ކޮވިޑް-19 ފެތުރުން ކޮންޓްރޯލްކުރުމަށް މެލޭޝިޔާ ލޮކްޑައުންކޮށްފައިވާ މުއްދަތު އަންނަ މެއި މަހުގެ 12 ވަނަ ދުވަހާ ހަަމައަށް އިތުރުކޮށްފި އެވެ.

އެގައުމުން ކުރިން އިއުލާންކޮށްފައިވާގޮތުން އޭޕްރީލް މަހުގެ 28 ވަނަ ދުވަހު ލޮކްޑައުންގެ މުއްދަތު ހަމަވާނެ އެވެ. ނަމަވެސް ލޮކްޑައުންގެ މުއްދަތު ތިން ވަނަ ފަހަރަށް އިތުކުރެއްވިކަން ހާމަކުރައްވާ އެގައުމުގެ ބޮޑު ވަޒީރު މުހިއްޔުއްދީން ޔާސިން ވިދާޅުވީ މިހާރު ޕޮޒިޓިވްވާ މީހުން ދަށަށްދާ ދިޔުން މިގޮތަށް ދާނަމަ އެޅިފައިވާ ފިޔަވަޅުތަކަށް ލުޔެއް ދެވިދާނެ ކަމަށެވެ.

ލޮކްޑައުންގެ މުއްދަތު އިތުރުކުރުމާއެކު މެލޭޝިޔާގައި ކުރިޔަށް އަންނަން އޮތް ފިތުރު އީދު ފާހަގަކުރުމުގެ ފުރުސަތުވެސް ގެއްލިގެންދާނެ އެވެ. މުހިއްޔުއްދީންގެ ވާހަކަފުޅުގައި ވިދާޅުވެފައިވަނީ ލޮކްޑައުންގެ މުއްދަތުގައި ރައްޔިތުން ވަމުންދާ ގުރުބާނީ ވައިރަސް އަށް ޕޮޒިޓިވްވާ މީހުންގެ އަދަދުތައް ދަށަށްދާ ދިޔުމުން އެނގޭކަމަށެވެ.

އެންމެ ފުރަތަމަ މެލޭޝިޔާ ލޮކްޑައުން ކޮށްފައިވަނީ މަރޗް މަހުގެ 18 ވަނަ ދުވަހު އެވެ. މިހާރު އަޅާފައިވާ ފިޔަވަޅުތަކުގެ ސަބަބުން ކޮންމެހެން ނިކުންނަންޖެހޭ ހާލަތެއްގައި ނޫނީ އެއްވެސް މީހަކަށް ބޭރަކަށް ނުނިކުމެވޭނެ އެވެ.

މިހާތަނަށް އައިއިރު މެލޭޝިޔާއިން 5,603 މީހުންނަށް ވައިރަސް ޖެހިފައިވެ އެވެ. އަދި 95 މީހަކު ވަނީ މަރުވެފަ އެވެ.