ކޮރޯނާވައިރަސް (ކޮވިޑް-19) އާ ގުޅިގެން ހާލުގައި ޖެހިފައިވާ ބްރެޒިލްގެ ރައްޔިތުންނަށް މެންޗެސްޓަރ ސިޓީގެ ބްރެޒިލް ފޯވާޑް ގަބްރިއެލް ޖީސޫސް ދީލަތި އެހީތަކެއް ވެއްޖެ އެވެ.

ކޮވިޑް-19 ގެ އަސަރު ބްރެޒިލަށްވެސް ކޮށްފައިވާއިރު، ޖީސޫސް ވަނީ ރިއޯ ޑި ޖެނީރޯގެ ސަރަހައްދެއް ކަމަށްވާ ފަވެލަސްގެ ރައްޔިތުންނަށް ތިން ޓަނުގެ ކާބޯތަކެތި ހަދިޔާކޮށްފައެވެ. ޖީސޫސް މިކަން ހާމަކޮށްފައިވަނީ ޔޫޓިއުބްގައި ބްރެޒިލްގެ ލަވަކިޔުންތެރިއަކު ކުރިއަށްގެންދިޔަ ލައިވް ޝޯ އެއްގެ ތެރެއިންނެވެ.

މީގެ ހަފްތާއެއް ކުރިން ޖީސޫސް ވަނީ ސައޮ ޕޯލޯގެ ސްޓޭޓެއް ކަމަށްވާ ޖާޑިމް ޕެރީގެ ރައްޔިތުނަށް 400 ބާސްކެޓްގެ ކާބޯތަކެތި ހަދިޔާކޮށްފައެވެ. އެ ސްޓޭޓަކީ ޖީސޫސް އުފަންވި ސަރަހައްދެވެ.

ޖީސޫސްގެ އިތުރުން ބްރެޒިލިއަން ފުޓްބޯލް އެސޯސިއޭޝަނުން މީގެ ކުރިން ވަނީ އާންމު ރައްޔިތުންނަށް އެހީވުމުގެ ގޮތުން 5 މިލިއަން ޑޮލަރު ހަދިޔާކޮށްފައެވެ. މި 5 މިލިއަން ޑޮލަރުގެ ތެރެއިން ދެބައިކުޅަ އެއްބައި ހަދިޔާކޮށްފައިވަނީ ބްރެޒިލް ގައުމީ ފުޓްބޯޅަ ޓީމުގެ ކުޅުންތެރިންނެވެ.

ކޮވިޑް-19 ގެ އަސަރު ބްރެޒިލަށްވެސް ކޮށްފައިވާއިރު، އެ ގައުމުން މިހާތަނަށް 50،000 ށްވުރެ ގިނަ މީހުން ވަނީ މި ވައިރަހަށް ޕޮޒިޓިވް ވެފައެވެ. އަދި މި ވައިރަސް ޖެހިގެން އެ ގައުމުން މިހާތަނަށް 3،300 ށްވުރެ ގިނަ މީހުން ވަނީ މަރުވެފައެވެ.