ކޮވިޑް-19 އާ ގުޅިގެން ވަޒީފާ އިން ވަކިކުރި، ނޯޕޭލީވް އަށް ފޮނުވާލި އަދި އެކަށީގެންވާ ވަރަށް ވުރެ މުސާރަ ކުޑަކުރި މީހުންނަށް ކުރިޔަށް އޮތް 3 މަސް ދުވަހު ކޮންމެ މަހަކު 5000 ރުފިޔާ ދިނުމަށް ހަމަޖެހިފައިވާ ކަމަށް އިކޮނޮމިކް މިނިސްޓަރ ފައްޔާޒު އިސްމާޢީލް ވިދާޅުވި އެވެ.
ކޮވިޑް-19 އާ ގުޅިގެން އިގްތިޞާދަށް އަންނަ ލޮޅުންތަކާއެކު ޕްރައިވެޓް ސެކްޓަރ ގައި މަސައްކަތްކުރާ ގިނަ ބައެއްގެ ވަޒީފާ ގެއްލި މުސާރަ ކުޑަކުރުމާއި ނޯޕޭ އަށް ފޮނުވާލުމުގެ ކަންކަން ވަނީ ހިނގާފަ އެވެ. އެއާއެކު ސަރުކާރުން ވަނީ ޖޮބް ސެންޓަރެއް ގާއިމުކޮށް އެފަދަ ފަރާތްތަކުން ރަޖިސްޓްރީ ވުމަށް ހުޅުވާލާފަ އެވެ.
ކޮވިޑް-19 އާ ގުޅިގެން ސަރުކާރުން އެކުލަވާލާފައިވާ ރިލީފް ޕެކޭޖާ ގުޅިގެން ކަންކަން ގޮސްފައިވާ ހިސާބާ ގުޅޭގޮތުން މައުލޫމާތު ސާފުކުރެއްވުމަށް ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ބޭއްވި ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ މިސެންޓަރުގައި 1300 އެއްހާ މީހުން ރަޖިސްޓްރީ ކޮށްފައިވާ ކަމަށެވެ.
މިވަގުތު މަރޗުން ފެށިގެން މިކަންތައް ދިމާވެފައި ވަޒީފާ ގައި ތިބެ ވަޒީފާއިން ވަކިކުރި އަދި މުސާރަވެސް ވަކިވަރަކަށްވުރެ ދަށްވި ފަރާތްތަކަށް ހަމަ އަނެއްކާވެސް ކޮންމެސް ވަރެއްގެ އެހީތެރިކަން ފޯރުކޮށްދިނުމުގެ މަސައްކަތް މިކުރަނީ. އޭގެތެރޭގައި މިހާރު ނިންމާފައިވާނީ މަހެއްގެ މައްޗަށް ފަސް ހާސް ރުފިޔާ ތިން މަހަށް އޭޕްރީލް، މޭ، ޖޫން ހާ ހިސާބަށް ދޭން އަދި އޭގެ ކުރީގެ ކުރިޔަށް އޮތްތަނަށް އަނެއްކާވެސް އަޅުގަނޑުމެން ހާލަތު ރިވިއުކޮށް ފައިސާ ހޯދާނެ ގޮތްގޮތް ހޯދައިގެން އެކަން ކުރުމަށް. އެކަމުގައި ދިމާވި ދައްޗަކީ ޖޮބް ސެންޓަރ މެދުވެރިކޮށް މަސައްކަތްފެށީ 1300 އެއްހާ ފަރާތެއް ގާތްގަޑަކަށް ހަނދާންވާގޮތުގައި އޭގެ ރަޖިސްޓްރީކޮށްފައިވަނީ. މީގެތެރޭގައި އެބަތިބި ވަޒީފާއިން ކަނޑާލި ފަރާތްތަކާއި ނޯޕޭލީވް އަށް ދިން ފަރާތްތައް އަދި މުސާރަ ދަށް ކުރި ފަރާތްތައް އެބަހުރި ރަޖިސްޓްރީ ކޮށްފައި.އިކޮނޮމިކް މިނިސްޓަރ ފައްޔާޒު އިސްމާޢީލް
