މިއަދު ބާއްވަން އެޖެންޑާކުރި މަޖިލިސް ޖަލްސާ މާދަމާ އަށް ފަސްކޮށްފި
21 އެޕްރީލު 2020 | އަންގާރަ 10:21ޖަލްސާ ފަސްވީ މަޖިލިސް ކުރާ ގެއަށް ދިމާވި ކަރަންޓުގެ މައްސަލައެއްގެ ސަބަބުން
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލީހުން އަންގާރަ ދުވަހު އެޖެންޑާކުރި ޖަލްސާ ބުދަ ދުވަހަށް ފަސްކޮށްފިއެވެ.
ރައްޔިތުންގެ މަޖިލީހުގެ އިދާރާއިން ބުނީ، މަޖިލީހުގެ އިދާރާއިން ކަރަންޓު ކެނޑުމާއި ގުޅިގެން ދިމާވި ޓެކްނިކަލް މައްސަލަ ހައްލު ކުރަމުންދާތީ އަންގާރަ ދުވަހު ބާއްވަން ހަމަޖެހިފައިވާ ޖަލްސާ ބުދަ ދުވަހަށް ފަސްކުރެވިފައިވާ ކަމަށެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި މަޖިލީހުގެ ރައީސްގެ މޭޒުން ހުށަހަޅާ ކަމެއްގެ ގޮތުގައި އެޖެންޑާގައި ވަނީ، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު ގެ 113 ވަނަ މާއްދާ ގައިވާ ގޮތުގެމަތިން، ޗިލްޑްރަންސް އޮމްބަޑްސް ޕަރސަންގެ މަޤާމަށް ޢައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާާ ނަންފުޅު ދިރާސާކޮށް ގޮތެއް ނިންމުމަށް އެ މައްސަލައާގުޅޭ ދާއިމީ ކޮމިޓީއަށް ފޮނުވުމުގެ މައްސަލަ އެވެ.
މީގެއިތުރުން، "ލޯކަލް ކައުންސިލްތަކުގެ އިންތިޚާބުގެ ޚާއްޞަ ބިލު 2020" ބިލާއި "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ބިލުގެ އިތުރުން ވަޒީފާއާބެހޭ ގާނޫނަށް އިސްލާހު ގެނައުމުގެ ބިލަށާއި ދެ ގަރާރަކަށް، ބަހުސް ކުރުންވެސް، އެޖެންޑާ ކޮށްފައި ވެއެވެ.
ނުނިމި ހުރި މަސައްކަތްތަކުގެ ތެރޭގައި ހިމެނޭ 8 ކަމަކަށް ބަހުސް ކުރުމަށް އެޖެންޑާކޮށްފައިވާއިރު، ކޮމެޓީތަކުން ހުށަހަޅާފައިވާ 3 ރިޕޯޓެއްވެސް އެޖެންޑާގައި ހިމެނެއެވެ.
