ކަރަންޓީން ފެސިލިޓީތަކުން ދޫކޮށްލާ ފަރާތްތަށް ރަށްރަށަށް ދިޔުމުން، އެ މީހުން އިތުރަށް ކަރަންޓީން ކުރަން ނުޖެހޭނެކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުުރު ސޮއިކުރައްވާ ނެރުއްވާފައިވާ ސަރކިއުލާރ އެއްގައި ބުނެފައިވަނީ ކަރަންޓީން ފެސިލިޓީއަކުން ދޫކޮށްލުމުން ނުވަތަ ހެލްތު ޕްރޮޓެކްޝަން އެޖެެންސީގެ އެންގުމުގައިވާގޮތުގެ މަތިން ރިޒޯޓުތަކާއި ސަފާރީތަކުން ފުރައިގެން މާލެ، ހުޅުމާލެ، ވިލިމާލެ ފިޔަވައި އެހެން ރަށަކަށް ދިއުމަށްފަހު އެ މީހަކު އިތުރަށް ކަރަންޓީންކުރަން ނުޖެހޭނެ ކަމަށެވެ. އެހެންނަމަވެސް މާލެ، ހުޅުމާލެ އަދި ވިލިމާލެއަށް ދަތުރުކުރުމަށްފަހު، އެހެން ރަށަކަށް ދަތުރުކުރާ ފަރާތްތަކުން އެރަށެއްގައި 14 ދުވަހު ކަރަންޓީން ކުރަންޖެހޭނެކަމަށް ސަރކިއުލާގައި ބުނެފައިވެއެވެ.

ސަރކިއުލަރ ގައި ބުނެފައިވާގޮތުގައި، ކަރަންޓީން ފެސިލިޓީއަކުން ދޫކޮށްލާ ފަރާތަކަށްވެސް މޮނީޓަރިންގެ ހާލަތަށް ގެނެވިފައިވާ ރަށަކަށް އަރާ ފޭބުމަކީ މަނާކަމެކެވެ.

ހޯމަ ދުވަހުގެރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ތަރުޖަމާން މަބްރޫކް އަބްދުލްއަޒީޒް ވިދާޅުވީ، ކަރަންޓީން ފެސިލިޓީތަކުން ދޫކޮށްލާ މީހުން ބޭނުންވާ ރަށްރަށަށް ދިއުމުގެ ފުރުސަތު އޮންނާނެކަމަށާއި، އެ އިންތިޒާމް ހަމަޖައްސަމުން އަންނަކަމަށެވެ. އަދި މިހާރު ކަރަންޓިންގައި ތިބި ގިނަ މީހުން، ރަށްރަށް ދާން ބޭނުންވާކަމަށް މަބްރޫކް ވިދާޅުވި އެވެ.