ޔޫއޭއީގެ އެއަރ އެރަބިއާ އެއަރލައިންއަށް ފްލައިޓް އޮޕަރޭޝަން ފެއްޓުވުމުގެ ހުއްދަ ދީފިއެވެ.
ޚަލީޖް ޓައިމްސްގައި ރިޕޯޓުކޮށްފައިވާ ގޮތުގައި އެއަރ އޮޕަރޭޓިން ސެޓްފިކެޓް ލިބިފައިވަނީ ބުރާސްފަތި ދުވަހުއެވެ.
މި އެއަރލައިން އަކީ ޔޫއޭއީގެ ފަސްވަނަ ނޭޝަނަލް އެއަރލައިނެވެ. އަދި އެއަރ އެރެބިއާ އޮޕަރޭޓް ކުރަމުން ގެންދާނީ އަބޫދާބީންނެވެ.
އަލަށް ފަށާ އެއަރ އެރަބިއާ އެއަރލައިންއަށް ފްލައިޓް އޮޕަރޭޝަން ފެއްޓުވުމުގެ ހުއްދަ ދީފައިވީ ނަމަވެސް އަދި އޮޕަރޭޝަންތައް ފަށާނެ ދުވަހެއް އާންމުކޮށްފައި ނުވެއެވެ.
ކޮވިޑް-19އާ ގުޅިގެން ފްލައިޓްތައް އޮޕަރޭޝަންތައް މިވަގުތު މެދުކަނޑާލާފައި ވާއިރު، އެއަރ އެރަބިއާ އަށް ފްލައިޓް އޮޕަރޭޝަންގެ ހުއްދަ ދިނުމުގެ ކުރިން ޔޫއޭއީގެ ޖެނަރަލް ސިވިލް އޭވިއޭޝަން އޮތޯރިޓީން ވަނީ އެއަރ އެރަބިއާގެ ފްލައިޓްތައް ވަރަށް ރަނގަޅަށް އިންސްޕެކްޓް ކޮށްފައެވެ.
އެއަރ އެރަބިއާއަކީ ޔޫއޭއީގެ އެންމެ ވަރުގަދަ އެއަރލައިން ކަމުގައިވާ އިއްތިހާދު އެއަރވޭސްގެ ޖޮއެންޓް ވެންޗަރ ކުންފުންޏެކެވެ. އަދި ޓަރގެޓް ކޮށްފައި ވަނީ ލޯކޯސްޓް އެއަރލައިންގެ ގޮތުގައި ހިންގުމަށެވެ.
އެއަރ އެރަބިއާ އެއަރލައިން ސީއީއޯ އާދިލް އަލް އަލީ ވިދާޅުވީ ކޮވިޑް-19 ސަބަބުން މުޅި ދުނިޔޭގެ އިގްތިސާދަށް ބޮޑު ލޮޅުމެއް އަރާފައިވީ ނަމަވެސް އޭވިއޭޝަން އިންޑަސްޓްރީން ވެސް މިކަމުން އަރައިގަނެވޭ ކަމަށެވެ. އާދިލް ވިދާޅުވީ ފްލައިޓް އޮޕަރޭޝަންތައް އަލުން ފައްޓާނެކަމުގެ ޔަގީންކަން އެބަ އޮތް ކަމަށެވެ.
އާދިލް ވިދާޅުވީ އެއަރ އެރެބިއާ އޮތީ އެއަރޕޯޓުތައް ހުޅުވި ކަސްޓަމަރުންނަށް ދަތުރު ކުރުމުގެ ހުއްދަ ލިބުމާއެކު ފްލައިޓް އޮޕަރޭޝަން ފެށުމަށް ތައްޔާރަށް ކަމަށެވެ.
