދާޅުވި އެވެ.
ޕީޕީއެމްގެ ހިންގުމަށް އެޕާޓީގެ ރައީސް މައުމޫން އުޒުރުވެރިވާކަމަށް ބުނެ، މުސްތަޝާރާ ޕާޓީ ހަވާލުކުރަން ސިވިލް ކޯޓުން ކުރި ހުކުމާއެކު، ޕާޓީގެ ހިންގުން ޙަރުދަނާވެފައިވާ ކަމަށެވެ. މިއަދު ޕީޕީއެމްއަކީ އާންމު ރައްޔިތުންގެ ޕާޓީ ކަމަށް ވެސް ރައީސް ޔާމީން ވިދާޅުވިއެވެ. ނަމަވެސް މި ހުކުމަކީ އިޖުރާތްތަކާ ހިލާފު، އަދި އިންސާފުން ބޭރު ނިންމުމެއް ކަމަށް ގިނަ ބަޔަކު ދަނީ ބުނަމުންނެވެ.
ޕީޕީއެމްގެ އެތެރޭގައި ހިޔާލުތަފާތުވުން އެފެދި އެޕާޓީގައި ވަނީ ޕީޕީއެމްގެ މުސްތަޝާރު ރައީސް ޔާމީންގެ ފެކްސަނާއި ޕާޓީގެ ރައީސް އަދި ކުރީގެ ރައީސް މައުމޫނަން ތާއިދު ކުރާ ފެކްސަނެން އުފެދިފައެވެ. ރައީސް މައުމޫންގެ ފެކްޝަނުން ދަނީ ސަރުކާރުގެ ސިޔާސަތުތަކަށް ފާޅުގައި ފާޑުކިޔަމުނެވެ. އަދި މިނިވަން މުވައްސަސާތަކުގެ މިނިވަންކަން ކަށަވަރުކުރުމަށް ރައީސް މައުމޫންގެ ފެކްޝަނުން ގޮވާލަމުން ދާއިރު ޕާޓީގެ މުސްތަޝާރު ޕާޓީ ހިންގަމުން ދަނީ އަސާސީ ގަވައިދާ ހިލާފަށް ކަމަށް ވެސް ތަކުރާރުކޮށް ބުނަމުނެވެ.