މިނިސްޓަރ ވިދާޅުވީ މިކަން ކުރަމުން ދިޔައީ އީ ފާސް މެދުވެރިކޮށް ކަމަށާއި ނަމަވެސް ބައެއް ފަރާތްތަކުން އެގޮތަށް ރަޖިސްޓްރީ ވުމަށް ދަތިކަމެއް ހުރިކަން ފާހަގަވި ކަމަށެވެ. އީފާސް ރަޖިސްޓްރޭޝަން ޕްރޮސެސްގައި އެދަތިކަން ދިމާވުމުން އޭޕްރީލް މަހުގެ 15 ވަނަ ދުވަހު ލޮކްޑައުންގެ ހާލަތަށް ދިޔުމުގެ ކުރިން އީ ފާސް ރަޖިސްޓްރޭޝަން އުވާލުމަށްފަހު އާންމުކޮށް ރަޖިސްޓްރީވުމަށް ހުޅުވާލި ކަމަށެވެ. ނަމަވެސް އެގޮތަށް ރަޖިސްޓްރީ ވާން ހުޅުވާލުމުން ސްކޭމްތައް އަންނަން ފެށުމުން އެއީ ރަނގަޅު މީހާތޯ ބެލޭނެ ގޮތް ނުވި ކަމަށް ފައްޔާޒު ވިދާޅުވި އެވެ.
އެހެންވީމާ އަނެއްކާވެސް އަޅުގަނޑުމެން އިމްޕްލިމެންޓް ކުރީ އީ ފާސް ތެރެއިން އެކަން ކުރަން. އެހެންނަމަވެސް އަދިވެސް އެއުނދަގޫތައް ވާތީވެ ލޮކްޑައުންއަށް ދިޔުމުގެ ކުރިން ރާވާފައި އޮތީ މާލޭގައި އެކޮނޮމިކް މިނިސްޓްރީގެ ބިލްޑިންގައި ސެންޓަރެއް ގާއިމުކުރަން ރަޖިސްޓްރީ ކުރުމުގެ އެހީތެރިކަން ދިނުމަށް. ހަމައެއާއެކު ކައުންސިލްތައް މެދުވެރިކޮށް ކައުންސިލްތަކުން އެރަށްރަށާއި ގުޅުންހުރި ފރާތްތައް ރަޖިސްޓްރީކޮށްފައި މިނިސްޓްރީއަށް އެންގީމާ ކައުންސިލުން ވެރިފައި ކުރީމާ އެކަންކަން ކުރިޔަށް ގެންދަން. އޭގެފަހުން ލޮކްޑައުންކޮށް ފައި ސެލްފް އައިސޮލޭޝަންގައި މިތިބީ ޓީމު މިވަގުތު. އެހެންކަމުން މިވަގުތު އޮންލައިންކޮށް ކުރެވެން ހުރި ކަންކަން އެބަކުރަން.އިކޮނޮމިކް މިނިސްޓަރ ފައްޔާޒު އިސްމާޢީލް
އެހެންކަމުން އޮންލައިން ކޯލް ސެންޓަރެއް އިއުލާންކޮށް ކުރިޔަށް ގެންދަން ނިންމާފައިވާ ކަމަށް އެކޮނޮމިކް މިނިސްޓަރ ވިދާޅުވި އެވެ.
މިނިސްޓަރު ވިދާޅުވީ މިއީ ރައްޔިތުންގެ ފައިސާ ކަމަށްވާތީ މިކަމުގައި މިނިސްޓްރީން ކަންތައްތަކެއް ޔަގީންކުރަން ބޭނުންވާ ކަމަށެވެ. ނަމަވެސް ލޮކްޑައުން ކޮށްފައިވުމުން އެންމެ ބޭނުންވާ ވަރަށް ވެރިފިކޭޝަން ޕްރޮސެސްގެ ކަންތައްތައް ކުރިއަށް ނުގެންދެވޭކަން މިނިސްޓަރު ފާހަގަ ކުރެއްވިއެވެ.
