ލޮކްޑައުންގެ ނަތީޖާ އެނގޭވަރުވާނީ އަދި ދެ ހަފްތާ ފަހުން: ޑރ. ނަޒްލާ
މިހާރު މިފެންނަނީ މިގެ ހަފްތާއެއް ނުވަތަ ދެ ހަފަތާގެ ކުރިން ބަލި ޖެހިފައިވާ މީހުން
ޑރ. ނަޒްލާ ރަފީގު
ކޮވިޑް-19 މާލެ ސަރަހައްދުގައި ފެތުރެމުންދިއުމާ ގުޅިގެން މާލެ ސަރަހައްދުގައި މިހާރު އިއުލާންކޮށްފައިވާ ލޮކްޑައުންގެ ނަތީޖާ ފެންނަން އަދި ދެ ހަފްތާ ވަރު ނަގާނެ ކަމަށް އެޗްޕީއޭގެ މެޑިކަލް އޮފިސަރު ޑޮކްޓަރު ޑރ. ނަޒްލާ ރަފީގް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކާ ގުޅިގެން ޑރ. ނަޒްލާ ވިދާޅުވީ، މިހާރު ފެންނަމުންދާ ކޮވިޑް-19ގެ ޕޮޒިޓިވް ކޭސްތަކަކީ މީގެ އެއް ހަފްތާ ނުވަތަ ދެ ހަފްތާ ކުރިން ބަލި ޖެހިފައި ތިބި މީހުން ކަމަށެވެ.
އެހެންކަމުން މާލެ ސަރަހައްދުން ކޮވިޑް-19 އަށް ޕޮޒިޓިވްވި ފުރަތަމަ މީހާ ފެނުމާއެކު މާލެ ސަރަހައްދު ލޮކްޑައުން ކުރުމާ ގުޅިގެން، މީހުންނަށް ބަލި ޖެހުން މަދުވިކަން ނުވަތަ މިކަމުގެ ނަތީޖާ ފެންނަން އަދި ދެ ހަފްތާ ނަގާނެ ކަމަށް ނަޒްލާ ވިދާޅުވި އެވެ.
ޑރ. ނަޒްލާ ވިދާޅުވީ، މިހާރު އަޅާފައިވާ ފިޔަވަޅުތަކާ އެއްގޮތަށް އަމަލު ނުކުރެވޭނަމަ، ދެ ހަފްތާ ފަހުން ވެސް މިހާރަށް ވުރެ ޕޮޒިޓިވް ކޭސްތައް އިތުރުވުމުގެ ފުރުސަތު އެބައޮތް ކަމަށެވެ. ނަޒްލާ ވިދާޅުވީ، ކޮވިޑް-19 ބަލި ޖެހޭ މީހުން މަދުކުރުމާއި ހުއްޓުވުމަށް ކުރެވޭ ހަމަ އެކަނި ކަމަކަށް އޮތީ، ބަލި ޖެހިފައިވާ މީހާ ވީހާވެސް އަވަހަކަށް ދެނެގަނެވުން ކަމަށެވެ. އަދި ކޮވިޑް-19 ބަލީ އަލާމާތެއް ހުރި މީހަކު، ރިޕޯޓް ނުކޮށް ހުރިނަމަ، އެކަން އެނގޭ ފަރާތަކުން އަވަހަށް އެޗްޕީއޭގެ 1676 ނަމްބަރަށް ރިޕޯޓް ކުރުން ވަރަށް މުހިއްމު ކަމަށް ވެސް ނަޒްލާ ވިދާޅުވި އެވެ.
ޑރ. ނަޒްލާ ވިދާޅުވީ، ކޮވިޑް-19 އިން ރައްކާތެރިވެވޭނެ ހަމައެކަނި ގޮތަކީ އިޖުތިމާއީ ގައިދުރުކަން ބަހެއްޓުމާއެކު، ސާފުތާހިރުކަމާއި ރައްކާތެރިކަމާއެެކު ބޭނުންކުރާ ތަކެތި ގެންގުޅުން ކަމަށެވެ. އަދި ގިނަގިނައިން އަތް ދޮވުމާއެކު، ވައިރަސް އަރާ، ގުނަވަންތައް ކަމަށްވާ އަނގައާއި ނޭފަތް އަދި ލޯ ފަދަ ތަންތަނުގައި އަތްލުން ވީހާވެސް މަދުކުރުން ކަމަށް ނަލްޒާ ވިދާޅުވި އެވެ.
މީގެއިތުރުން، ކޮވިޑް-19ގެ އަލާމާތެއް، ނުވަތަ އެއްވެސް ރޯގާއެއްގެ އަލާމާތެއް ހުރިނަމަ، އެކަހެރިވެގެން ގޭގައި މަޑުކުރުން މުހިއްމު ކަމަށާއި، ކޮވިޑް-19 އަށް ޝައްކުކުރެވޭ އަލާމާތެއް ހުރިނަމަ، އެޗްޕީއަށް ގުޅައިގެން މައުލޫމާތު ހިއްސާ ކުރައްވަމުން ގެންދެވުމަށް ވެސް ޑރ. ނަޒްލާ އިލްތިމާސްކުރެއްވި އެވެ. މިކަންކަން ކޮށްގެން ނޫންގޮތަކަށް ކޮވިޑް-19 ކޮންޓްރޯލް ނުކުރެވޭނެ ކަމަށާއި އަދި މިހާތަނަށް މިބައްޔަށް ވެކްސިނެއް، ބޭހެއްވެސް އުފެއްދިފައިނުވާތީ، ބަލި ކޮށްޓްރޯލް ކުރުމަށް މިވަގުތު ކުރެވޭނެ ކަންކަމަކީ އެއީ ކަމަށްވެސް ޑރ. ނަޒްލާ ވިދާޅުވި އެވެ.
މިހާތަނަށް ރާއްޖެއިން 110 މީހަކު ކޮވިޑް-19 އަށް ޕޮޒިޓިވް ވެފައިވާއިރު، ބުރާސްފަތި ދުވަހު އެކަނިވެސް 23 ޕޮޒިޓިވް ކޭސް ފެނިފައި ވެއެވެ.
