މަދިރި އާލާވިޔަ ނުދިނުމަށް މާލޭގައި މަދިރި ދުން ޖަހަނީ
ވިއްސާރައިގެ ހާލަތެއް އައިސްފިނަމަ ކަންކަން ކުރަންޖެހޭ އިންތިޒާމުތަކާ އެއްގޮތަށް މާލެ ސިޓީ ކައުންސިލުން މިހާރު މަސައްކަތްތަކެއް ކުރަންވަނީ ފަށާފައި
މާލެ ސިޓީ
މިދުވަސްވަރަކީ ވިއްސާރަ ދުވަސްވަރެއް ކަމުން މާލޭގައި މަދިރި އާލާވިޔަ ނުދިނުމަށްޓަކައި މާލެ ސިޓީ ކައުންސިލުން ބުދަ ދުވަހު މަސައްކަތްތަކެއް ފަށާނެކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރުން ބުނެފިއެވެ.
ކޮވިޑް-19 ފެތުރުން ކޮންޓްރޯލްކުރުމަށް މާލެ ސިޓީ އޭޕްރީލް މަހުގެ 30 ވަނަ ދުވަހާ ހަމައަށް ލޮކްޑައުންކޮށްފައިވާއިރު މިދުވަސްވަރަކީ މާލެ ހިމެނޭ ސަރަހައްދަށް މޫސުން ގޯސް ދުވަސްވަރަކަށްވާއިރު އަރިދަފުސް ރޯގާއާއި އިންފްލުއެންޒާ ފަދަ ބަލިތައް އިތުރުވެދާނެކަމަށް ޑޮކްޓަރުން ވަނީ ވިދާޅުވެފަ އެވެ.
ކޮވިޑް-19 ޓާސްކް ފޯހުން ބޭއްވި ނޫސްވެރިންގެ ބައްދަލުވުމުގައި ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވީ ރާއްޖޭގައި ވިއްސާރައިގެ ހާލަތެއް އައިސްފިނަމަ ކަންކަން ކުރަންޖެހޭ އިންތިޒާމުތަކާ އެއްގޮތަށް މާލެ ސިޓީ ކައުންސިލުން މިހާރު މަސައްކަތްތަކެއް ކުރަންފަށާފައިވާ ކަމަށެވެ. އަދި އެ މަސައްކަތުގެ ތެރެއިން މާލޭގައި މަދިރި އާލާވެ ގިނަވެދާނެކަމަށް ބަލާ ބުދަ ދުވަހު މަސައްކަތްތަކެއް ފަށާނެކަމަށް މަބްރޫކް ވިދާޅުވިއެވެ.
މީގެއިތުރުން ވިއްސާރަ ދުވަސްވަރު މާލޭގެ މަގުތަކުގައި ފެން ހެދޭނެކަމަށް ބަލައި އެކަން އެގޮތަށް ނުވާނެ ގޮތަށް ހެދުމަށްޓަކައި މަސައްކަތްތަކެއް ކުރަމުންދާކަމަށް މަބްރޫކް ވިދާޅުވި އެވެ. އެގޮތުން އިތުރު އުޅަނދު ނެރެގެން ފެން ޕަމްޕްކުރުމުގެ މަސައްކަތް ކުރުމަށް އެމްޑަބްލިއުއެސްސީއާ ގުޅިގެން މަސައްކަތްކުރަން ސިޓީ ކައުންސިލުން މަޝްވަރާކުރަމުން ދާ ކަމަށްވެސް މަބްރޫކް ވިދާޅުވިއެވެ.
ކޮވިޑް-19 ޓާސްކް ފޯހުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕުގެ ޑޮކްޓަރު ޑރ. މޫސާ ހުސައިން ވިދާޅުވީ މި ދުވަސްވަރު އިންފްލުއެންޒާ އަދި އަރިދަފުސް ރޯގާ ފެތުރުމުގެ ފުރުސަތު ބޮޑު ކަމަށެވެ. އެ ބަލިތަކުގެ އަލާމާތްތަކުގެ ތެރޭގައި ހިމެނޭ ކެއްސުމާއި ރޯގާޖެހި މޭގައި އަރިދަފުސް ހިފުމާއި އަދި ނޭވާ ކުރުވުމާއި ނޭވާލާން އުނދަގޫވުން ފަދަ ކަންކަމަކީ ކޮވިޑް-19ގެ ވެސް އަލާމާތްތައް ކަމަށްވާއިރު އެފަދަ އަލާމާތެއް ފެނިއްޖެނަމަ ލަސްނުކޮށް އެޗްޕީއޭއަށް ރިޕޯޓުކުރަން ޑޮކްޓަރު ވަނީ އެދިވަޑައިގަންފަ އެވެ.
