މުލަ ރޯދަ ދުވަހަކީ، ހުކުރު ދުވަސް
ރާއްޖޭގެ އިތުރުން އިސްލާމީ އެއްވެސް ގައުމަކަށް އިރުއޮއްސުނު ފަހުން ހަނދު ފެނިފައެއް ނުވޭ
ރަމަޟާންމަހުގެ ހަނދު ބެލުމަށްފަހު އިއްވެވި ބަޔާނުގައި އިސްލާމިކް މިނިސްޓަރ، ޑރ އަހްމަދު ޒާހިރު ސޮއި ކުރައްވަނީ
މި އަހަރުގެ ރަމަޟާން މަހުގެ ފުރަތަމަ ދުވަހަކީ މި މަހުގެ 24 ވާ ހުކުރު ދުވަސް ކަމަށް ކަނޑައަޅައިފިއެވެ.
ރަމަޟާންމަހުގެ ހަނދު ސާބިތު ކުރުމަށް އިސްލާމީ މަރުކަޒުގައި ވީޑިއޯ ކޮންފަރެންސްކޮށް ބޭއްވި ހަނދު ސާބިތުކުރުމުގެ ޖަލްސާ އަށް ފަހު ނިންމާފައި ވަނީ މި މަހުގެ 23 ވާ ބުރާސްފަތި ދުވަހަކީ 1441 ވަނަ އަހަރުގެ ޝައުބާން މަހުގެ 30 ވަނަ ދުވަސް ކަމަށެވެ.
އަދި މިއަހަރުގެ ރަމަޟާން މަހުގެ 1 ވަނަ ދުވަހަކީ މި އޭޕްރިލް މަހުގެ މަހުގެ 24 ވާ ހުކުރު ދުވަސް ކަމަށެވެ. އިސްލާމިކް މިނިސްޓަރ، ޑރ. އަހުމަދު ޒާހިރު މިއަހަރުގެ ހަނދު ސާބިތު ކުރުމުގެ ބަޔާން ދެއްވަމުން ވިދާޅުވީ ރާއްޖޭގެ އިތުރުން އިސްލާމީއެއްވެސް ގައުމަކަށް ބުދަ ދުވަހު އިރުއޮއްސުނު އިރު ހަނދު ފެނިފައިނުވާކަމަށެވެ.
ފަލަކީ ހިސާބުތަކުން ދައްކާ ގޮތުން ރާއްޖެ އަށް ބުދަ ދުވަހު އިރު އޮއްސޭ އިރު، ހަނދު ފެންމަތީގައި ފެންނާކަށް ނުހުންނާނެއެވެ. އެހެން ކަމުން ރާއްޖެ އަށް ހަނދު ފެނުމުގެ ފުރުސަތު ނެތް ކަމަށް ފަލަކީ ހިސާބުތަކުން ދައްކައެވެ.
މި ބަރަކާތްތެރި ރަމަޟާން މަހުގެ ރޯދައިގެ އަޅުކަން ފަރުވާތެރިކަމާއި އެކު އަދާ ކުރުމަށާއި އަދި މި މާތް މައްސަރުން ﷲ ސުބްހާނަހޫވަތަޢާލާގެ ރުއްސެވުން ހޯދުމަށް މަސައްކަތް ކުރުމަށާއި ސަވާބާއި ދަރުމަ ހޯދުމަށް އެދި ހެޔޮކަންތައްތައް ގިނަކުރުމަށް ރާއްޖޭގެ ހުރިހާ ރައްޔިތުންނަށް އިސްލާމިކް މިނިސްޓްރީން ވަނީ އިލްތިމާސް ކޮށްފައެވެ.
