ތޮއްޖެހިގެން ބިދޭސިން ދިރިއުޅޭ ތަންތަނަށް ވަދެ ނިކުތުން ކޮންޓްރޯލް ކުރަނީ
23 އެޕްރީލު 2020 | ބުރާސްފަތި 00:29ފުލުހުން ދަނީ ހަ ތަނެއް ބަލަހައްޓަމުން
މާލޭގައި މަސައްކަތް ކުރާ ބިދޭސީންތަކެއް
ތޮއްޖެހިގެން ބިދޭސީން ދިރިއުޅޭ ތަންތަނަށް މީހުން ވަދެ ނިކުމެ އުޅުން ކޮންޓްރޯލްކޮށް މޮނިޓަރ ކުރުމުގެ މަސައްކަތް ފުލުހުން ފަށައިފިއެވެ.
ބުދަ ދުވަހު މީޑިއާތަކަށް ފޮނުވި މެސެޖެއްގައި ފުލުހުން ބުނީ، މާލެގައި ހަލުވިކަމާއި އެކު ކޮވިޑް-19 ފެތުރެމުންދާތީވެ މާލޭގައި ދިރިއުޅޭ ބިދޭސީންގެ ވައްޓަފާޅިއާއި ދިރިއުޅޭ ތަންތަނުގެ ހާލަތު ހުރި ގޮތުން، ބަލި ފެތުރިގެން ދިޔުމުގެ ފުރުސަތު ބޮޑު ކަމަށް ބެލެވޭކަމަށެވެ. އަދި ބަލި ކޮންޓްރޯލްކޮށް ހުއްޓުވުމަށްޓަކައި ތޮއްޖެހިގެން ބިދޭސީން ދިރިއުޅޭ ތަންތަނަށް މީހުން ވަދެނިކުމެ އުޅުން ކޮންޓްރޯލް ކުރުމުގެ މަސައްކަތް އަންގާރަ ދުވަހު ފަށާފައިވާ ކަމަށެވެ.
އެގޮތުން މިހާތަނަށް ހަ ތަނެއް މޮނިޓަރ ކުރަމުންދާ ކަމަށް ފުލުހުން ބުންޏެވެ. ފުލުހުން ބުނީ، އެތަންތަން މޮނިޓަރ ކުރަމުންދާއިރު ޒަރޫރީ ބޭނުމެއްގައި ފިޔަވައި އެފަދަ ތަންތަނުން މީހުންނަށް ނިކުމެ ނޫޅެވޭގޮތަށް ހަމަޖެއްސިފައިވާ ކަމަށެވެ.
ބިދޭސީން ދިރިއުޅޭ ތަންތަން މޮނިޓަރ ކުރަން ފަށާފައިވާއިރު، މާލޭގައި ތޮއްޖެހިގެން ދިރިއުޅޭ ބައެއް ބިދޭސީން ވަނީ ހުޅުމާލެގައި ސަރުކާރުން ގާއިމްކޮށްފައިވާ ވަގުތީ ހިޔާއަށް ބަދަލުކޮށްފައެވެ. މާލޭގައި ކޮވިޑް-19 ފެތުރެމުންދާއިރު ބައްޔަށް ޕޮޒިޓިވްވި މީހުންގެ ތެރޭގައި ގިނަ އަދަދެއްގެ ބިދޭސީން ތިބުމުން އެ މީހުންގެ ތެރެއިން ގިނަ އަދަދެއްގެ ބަޔަކަށް ބަލި ޖެހިދާނެ ކަމުގެ ބިރު މިހާރު ވަނީ ހީވެފައެވެ.
