ސާފުނުކުރާ ތެޔޮ ފީފާއެއްގެ އަގު ސުން ޑޮލަރަށް ވުރެ ދަށަށް ދިއުމާއި ގުޅިގެން، ކަސްޓަމަރުންނަށް ފައިސާ ދީގެން ސްޓޮކް ހުސްކުރަން އެމެރިކާގައި ތެޔޮ އުފައްދާ ފަރާތްތަކުން ފަށައިފި އެވެ.

މިއީ އެމެރިކާގެ ތެލުގެ ބާޒާރުގައި، ތެލުގެ އަގު ސުމަކަށް ދިޔަ ފުރަތަމަ ފަހަރެވެ. އަދި އަގު ދަށްވާން މެދުވެރިވީ ސަބަބުތަކުގެ ތެރޭގައި ތެލުގެ ވިޔަފާރި ކުރާ ފަރާތަކުން ސްޓޮކް ބަހައްޓާނެ ތަނެއް ނެތުމާއި ގުޅިގެން، ސްޓޮކް ހުސްކުރަން ހެޔޮ އަގުގައި ވިއްކަން ފެށުން ހިމެނެ އެވެ.

ސީއެންއެން އިން ރިޕޯޓްކޮށްފައިވާ ގޮތުގައި، ސާފު ނުކުރާ ތެޔޮ ގެންގުޅޭ ބައެއް ވިޔަފާރިތަކުން އަންނަނީ ކަސްޓަމަރުންނަށް ފައިސާ ދީގެން ސްޓޮކް ހުސްކުރުމުގެ މަސައްކަތް ކުރަމުންނެވެ. ކޮވިޑް-19 އާ ގުޅިގެން ހަކަތައަށް އޮތް ޑިމާންޑު ކުޑަވުމާއި ގުޅިގެން، ގިނަ ސަޕްލަޔަރުންގެ ތެޔޮ ރައްކާ ކުރާ ފެސިލިޓީތައް ހުރީ ފުރެން ކައިރިވެފަ އެވެ.

އެމެރިކާގައި ތެލުގެ ވިޔަފާރި ކުރަނީ "ފިއުޗަރސް" އެއްބަސްވުމެއްގެ ދަށުންނެވެ. މާނައަކީ އެއްބަސްވުމުގައިވާ މުއްދަތު ހަމަވުމުގެ ކުރިން ރިފައިނަރީ ތަކަށާއި އެހެނިހެން ތެލުގެ ވިޔަފާރިކުރާ ފަރާތްތަކާ ހަމައަށް ޑެލިވަރީ ކަށަވަރު ކުރުމަކީ ތެޔޮ ގަނެފައިވާ ފަރާތްތަކުގެ ޒިންމާއެކެވެ.

އެގޮތުުން މޭ މަހުގެ ކޮންޓްރެކްޓްތައް އަންގާރަ ދުވަހަށް ހަމަވާއިރު، ތެލުގެ އިތުރު ސްޓޮކެއް ނެގުމުގެ ކުރިން މިހާރު ހުރި ސްޓޮކް ހުސްކުރުމަށް ތެޔޮ ރައްކާކުރައްވާފައިވާ ފަރާތްތަކުން އަންނަނީ މަސައްކަތް ކުރަމުންނެވެ. އަދި ސާފުނުކުރާ ފީފާތައް ނަގަން ބޭނުންވާ ފަރާތްތަކަށް ފައިސާ ދީގެން ވިޔަސް އެކަން ކުރުމުގެ މަސައްކަތް އެ ފަރާތްތަކުން އަންނަނީ ކުރަމުންނެވެ.

މިހެންވީ ކަމުގައިވީ ނަމަވެސް، އާންމު ރައްޔިތުންނަށް ވިއްކާ ތެލުގެ އަގަށް މާ ބޮޑެތި ބަދަލުތަކެއް ނާންނާނެ އެވެ. ނަމަވެސް، ކޮންމެވެސް ވަރަކަށް އާންމު ރައްޔިތުންނަށް ވިއްކާ ސާފުކޮށްފައިވާ ބައެއް ބާވަތްތަކުގެ ތެލަށް ބަދަލުތަކެއް އަންނާނެ އެވެ.

ދުނިޔޭގެ ބާޒާރަށް ބަލާއިރު، ސާފު ނުކުރާ ތެޔޮ ފީފާއެއްގެ އަގު ހުރީ، 25 ޑޮލަރުގަ އެވެ. މި އަގުތައް ހިފެހެއްޓިފައިވަނީ އެމެރިކާގައި ތެޔޮ ރައްކާކުރާ ސްޓޯރޭޖްތަކުގެ ކެޕޭސިޓީއާ ހަމަވާން ކައިރިވެފައިވީ ނަމަވެސް، ބައެއް އެހެނިހެން ގައުމުތަކުން ތެޔޮ ގަންނަމުން ދިއުމާއި ގުޅިގެންނެވެ. އޭގެ ތެރޭގައި ޗައިނާ، އިންޑިއާ އަދި ދެކުނު ކޮރެއާ ފަދަ ގައުމުތައް ހިމެނެ އެވެ.

ނަމަވެސް، މި ގައުމުތަކުގެ ތެލުގެ ސްޓޯރޭޖްތައް ފުރިގެން ޑިމާންޑު އިތުރަށް ދަށްވުމުން ތެލުގެ އަގު މިހާރަށް ވުރެވެސް ދަށަށް ހިނގައިދާނެ ކަމަށް މާހިރުން ބުނެ އެވެ. އަދި ތެޔޮ އުފައްދާ ގައުމުތަކުން މިހާރަށް ވުރެ އިތުރަށް، ސަޕްލައި ދަށް ނުކޮށްފި ނަމަ، ޑިމާންޑަށް ވުރެ ސަޕްލައި އިތުރުވާނެ ކަމަށާއި، މިކަމުގެ ސަބަބުން އިތުރު ގޮންޖެހުންނަތަކަކާ ކުރިމަތިލާން ޖެހޭނެ ކަމަށް އެ ފަރާތްތަކުން ބުނެ އެވެ.