މިއަދުގެ މިހާތަނަށް 38 މީހަކު ޖޫރިމަނާކޮށްފި، 4 މީހަކު ހައްޔަރަށް
21 އެޕްރީލު 2020 | އަންގާރަ 16:44ގަވައިދާ ހިލާފުވުގެން ޖޫރިމަނާ ކޮށްފައިވަނީ 38 މީހެއް
ކާފިއު އިއުލާންކުރި ވަގުތު ފުލުހުން ހަރަކާތްތެރިވަނީ
މާލެއިން ކޮވިޑް-19 ގެ ކޭސްތަކެއް ފެނުމާއި ގުޅިގެން ލޮކްޑައުން ކުރެވިފައިވާއިރު، މިހާތަނަށް ގަވާއިދާ ޚިލާފަށް މަގުމަމައްޗަށް ނިކުތް 38 ފަރާތެއް ޖޫރިމަނާ ކޮށްފައިވާ ކަމަށް ފުލުހުން ހާމަކޮށްފި އެވެ.
ހައްޔަރަށް ގެންގޮސްފައިވާ ހަތަރު ފަރާތަތަކީ ގަވައިދާ ހިލާފުވެގެން ޖޫރިމަނާ ކުރުމަށް ފަހު، ކުށް ތަކުރާރު ކުރުމާ ގުޅިގެން ހައްޔަރަށް ގެންދެވުނު ފަރާތްތަކެކެވެ. މާލެ ލޮކްޑައުން ކޮށްފައިވާ ދަނޑިވަޅުގައި، ގަވައިދާ ހިލާފުވެގެން ޖޫރިމަނާކުރި މީހުންގެ ޖުމްލަ އަދަދަކީ 209 އެކެވެ.
މި މައުލޫމާތުތައް ހިއްސާކުރެއްވުމަށް އެންއީއޯސީގައި ބާއްވާ ނޫސްވެރިންގެ ބައްދަލުވުގައި ބައިވެރިވެވަޑައިގެންނެވި، އޭސީޕީ އިސްމާއިލް ނަވީން ވިދާޅުވީ ބޯހިޔާވަހިކަމެއް ނެތި 44 މީހަކު ވަގުތީ ހިޔާތަކަށް ގެންދެވިފައިވާ ކަމަށެވެ. މީގެ ތެރޭގައި ހިމެނެނީ އެއް އަންހެނަކާއި 43 ފިރިހެނެކެވެ. އަދި އެ ފަރާތްތަކުގެ ކެއިން ބުއިމުގެ ހުރިހާ ކަމެއް ދައުލަތުން ބަލަހައްޓަމުން ގެންދަވާކަން ނަވީން ހާމަކުރެއްވި އެވެ.
ހާލުގައި ޖެހިފައިވާ ބިދޭސީންނަށް ފޯރުކޮށްދީފައިވާ އެހީގެ މައުލޫމާތު ހިއްސާކުރައްވަމުން ނަވީން ވިދާޅުވީ، މަގުމަތީގައި އުޅުނު 71 މީހަކު މާލޭގައި ހުންނަ ފެސިލިޓީއަކަށް ގެންދެވިފައިވާ ކަމަށެވެ. މި 71 މީހުންނަކީ ވެސް ބަނގްލަދޭޝް އަށް ނިސްބަތްވާ ފަރާތްތަކެކެވެ.
މި ހިނގާ އެޕްރިލް މަހުގެ 30 ދުވަހާ ހަމައަށް، މާލެ ސިޓީ ލޮކްޑައުން ކޮށްފައިވާއިރު، ޖުމްލަކޮށް ރައްޔިތުންގެ ފަރާތުން ލިބެމުންދާ އެއްބާރުލުމަށް ފުލުހުން ވަނީ ޝުކުރުއަދާކުރައްވާފަ އެވެ. އަދި މި ކުރާ މަސައްކަތުގައި ކާމިޔާބު ލިބޭނީ، ރައްޔިތުންގެ އެއްބާރުލުން ލިބިގެން ކަމަށް ވިދާޅުވެ، ކުރިއަށް އޮތް ތަނުގައި ވެސް ރައްޔިތުން އެއްބާރުލުމަށް އެދިވަޑައިގެންނެވި އެވެ.
