ރާއްޖެއަށް 12 ދަރަޖައިގެ ވެއްޓުމެއް، ބްރެޒިލް ވައްޓާލުމަށްފަހު ޖަރުމަން އެއްވަނައަށް

ސެޕްޓެމްބަރު މަހު ނެރުނު ފީފާ ރޭންކިންގައި ރާއްޖެ 12 ދަރަޖަ ވެއްޓުނު އިރު ބްރެޒިލް ފަހަތަށް ޖައްސާލުމަށްފަހު ރޭންކިންގެ އެއްވަނަ ޖަރުމަނު ހޯދައިފިއެވެ.

ދުނިޔޭގެ ފުޓުބޯޅައިގެ މައި އިދާރާއިން ކޮންމެ މަހަކު އެއްފަހަރު ނެރޭ ރޭންކިންގައި ރާއްޖެއަށް މިފަހަރު ލިބިފައިވަނީ 154 ވަނައެވެ. މިއީ 12 ދަރަޖައިގެ ވެއްޓުމެކެވެ. މި ސަރަހައްދުގެ އެއްވަނަ މިފަހަރުވެސް އަވަށްޓެރި އިންޑިއާއިން ހޯދިއިރު ސާކްގެ ގައުމުތަކުގެ ތެރެއިން އެންމެ ދަށުން ރޭންކް ކުރެވިފައިވަނީ ޕާކިސްތާނެވެ. އެގޮތުން 107 ވަނައިގައި އިންޑިއާ ރޭންކް ކުރެވުނުއިރު ޕާކިސްތާން ރޭންކް ކުރެވިފައިވަނީ 200 ވަނައިގައެވެ. އަފްޢާނިސްތާނަށް 158 ވަނަ ލިބޭއިރު 174 އަދި 175 ގައި ރޭންކް ކުރެވިފައި ވަނީ ބޫޓާންއާއި ނޭޕާލްއެވެ. 196 ވަނައިގައި ބަންގްލަދޭޝް އޮތްއިރު 198 ވަނައިގައި އޮތީ ސްރީލަންކާއެވެ.

ފީފާ ރޭންކިންގެ އެއްވަނައަށް މިވަގުތު ދުނިޔޭގެ ޗެމްޕިއަނުންގެ ގޮތުގައި ތިބި ޖަރުމަނު ޖެހިލީ އެއް ދަރަޖައިގެ ކުރިއެރުމަކާއެކު 1606 ޕޮއިންޓު ހޯދައިގެންނެވެ. ބްރެޒިލް ދެވަނައަށް ވެއްޓިފައިވާއިރު ތިން ދަރަޖައިގެ ކުރިއެރުމަކާއެކު ޔޫރަޕުގެ ޗެމްޕިއަނުން ކަމަށްވާ ޕޯޗުގަލް ވަނީ ރޭންކިންގެ ތިންވަނައަށް ޖެހިލާފައެވެ. އާޖެންޓީނާއަށް ހަތަރުވަނަ ލިބޭއިރު ހަތަރު ދަރަޖައިގެ ކުރިއެރުމަކާއެކު ބެލްޖިއަމް ވަނީ ރޭންކިންގެ ފަސްވަނައަށް ޖެހިލާފައެވެ.

ފީފާ ރޭންކިންގެ ގަދަ 10 އެއްގައި ދެން ހިމެނޭ ގައުމުތަކަކީ ޕޮލެންޑް، ސުވިޒަލޭންޑް، ފްރާންސް، ޗިލީ އަދި ކޮލޮމްބިއާއެވެ. 2010 ވަނަ އަހަރުގެ ވޯލްޑްކަޕް ޗެމްޕިއަނުން ކަމަށްވާ ސްޕެއިން ރޭންކް ކުރެވިފައިވަނީ 11 ވަނައިގައެވެ.

އެފްރިކާ ބައްރުގެ ގައުމުތަކުގެ ތެރެއިން އެންމެ މަތީގައި ރޭންކް ކުރެވިފައިވަނީ 30 ވަނަ ލިބުނު މިސްރެވެ. އުތުރު އެމެރިކާގެ ގައުމުތަކުގެ ތެރެއިން އެންމެ މަތީގައި ރޭންކުރެވިފައިވަނީ 14 ވަނައިގަ އޮތް މެކްސިކޯއެވެ. ހަމައެހެންމެ ދެކުނު އެމެރިކާގެ އެންމެ މަތީ ރޭންކިން ބްރެޒިލްއަށް ލިބޭއިރު އޭޝިއާގެ އެންމެ މަތީގައި ރޭންކް ކުރެވިފައި ވަނީ 25 ވަނައިގައި ރޭންކް ކުރެވިފައިވާ އީރާންއެވެ. އޯޝޭނިއާގެ ގައުމުތަކުގެ ތެރެއިން އެންމެ މަތީގައި ރޭންކް ކުރެވިފައިވަނީ 113 ވަނައިގައި ރޭންކް ކުރެވިފައި އޮތް ނިއުޒިލޭންޑެވެ.

މި މަހު ނެރުނު ރޭންކިންގެ އެންމެ ފުލުގައި އޮތީ ޓޮންގާއެވެ.