މިދަނޑިވަޅު ސިފައިންގެ ޚިދުމަތްތައް ރަން އަކުރުން ފަވާލަން: މިނިސްޓަރ

ސިފައިންގެ 128 ވަނަ އަހަރީ ދުވަސް ފާހަގަކުރަމުންދާއިރު، ސިފައިންގެ ޚިދުމަތްތައް ރަން އަކުރުން ފަވާލައްވާކަމަށް ޑިފެންސް މިނިސްޓަރ މާރިޔާ އަޙުމަދު ދީދީ ވިދާޅުވެއްޖެއެވެ.

ސިފައިންގެ އަހަރީ ދުވަހުގެ މުނާސަބަތުގައި އަންގާރަ ދުވަހު މިނިސްޓަރ ދެއްވި ޚާއްސަ މެސެޖެއްގައި ވަނީ ސިފައިންގެ އެންމެ މަތީ ވެރިޔާ އަދި ރާއްޖޭގެ ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިހާއި، ސިފައިންގެ އެކި ރޭންކް ތަކުގައި މަސައްކަތް ކުރައްވާ ފަރާތްތަކުގެ އިތުރުން ރާއްޖޭގެ ރައްޔިތުންނަށް ދުވަހުގެ ތަހުނިޔާ އަރިސް ކުރައްވާފައެވެ.

ސިފައިންގެ އަހަރީ ދުވަސް ފާހަގަކުރާ މި ދަނޑިވަޅަކީ ދުނިޔޭގައި ހަލުވިކަމާއެކު ކޮވިޑް-19 ފެތުރެމުންދާ ދަނޑިވަޅެއްކަން ފާހަގަކުރައްވައި މިނިސްޓަރ ވިދާޅުވީ، ރާއްޖޭގައި ކޮވިޑް-19 ފެތުރުން ކޮންޓްރޯލް ކުރުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު އަޅުއްވަމުން ގެންދަވާ ފިޔަވަޅުތައް ތަންފީޒު ކުރުމުގައި ހުރިހާ ސިފައިންވެސް ހަރަކާތްތެރިވަމުންދާ ކަމަށެވެ.

އަދި ސިފައިންގެ މި ޚިދުމަތްތައް ރަން އަކުރުން ފަވާލައްވާކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ، ޤައުމަށް ދިމާވާ އެފަދަ ކޮންމެ ނުރައްކަލަކުން ރައްޔިތުން ސަލާމަތް ކުރުމުގައި އެންމެ އިސް ސަފުގައި ސިފައިން ހަރަކާތްތެރި ވަމުންދާކަން ރައްޔިތުންވެސް ބަލައިގަންނަ ކަމަށެވެ. އަދި ސިފައިންގެ މިއަހަރުގެ ޝިއާރުކަމަށްވާ "ސިފައިންގެ ހިތްވަރު، ޤައުމުގެ ސަލާމަތް" ބިނާކޮށްފައިވަނީވެސް ރައްޔިތުންގެ ޝުއޫރުތަކުގެ މައްޗަށްކަން މިނިސްޓަރ ފާހަގަކުރެއްވިއެވެ.

ރާއްޖޭގައި ކޮވިޑް-19 ފެތުރުން ކޮންޓްރޯލް ކުރުމުގައި ސިފައިން ހަރަކާތްތެރިވަމުންދާކަން މިނިސްޓަރ ފާހަގަކުރައްވާފައިވާއިރު، ކޮވިޑް-19 އާ ގުޅިގެން ޤާއިމު ކުރެވޭ ކަރަންޓީން އަދި އައިސޮލޭޝަން ފެސިލިޓީތަކުގެ އަމަލީ މަސައްކަތުގައި އިސް ސަފުގައި ސިފައިން ހަރަކާތްތެރިވަމުން ދެއެވެ. އޭގެ އިތުރުން، ކޮވިޑް-19 ގެ ބަލިމީހުން އެއްތަނުން އަނެއް ތަނަށް ގެންދިއުމާއި، ލޮކްޑައުންއާ ގުޅިގެން އެއްތަނުން އަނެއްތަނަށް މުދާ ޑެލިވަރީ ކުރުމުގައިވެސް ސިފައިން ދަނީ މިދަނޑިވަޅުގައި ހަރަކާތްތެރިވަމުންނެވެ.