ހުޅުމާލެ މެޑިކަލް ފެސިލިޓީ މިމަހުގެ ނިޔަލަށް ނިންމާލެވޭނެ
21 އެޕްރީލު 2020 | އަންގާރަ 17:51މިހާރު މިތަނުގައި ކުރަމުންދާ ފިނިޝިންގ މަސައްކަތާއި އެތަނަށް ބޭނުންވާ އިކުޔެޕްމަންޓްތައް ލުމުގެ މަސައްކަތް ނިމޭނީ މިމަހުގެ ނިޔަލަށް
މެޑިކަލް ފެސިލިޓީގެ މަސައްކަތް ކުރިޔަށްދަނީ
ކޮވިޑް-19 އާ ގުޅިގެން ހުޅުމާލޭގައި މިހާރު ހަދަމުންދާ މެޑިކަލް ފެސިލިޓީގެ މަސައްކަތް މިމަހުގެ ނިޔަލަށް ނިންމާލެވޭނެކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
ކޮވިޑް-19 ގެ އެންމެފަހުގެ މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި މިފެސިލިޓީގެ މަސައްކަތްތައްގޮސްފައި އޮތް ހިސާބާ ގުޅޭގޮތުން މައުލޫމާތު ދެއްވަމުން މަބްރޫކް ވިދާޅުވީ ކުރިން މަސައްކަތްކުރަމުން އައީ މިތަން މިމަހުގެ 21 ށް ނިންމާލުމަށް ކަމަށެވެ. ނަމަވެސް މިހާރު މިތަނުގައި ކުރަމުންދާ ފިނިޝިންގ މަސައްކަތާއި އެތަނަށް ބޭނުންވާ އިކުޔެޕްމަންޓްތައް ލުމުގެ މަސައްކަތް ނިމޭނީ މިމަހުގެ ނިޔަލަށް ކަމަށް މަބްރޫކް ވިދާޅުވި އެވެ.
ހުޅުމާލޭގައި ގާއިމުކުރާ މެޑިކަލް ފެސިލިޓީ ގާއިމްކުރުމުގެ މަސައްކަތުގައި އެމްއެންޑީއެފްގެ އިތުރުން، އެޗްޑީސީ، ފެނަކަ، އަމިއްލަ ކުންފުނިތަކާއި އެޖެންސީތަކުގެ ގިނަ ބަޔަކު ބައިވެރިވެއެވެ. އަދި ކޮންސްޓްރަކްޝަން މަސައްކަތުގައި އުޅޭ މީހުންގެ އިތުރުން އަމިއްލަ ފަރުދުން ވެސް މަސައްކަތުގައި ބައިވެރިވެއެވެ. މިމަސައްކަތްތައް ކުރިއަށްދާ ގޮތުގެ ތަފްސީލް ހާމަކުރައްވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވީ މިއީ 290 އެނދުގެ މެޑިކަލް ފެސިލިޓީއެއް ކަމަށެވެ.
ޝަމާލް ވިދާޅުވީ މާލެސީޓީގައި ކޮވިޑް-19 ފެތުރިފައިވާތީ ފަރުވާ ދިނުމަށް ފެސިލިޓީތައް ގާއިމް ކުރަންޖެހޭ ކަމަށެވެ. ހުޅުމާލޭ މެޑިކަލް ފެސިލިޓީއާއެކު ކެޕޭސިޓީ އިތުރުވެގެންދާނެ ކަމަށާއި، މިތަނަކީ ޚާއްސަކޮށް ވައިރަސްއަށް ޕޮޒިޓިވްވާ މީހުންނަށް ފަރުވާ ދިނުމަށް ގާއިމް ކުރެވޭ ތަނެއް ކަމަށް ޝަމާލް ވިދާޅުވިއެވެ.
ހުޅުމާލެ މެޑިކަލް ފެސިލިޓީ ގާއިމްކުރަނީ 05 ބްލޮކަށް ބަހާލައިގެންނެވެ. އެތަނުގައި 19 ރޫމް ހުރެއެވެ.
