ރާއްޖޭގައި ތިބި 80 ބިދޭސީން މާލެއިން ވިލިވަރު ކަރަންޓީން ފެސިލިޓީއަށް ގެންގޮސް ބޭތިއްބުނީ އެންމެ އެކަށީގެންވާ ތަނެއްގައި ނޫން ކަމަށް ބުނެ، އެކަމަށް ސަރުކާރުން މާފަށް އެދިއްޖެއެވެ.

ބުދަ ދުވަހު ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، އެހާ ފެންވަރު ދަށްކޮށް ހުރި ތަނަކަށް ގެންދެވުމުން އެކަމަށް މާފަށް އެދޭ ކަމަށާއި، އެއީ އިންސާނުން ބައިތިއްބަން އެކަށީގެންވާ ތަނެއް ނޫންކަން ޤަބޫލުކުރައްވާ ކަމަށެވެ.

މަބްރޫކު ވިދާޅުވީ، ވިލިވަރު ކަރަންޓީން ފެސިލިޓީއަކީ ކުރިން ކޮންސްޓްރަކްޝަން މަސައްކަތުގައިވެސް ބޭނުންކުރި ތަނެއް ކަމަށާއި، އެތަނަށް އެއްފަހަރާ 80 ބިދޭސީން ގެންގޮސް ބޭތިއްބުނު ކަމަށްޓަކައި އެކަމަށް ނިހާޔަތަށް މާފަށް އެދޭ ކަމަށެވެ. އެގޮތުން އެ މީހުން މިހާރު އިރުފުއްޓާއި ކުޑަބަނޑޮހަށް ބަދަލު ކުރެވިފައިވާކަމަށް މަބްރޫކު ވިދާޅުވިއެވެ.

މަބްރޫކު އެހެން ވިދާޅުވެފައިވާއިރު، ވިލިވަރު ކަރަންޓީންގައި އިންސާނީ ކަރާމަތް ގެއްލޭފަދަ ގޮތަކަށް ބިދޭސީންތަކެއް ކަރަންޓީން ކުރި މައްސަލަ ހިއުމަންރައިޓްސް ކޮމިޝަނުން ތަހުޤީޤު ކުރަން ފަށާފައިވާ ކަމަށް ބުދަ ދުވަހު އެ ކޮމިޝަނުން މައުލޫމާތު ދީފައިވެއެވެ. ނަމަވެސް ތަހުޤީޤު ކުރިއަށްދާ މައްސަލަ އަކަށްވާތީ އެކަމުގެ އިތުރު ތަފްސީލެއް ހާމައެއް ނުކުރެއެވެ.