މާލެސިޓީގައި ކުލި ނުދެއްކިގެން ގެއިން ނެރުނު ދެ ކުއްޖަކަށް ޖެންޑަރ މިނިސްޓްރީން ވަގުތީ ހިޔާވަހިކަން ހަމަޖައްސައިދީފިއެވެ.

ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވީ މާލެސިޓީގައި ދިރިއުޅެމުންދާ ދެކުދިން، ދިރިއުޅޭ ތަނުގެ ކުލި ނުދެއްކިގެން އެތަނުން ނުކުންނަން ޖެހުނު ކަމަށާއި، މިއީ ކަންބޮޑުވާ މައްސަލައެއް ކަމަށެވެ. މިހާރު އެދެކުދިންނަށް ޖެންޑާ މިނިސްޓްރީން ވަގުތީ ހިޔާވަހިކަން ހަމަޖައްސާފައިވާކަމަށް މިނިސްޓަރު ވިދާޅުވިއެވެ. އެއީ އެއްބަނޑުއެއްބަފާ ދެބެންކަންވެސް މިނިސްޓަރު ފާހަގަ ކުރެއްވިއެވެ.

މީގެ އިތުރުން މިނިސްޓަރު ވިދާޅުވީ ކޮވިޑް-19 ހަލުހިމިނެއްގައި ފެތުރެމުންދާ މިދަނޑިވަޅަކީ އިންސާނިއްޔަތުކަން އިސްކުރަންވީ ވަގުތެވެ. މިފަދަ ޙާލަތެއްގައިވެސް އިންސާނިއްޔަތުކަން އިސްކޮށްފިނަމަ، އޭގެ ދަރުމައާއި ސަވާބު، އެފަރާތަކަށް އަނބުރާ ލިބޭނެކަން، ކޮންމެ މީހަކުވެސް ހަނދާންކުރަން ވާނެއެވެ.

ޖެންޑަރ މިނިސްޓްރީން ހާމަކުރެއްވި ގޮތުގައި، މާލޭގައި މަގުމަތިވެފައިވާ 80އަށް ވުރެ ގިނަ މީހުން ފުލުހުން ނާއި ޙަވާލުކުރުމުން، މިމަހުގެ 15ވަނަ ދުވަހުން ފެށިގެން އެމީހުންނަށް ކެއިންބުއިމާއި ވަގުތީ ބޯހިޔާވަހިކަން ފޯރުކޮށްދެމުން ގެންދާ ކަމަށެވެ.

މީގެ އިތުރުން މާލެސިޓީ ލޮކްޑައުންއަކަށް ދިއުމާއި ގުޅިގެން އެކި ބޭނުންތަކަށް މާލެ އައިސް، ހާލުގައި ޖެހިފައިވާ މީހުންގެ ތެރެއިން މިނިސްޓްރީއަށް ރިޕޯޓުކޮށްފައިވާ މީހުންނަށް ވެސް، ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމުތައް ފޯރުކޮށްދެމުންް ގެންދާކަމަށް އެ މިނިސްޓްރީން ބުނެފައިވެއެވެ.

ހަމަ އެހެންމެ މާލޭސިޓީ ކައުންސިލަށް މިފަދަ 400އަށް ވުރެ ގިނަ ފަރާތެއްގެ މައްސަލަތައް ހުށަހެޅިފައި އޮތްކަންވެސް ޖެންޑަރ މިނިސްޓްރީން ހާމަ ކޮށްފައި ވެއެވެ. އެކަންކަމުގެ އިންތިޒާމުތައް ހަމަޖައްސައި ދިނުމަށްޓަކައި އެ ކައުންސިލާއެކު އެ މިނިސްޓްރީން މިހާރު ގެންދަނީ މަސައްކަތް ކުރަމުންނެވެ.

މި ފަދަ އެހީތެރިކަމެއް ބޭނުންވާ މީހުންގެ މަޢުލޫމާތު ލިބިފައިވާނަމަ، ލަސްނުކޮށް މިނިސްޓްރީގެ 3328393އާ ހިއްސާ ކުރުމަށް ޖެންޑަރ މިނިސްޓްރީން އެދިވަޑައިގެންފައި ވެއެވެ.