ކަރަންޓީނުގައި ތިބުން ފަސޭހަ ކޮށްދިނުމަަށް ނެޓްފްލިކްސް އާއި އިތުރު 4 ސްޓްރީމިންގެ ސަރވިސްއެއްގެ ފީ ކަނޑާލުމަށް ގޮވާލާ ޕެޓިޝަނެއް!

ދުނިޔޭގެ ބޮޑެތި ސްޓްރީމިންގ ސަރވިސްތަކުން 60 ދުވަހަށް ފީއަކާ ނުލާ ބެލޭގޮތް ހެދުމަށް ގޮވާލާ ޕެޓިޝަނެއް ފަށައިފައެވެ.

ފީއަކާ ނުލާ ޝޯވތައް ބެލޭނެ ގޮތް ހެދުމަށް ނެޓްފްލިކްސް، ޔޫޓިއުބް، ހޫލޫ، އެޗްބީއޯ އަދި އެމަޒަން ޕްރައިމް އަށް ގޮވާލާ ޗޭންޖް.އޯގް ގައި ފަށާފައިވާ މިޕެޓިޝަންގައި މިހާރުވެސް 52,000 އަށް ވުރެ ގިނަ މީހުން ވަނީ ސޮއިކޮށްފައެވެ.

މި ޕެޓިޝަންގައި ބުނެފައިވަނީ، ކޮވިޑް-19 ފެތުރުން ހުއްޓުވެން އޮތް ހަމަ އެކަނި ގޮތަކީ އިޖްތިމާއީ ގައިދުރުކަމާއި ކަރަންޓީނުވުންކަމަށްވާއިރު، މިހާރު ދުނިޔޭގެ އެތައް މިލިއަން ބައެއް ތިބީ މި ހާލުގައިކަމަށެވެ. އަދި މިއީ ކުރުން މުހިއްމު ކަމަކަށްވާއިރު، ގޭގައި ތިބެގެން ފޫހިވެ، އެކަނި ވުމަކީ އެކަށީގެންވާކަމެއް ކަމަށެވެ. މި ފޫހިކަން ފިލުވުމަށް ގިނަ ފަރާތެއް ދަނީ މި ސްޓްރީމިންގ ސަރވިސްތައް ބޭނުން ކުރަމުންކަމަށް ޕެޓިޝަންގައި ފާހަގަކުރެއެވެ.

ނަމަވެސް، މެމްބަރޝިޕް ފީ ދެއްކުމަކީ އެންމެންނަށް ކުރެވޭނެ ކަމެއް ނޫންކަމަށާއި ހާއްސަކޮށް ގިނަ ބައެއްގެ ވަޒީފާ ގެއްލި ނޫނީ މުސާރަ ކުޑަވެފައިވުމުގެ ސަބަބުން މިހާރު އެއީ އިތުރަށް އުނދަގޫކަމެއްކަން ވެސް ފާހަގަކޮށްފައިވެއެވެ.

އެހެންކަމުން، ޗޭންޖް.އޯގްގެ ޕެޓިޝަން ގޮވާލަނީ 60 ދުވަހުގެ މުއްދަތަކަށް މި ސަރވިސްތަކުގެ ފީ ކަނޑާލުމަށެވެ. އަދި މީގެ ސަބަބުން ގޭގައި މަޑުކުރުން ފަސޭހަވެ، ކުރާނެކަމެއް ގިނަ ފަރާތްތަކަށް ލިބިގެންދާނެކަމަށް ބުނެފައިވެއެވެ.

މި އަހަރުގެ ފުރަތަމަ ތިން މަހު އެކަނި 16 މިލިއަން އާ މެމްބަރުން ރެޖިސްޓަރ ވެފައިވާކަން ނެޓްފްލިކްސް އިން ބުނެފައިވާއިރު، އެ ކުންފުނީގެ ވެލިއު މިހާރު 190 ބިލިއަން ޑޮލަރަށްވުރެ މައްޗަށް ވަނީ އަރާފައެވެ.