ކާޑޭޝިއަން އާއިލާގެ ރިއާލިޓީ ޝޯވގެ ފިނާލޭ ޝޫޓް ކުރަނީ ކަރަންޓީނުގައި ތިބެގެން، އަމިއްލައަށް

އެމެރިކާގެ މަޝްހޫރު ރިއާލިޓީ ޝޯވ، 'ކީޕިންގ އަޕް ވިތު ދަ ކާޑޭޝިއަންސް'ގެ ސީޒަން 18 މިހާރު ކުރިއަށްދާއިރު، ސީޒަންގެ ފަހު އެޕިސޯޑް ޝޫޓް ކުރާނީ ކަރަންޓީނުގައި ތިބެގެން އަމިއްލައަށް ކަން ހާމަކޮށްފިއެވެ.

މަޝްހޫރު ކާޑޭޝިއަން އަދި ޖެނަރ ޢާއިލާގެ މެންބަރުންގެ ޙަޔާތް ދައްކުވައިދޭ މި ޝޯވ އަކީ ރިއާލިޓީ ޝޯވ ބަލާ ގިނަ ބައެއްގެ މަޤުބޫލުކަން ހޯދާފައިވާ ޝޯވއެކެވެ.

'ކީޕިންގ އަޕް ވިތު ދަ ކާޑޭޝިއަންސް'ގެ 18 ވަނަ ސީޒަންގެ ފަހު އެޕިސޯޑް ކަރަންޓީނުގައި ޝޫޓް ކުރަން ނިންމާފައިވާކަން ކިމް ކާޑޭޝިއަން ވެސްޓް ހާމަކޮށްފައިވާއިރު، އޭނާ ވަނީ މި މަސައްކަތް ކުރިއަށްދާ ގޮތުގެ ވީޑިއޯތަކެއް އޭނާގެ އިންސްޓަގްރާމް ސްޓޯރީއަށް ޝެއާކޮށްފައެވެ.

ކިމް އާއި ޢާއިލާ މެންބަރުން ކަރަންޓީނުވެގެން ތިބީ ވަކިންކަމަށް އެ މީހެއްގެ ގޭގައިކަމަށް ކިމް ބުންޏެވެ.

'ކީޕިންގ އަޕް ވިތު ދަ ކާޑޭޝިއަންސް' ގެ ކޮންމެ މެންބަރެއްގެ "ކޮންފެޝަނަލް" ނުވަތަ އިންޓަވިއު ފެންނައިރު، ކިމް ގެ ގޭގައި މިބައި ޝޫޓް ކުރަން ހަމަޖައްސާފައިވާ ކޮޓަރި އާއި ސެޓްއަޕް އޭނާ ވަނީ ފޭނުންނަށް ދައްކާފަ އެވެ. އަދި ޝޫޓިންގ ކުރިއަށްދާއިރު، އެ ޝޯގެ ޕްރޮޑިއުސަރުންނާ ކްރޫ ވީޑިއޯ ކޯލް ގެ ޒަރިއްޔާއިން އެހީވެއެވެ.

ކިމް، ކްލޯއީ، ކެންޑަލް އަދި ކައިލީ އަދި އެމީހުންގެ މަންމަ ކްރިސް ވެސް ކަރަންޓީނުގައި ޝޫޓް ކުރަން ހަމަޖެހިފައިވާއިރު، ކޯޓްނީ ވަނީ ޝޯވއާ ދުވަސްކޮޅަކަށް ދުރަށް ޖެހުމަށް ނިންމާލާފަ އެވެ.

ކޯޓްނީ މިފަދައިން މިދިޔަ ހަފުތާގައި ޓްވީޓްކޮށްފައިވާއިރު، އޭނާ ޓްވީޓް ކުރީ އޭނާއާ ކޮއްކޮ ކިމްއާ ދެމެދު ކުރިއަށްދިޔަ ދެބަސްވުމަށް ފެންނަ އެޕިސޯޑަށް ފަހުއެވެ. ކިހާދުވަހަކަށް ކަމައް ބުނެފައެއް ނުވެއެވެ.

މުޅި ދުނިޔޭ ގައި ވައިރަސް ޖެހުނު މީހުންގެ ޢަދަދު 1.8 މިލިއަނަށް އަރާފައިވާއިރު، އެމެރިކާއިން އެކަނިވެސް 560،000 އަށް ވުރެ ގިނަ ކޭސް ރިޕޯޓުކޮށްފައިވެއެވެ. އަދި މިވައިރަސް ޖެހިގެން އެ ޤައުމުގައި 21،900އަށް ވުރެ ގިނަ މީހުން މަރުވެފައިވާއިރު، ބަލިން ރަނގަޅުވެފައިވަނީ 32،728 އެއްހާ މީހުންނެވެ.

ވައިރަސް ފެތުރެން ފެށުމާއެކު ކިމްއާއި ޢާއިލާ މެންބަރުން އަމިއްލައަށް ކަރަންޓީނުވާން ނިންމާފައިވާއިރު، އެމީހުން ދަނީ ސޯޝަލް މީޑިއާ ބޭނުންކޮށް ސޯޝަލް ޑިސްޓެންސިން ޕްރެކްޓިސް ކުރުމަށް ސަޕޯޓަރުންނަށް ބާރު އަޅަމުންނެވެ.