އަންހެނުންގެ ޔޫރޯ 2022 ވަނަ އަހަރުގެ ޖުލައި މަހަށް ފަސްކޮށްފި
23 އެޕްރީލު 2020 | ބުރާސްފަތި 17:01ކުރިން މި މުބާރާތް ބޭއްވުމަށް ހަމަޖެހިފައި އޮތީ 2021 ވަނަ އަހަރު
2017 ވަނަ އަހަރުގެ އަންހެނުންގެ ޔޫރޯގެ ޗެމްޕިއަންކަން ހޯދި ނެދަލެންޑްސް ޓީމު
އަންހެނުންގެ ޔޫރޯ ފުޓްބޯޅަ މުބާރާތް 2022 ވަނަ އަހަރުގެ ޖުލައި މަހަށް ފަސްކުރަން ޔުއެފާ އިން ނިންމައިފި އެވެ.
ކުރިން މި މުބާރާތް 2021 ވަނަ އަހަރު ބޭއްވުމަށް ހަމަޖެހިފައި އޮތްއިރު، 2022 ވަނަ އަހަރަށް މުބާރާތް ފަސްކުރީ މިއަހަރުގެ ހޫނު މޫސުމުގައި ބޭއްވުމަށް ހަމަޖެހިފައި އޮތް ފިރިހެނުންގެ ޔޫރޯ ފުޓްބޯޅަ މުބާރާތާއި ޓޯކިޔޯ އޮލިމްޕިކްސް އަންނަ އަހަރަށް ފަސްކުރުމާ ގުޅިގެންނެވެ.
އަންހެނުންގެ ޔޫރޯ 2022 ވަނަ އަހަރު ބޭއްވުމަށް ޔުއެފާއިން މިހާރު ތާވަލުކޮށްފައިވަނީ އެ އަހަރުގެ ޖުލައި 6 ން 31 ގެ ނިޔަލަށެވެ. އަދި އެ އަހަރުވެސް މުބާރާތް ބޭއްވުމަށް ހަމަޖެހިފައިވަނީ އިންގްލެންޑް ގައެވެ. އެގޮތުން މުބާރާތް ހުޅުވާ މެޗު މެންޗެސްޓާ ޔުނައިޓެޑްގެ އޯލް ޓްރެފޯޑް ސްޓޭޑިއަމްގައި ކުޅުމަށް ހަމަޖެހިފައިވާއިރު، ފައިނަލް މެޗު ކުޅުމަށް ހަމަޖެހިފައިވަނީ އިންގްލެންޑުގެ ރަސްމީ ސްޓޭޑިއަމް ކަމަށްވާ ވެމްބްލީ ގައެވެ.
ޔުއެފާގެ ރައީސް އެލެކްސަންޑަ ސެފެރިން ވިދާޅުވީ އަންހެނުންގެ ޔޫރޯ 2022 ވަނަ އަހަރަށް ފަސްކުރުމުގެ މައިގަނޑު ބޭނުމަކީ އިތުރު މުބާރާތަކާ ފުށުނާރާ ގޮތަށް، އެ އަހަރުގެ ހޫނު މޫސުމުގައި ބާއްވާ އަންހެނުންގެ އެންމެ ބޮޑު ފުޓްބޯޅަ މުބާރާތަށް މި މުބާރާތް ހެދުން ކަމަށެވެ.
އެކަމަކު 2022 ވަނަ އަހަރުގެ ކޮމަންވެލްތު ގޭމްސް ބޭއްވުމަށް ތާވަލުކޮށްފައިވަނީ ޖުލައި 27 ން އޮގަސްޓް 7 އަށެވެ. އެހެންކަމުން ދެ މުބާރާތް ފުށުއަރާތީ، ޔުއެފާއިން މިހާރު އަންނަނީ ކޮމަންވެލްތު ގޭމްސްގެ އޯގަނައިޒަރުންނާއެކު އެކަން ހައްލު ކުރުމަށް މަޝްވަރާ ކުރަމުންނެވެ.
